ۋكراينانىڭ قازاقستانداعى ۋاقىتشا سەنىمدى وكىلى يۋري لازەبنيك استانادا “قىرىم اۆتونوميالىق رەسپۋبليكاسىنا جاسالعان باسقىنشىلىقتىڭ ەكى جىلدىعى” ماسەلەسى بويىنشا ءباسپاسوز ءماسليحاتىن وتكىزدى. تىلشىلەردىڭ سۇراعىنا جاۋاپ بەرۋ كەزىندە ول ۋكراينا قىرىمدى قايتارىپ الۋعا بەلگىلى ءبىر ۋاقىت كۇتۋ كەرەك دەگەن پىكىرىن ايتتى، – دەپ حابارلايدى Tengrinews.kz تىلشىسى.

ءباسپاسوز ءماسليحاتى كەزىندە باق وكىلدەرى لەزەبنيكتەن ۋكراينا قازىرگى جاعدايدا قىرىمدى قايتارىپ الادى دەگەن ويدىڭ قانشالىقتى اقىلعا قونىمدى ەكەنىن سۇرادى.

ۋاقىتشا سەنىمدى وكىل بۇعان جاۋاپ رەتىندە ەۋروپا پارلامەنتىنىڭ بيىلعى 4 اقپانداعى رەزوليۋتسياسىن مىسال قىلىپ كەلتىردى. “رەسەيدەن سانكتسيالاردى تۇبەگەيلى الىپ تاستاۋ – قىرىمنىڭ ۋكراينا باقىلاۋىنا قايتارىلۋى. بۇل ەۋروپالىق وداقتىڭ ەكى ابىرويلى ورگانىنىڭ ءبىرىنىڭ ۇستانىمى. ال كەلەشەگى جايلى ايتار بولساق، رەسەيدەگى قازىرگى رەجيمدە بۇل جاعدايدىڭ مۇمكىن ەمەس ەكەنى بەلگىلى”، – دەدى ول.

“رەجيم اۋىسۋى كەرەك پە؟”، – دەپ ناقتىلاپ سۇرادى تىلشىلەر.

“ارينە. بۇل مەنىڭ عانا پىكىرىم ەمەس، بۇل كوپشىلىكتىڭ جانە حالىقارالىق ساراپشىلاردىڭ، ونىڭ ىشىندە رەسەيلىك تاۋەلسىز ساراپشىلاردىڭ پىكىرى. ادامدار، رەسەيلىكتەر “كرىم ناش” دەگەن ماستىقتان تولىقتاي ايىعۋى ءۇشىن جانە سالدارى جايلى ءمان بەرىپ ويلانۋى ءۇشىن بەلگىلى ءبىر ۋاقىت كەرەك. ۋكرايناعا ءۇمىت سىيلايتىن بەلگىلەر دە پايدا بولدى. رەسەيدە ۆاليۋتالىق يپوتەكا يەلەرىنىڭ نارازىلىق قوزعالىسى قارقىن الىپ كەلەدى، ولار شەرۋلەردە “قىرىمدى قايتارىپ بەرىڭىزدەر!” دەپ ۇرانداي باستاپتى. بۇل ادامدار ۆاليۋتالىق كرەديتتەرىن بانكتەرگە قايتارا الماي وتىرعاندىقتان ۇلكەن كەدەرگىگە تىرەلىپ وتىر. بۇل پروبلەمالار سانكتسيانىڭ كەسىرىنەن بولدى”، – دەپ مالىمدەدى ول.

“قىرىمدى جاۋلاپ الۋ” حرونولوگياسىن ەسكە سالا وتىرىپ، ول وقيعانىڭ 2014 جىلدىڭ 20 اقپانىندا بولعانىن ايتتى. “بۇل كۇنى رەسەيلىك قارۋلى كۇشتەر رەسەيدىڭ وزىنەن جانە رەسەيدىڭ قىرىمدا قارا تەڭىز فلوتىنداعى بازالارىندا بولعان اسكەرى قىرىم جارتىارالىنا باسىپ كىردى”، – دەدى يۋري لازەبنيك.

سونىمەن قاتار، ول بۇل حرونولوگيانى بارلىعىنىڭ دا بىلەتىنىن جانە بۇل ماسەلەدە ۋكراينا مەن رەسەيدىڭ قاراما-قايشىلىقتارى جوق ەكەنىن اتاپ ءوتتى.

“سوڭىرا كەلگەندە رەسەيلىك باسشىلىق ءوز قارۋلى كۇشتەرىنىڭ قاجەتتى قۇرال-جابدىقتار مەن ارنايى فورمالاردى اسكەري دۇكەننەن ساتىپ العانىن، ەشقانداي دا قورعانىس جاساقتارىنىڭ بولماعانىن مويىندادى. 20 اقپاندا باسقىنشىلى باستالدى، 27 اقپاندا رەسەيلىك ارنايى جاساق قىرىمنىڭ جوعارعى كەڭەسىنىڭ عيماراتىن باسىپ الدى. رەسەيلىك ارنايى جاساقتىڭ باقىلاۋىندا قىرىمنىڭ جوعارعى كەڭەسىنىڭ دەپۋتاتارى رەفەرەندۋم وتكىزۋگە داۋىس بەردى. ول 16 ناۋرىزدا ءوتىپ، وسى ارەكەتتىڭ قورىتىندى رەتىندە رەسەي قىرىمدى ءوز قۇرامىنا قوسىپ الدى”، – دەپ قورىتىندىلادى ۋكراينانىڭ قازاقستانداعى ۋاقىتشا سەنىمدى وكىلى يۋري لازەبنيك.

tengrinews.kz