بۇل حاباردى ارىپتەس ءىنىم بايقال بايادىلوۆتەن ەستىپ، ماعجان جۇماباەۆ ىشىگىن كوزىمىزبەن كورۋگە اسىقتىق.
قاسقىر ىشىكتىڭ بۇگىنگى يەسى، كوكشەتاۋ قالاسىنىڭ تۇرعىنى ءباتيما اياعانوۆا قاراعاندى مۇعالىمدەر ينستيتۋتىن 1951 جىلى بىتىرگەن. عۇمىرىنىڭ 52 جىلىن ءبىلىم سالاسىنا ارناعان ۇلاعاتتى ۇستاز ءوز اۋلەتىندە 30-جىلداردان بەرى ساقتالىپ كەلە جاتقان قاسقىر ىشىكتى قىمبات جادىگەرىنە سانايدى. ەل-جۇرتقا ەرتەرەك تانىستىرماعانىنىڭ سىرىن امانات جۇگىنىڭ اۋىرلىعىمەن تۇسىندىرەدى.
سالماقتاپ كوردىك، زىلدەي اپ-اۋىر ەكەن. جەلبەگەي جامىلۋعا دا رۇقسات بەرىلدى. اپايدىڭ ايتۋىنا قاراعاندا، جەتى قاسقىردىڭ تەرىسىنەن تىگىلگەن. جونى قارا قىلشىقتانعان، تۇگى مەن ءتۇبىتى سول قالپى ساقتالعان، سىرتى قالىڭ، مىقتى شۇعامەن قاپتالعان ونەر تۋىندىسى دەرلىك. شالعايى مول پىشىلگەن، قولتىعى كەڭ، جاعاسى ويىقتالىپ، مويىن مەن باستى تۇتاس جاباتىن كول-كوسىر دۇنيە. يلەۋى ابدەن قاندىرىلعان ىشىك قابىرعانىڭ جاساۋىن جارقىراتىپ تۇر. قانشاما ۋاقىت وتسە دە، ءوڭىن جويماعان. ءتۇز تاعىسىنىڭ قاسيەتى دە مىقتى-اۋ.
بۇل ىشىكتىڭ تاريحى دا تەرەڭ. ءباتيما ءاشىربەكقىزىنىڭ اكەسى اشىربەك اتا قازىرگى سولتۇستىك قازاقستان وبلىسىنىڭ ءۋاليحانوۆ اۋدانىنىڭ اۋماعىنداعى ۇلكەن قاراويدىڭ ماڭىندا 1883 جىلى دۇنيەگە كەلگەن. اناسى شاكيرا ءاۋباكىرقىزى كىشى قاراويدىڭ قىزى. اناسىنىڭ ءىنىسى، ياكي ناعاشىسى جاقيا ءاۋباكىرۇلى زامانىندا ومبى قالاسىندا ءبىلىم العان. كەيىن بەستوبەنىڭ ماڭايىنداعى قىزىلقاق اۋىلىندا مۇعالىم بولىپ ەڭبەك ەتىپتى. بۇرىنعىلاردىڭ ايتۋىنا قاراعاندا، جىر الىبى ماعجانمەن اكەسى دە، ناعاشىسى دا دوس-جار بولسا كەرەك. ءباتيما ءاشىربەكقىزىنىڭ بىلەتىنى، كوزى اشىق، كوكىرەگى وياۋ، جاقسىلارمەن كوپ دامدەس، پىكىرلەس بولعان، ءبىر-بىرىنە شۋاق-شاراپاتى تيگەن اكەسىنە وسى جادىگەردى ايگىلى اقىن ماعجان جۇماباەۆ سىيلاعان ەكەن.
سول كەزدەرى كىشى قاراوي ءتوڭىرەگىندە كەنەتاي ەسىمدى ون ساۋساعىنان ونەر تامعان ايتۋلى شەبەر بولىپتى. قاسقىر ىشىكتى سول كەنەتاي شەبەر تىككەن. كەيىن ارادا تالاي جىلدار وتكەن سوڭ ءباتيما ءاشىربەكقىزىنىڭ جولداسى، ۇلى وتان سوعىسىنىڭ ارداگەرى قايىربەك حاسەنوۆ الماتى قالاسىنداعى جوعارى پارتيا مەكتەبىن ءبىتىرىپ كەلىپ، قىزىلتۋ اۋدانىنىڭ «حەرسون» كەڭشارىنا پارتكوم حاتشىسى بولىپ تاعايىندالادى. وسى ءبىر قۋانىشقا ءباتيما اشىربەكقىزىنىڭ اكەسى، ياعني، قايىن اتاسى: «مەنىڭ شاڭىراعىمداعى ەڭ قىمبات مۇلكىم، الاشتىڭ ايتۋلى اقىنى، جىر الەمىنىڭ جارىق جۇلدىزى ماعجان جۇماباەۆتان قالعان جادىگەر»، دەپ سىيعا تارتسا كەرەك. سودان بەرى ۇيدەگى ءتورت قۇلاقتى ابدىرادا ساقتالىپتى.
باقبەرگەن امالبەك،
«ەگەمەن قازاقستان».
اقمولا وبلىسى.
پىكىر قالدىرۋ