تالعات ماماشەۆ پەن عالىم مۇتانوۆتىڭ نازارىنا! سىزدەر رۋحاني مەشەۋ ادامدى قولدايسىزدار ما؟
kerey.kz
ءال-فارابي اتىنداعى قازۇۋ-دىڭ رەكتورى عالىم مۇتانوۆقا
دۇنيەجۇزى قازاقتارى قاۋىمداستىعى توراعاسىنىڭ ءبىرىنشى ورىنباسارى تالعات ماماشەۆكە
كەشە عانا ەلباسىنىڭ تىكەلەي تاپسىرماسىمەن، كۇللى قازاقستان حالقىنىڭ قولداۋىمەن ەلىمىزدە «العىس ايتۋ كۇنى» تويلانعانى بارشامىزعا بەلگىلى. الايدا ءدال وسى مەرەكەنىڭ قارساڭىندا “جەر استىنان جىك شىقتى، ەكى قۇلاعى تىك شىقتى”. بۇعان دەيىن تالعات ماماشەۆ مىرزا، ءوزىڭىز باسقارىپ وتىرعان قاۋىمداستىقتىڭ عىلىمي ءبولىمىن باسقارعان، عالىم مۇتانوۆ مىرزا، ءسىزدىڭ قول استىڭىزدا ىستەيتىن بىلدەي ءبىر دوكتوردىڭ ەل اراسىنا جىك سالۋىن قالاي تۇسىنۋگە بولادى؟
ءبىر كەزدە دۇنيەجۇزى قازاقتار قاۋىمداستىعىندا قىزمەت اتقارىپ، شەتتەن كەلگەن قانداستارىمىزدىڭ جاي-كۇيىنە قانىققان گۇلنار مەڭدىقۇلوۆانىڭ ايتىپ وتىرعان ءسوزى مىناۋ. سوندا ول كىسىنىڭ دياسپورادا ىستەي ءجۇرىپ، اتاجۇرتىن اڭساپ كەلگەن قانداستارىمىزدىڭ جان-دۇنيەسىن تۇسىنە الماعانى ما؟ الدە سىزدەردە ماماندار وسىلاي جەتىلە مە؟
ەلىمىزدىڭ بەتكە ۇستار ءبىلىم ورداسىندا، قازاق ءبىلىمىنىڭ قارا شاڭىراعىندا گۇلنار سەكىلدى رۋحاني ساۋاتسىز، ەل مۇڭىنا، قانداستىڭ جان-دۇنيەسىنە مەشەۋلىكپەن قارايتىن ماماننىڭ قىزمەت اتقارۋى قالاي؟ الدە سىزدەردىڭ قاراماقتارىڭىزدا قىزمەت اتقاراتىن دوكتور، پروفەسسورلاردىڭ ۇلت جايلى نە دەپ جاتقانى ماڭىزدى ەمەس پە؟ «ەسىكتەن ەرگەنشەك كەتسە، يتتەن ۇيات كەتەدى» دەيدى قازاق. ءازىر بۇگىن قازاقتىڭ ەسىگىنەن ەرگەنشەك كەتە قويعان جوق ەدى عوي…
قۇرمەتتى ەل نازارىندا جۇرگەن اعالار، ەل ىشىنە ىرىتكى سالىپ، از قازاقتىڭ ارا جىگىن اجىراتىپ وتىرعان گۇلنار مەڭدىقۇلوۆا حانىمنىڭ سوزىنە سىزدەر جاۋاپ بەرەسىزدەر مە، الدە “ورالمانتانۋشى” اپايىمىز ءوزى كوپشىلىكتەن كەشىرىم سۇراي ما؟ ءبىردىڭ كەسىرى مىڭعا تيمەسىن دەسەڭىزدەر، بۇنداي باسسىزدىققا جول بەرگەن تاريحشى حانىمدى جاۋاپگەرشىلىككە تارتقاندارىڭىز ءجون بولار. الدە سىزدەر مەملەكەتتىك ءتىلدى مەنسىنبەيتىن، قازاقتى ءوز ارا قىرقىستىرۋعا قۇشتار، رۋحاني مەشەۋ ادامدى قولدايسىزدار ما؟
اتا جۇرتقا الىستاعى اعايىننىڭ باسىن بىرىكتىرۋ ەلباسى – نۇرسۇلتان ءابىشۇلىنىڭ تىكەلەي باستاماسى، سول كىسىنىڭ ارنايى تاپسىرماسى ەكەنىن جاقسى بىلەسىزدەر. ال ءوز كەزەگىندە نۇرسۇلتان نازارباەۆ شەتتەن كىم كەلسە دە قۇشاق جايا قارسى الۋدى ماقسات تۇتتى. “اتاجۇرتىم شاقىردى، اشتى ەسىگىن” دەپ اڭقىلداپ جەتكەن اعايىننىڭ اياعىنان شالۋدى گۇلنار سەكىلدى “شالا موللا دىنبۇزارلارعا” تاپسىردىڭىزدار ما؟
قالاي دەگەنمەن دە، پرەزيدەنتىمىزدىڭ تىكەلەي تاپسىرماسىمەن، قولداۋىمەن قازاق ەلىنىڭ كەتىگىن بۇتىندەپ، كەمتىگىن تولتىرۋ ءۇشىن شەتتەن كەلىپ جاتقان قانداستارىمىزدى كوزگە شىققان سۇيەلدەي كورۋدى توقتاتاتىن ۋاقىت بولدى. بۇنى ءسىز بوپ، ءبىز بوپ قولعا الماساق، باسقا ەشكىم دە ىستەمەسى انىق.
ەندەشە، ەل سىيلاعان جاقسى اعالار، گۇلنار مەڭدىقۇلوۆانىڭ كوپشىلىكتەن كەشىرىم سۇراۋىن تالاپ ەتەمىن!
گۇلنار مەڭدىقۇلوۆانىڭ كىم ەكەنىن بىلگىلەرىڭىز كەلسە ونىڭ شىنىمەن نە ىستەگەن ادام ەكەنىن تالداپ جازعان ءجادي شاكەنۇلىنىڭ ماقالاسىن وسى جەردەن وقۋلارىڭىزعا بولادى. ال ءبىز شالا ءبۇلىنىپ، جوقتان وزگەگە اتتانداپ وتىر دەپ ويلاساڭىزدار، گۇلنار حانىمنىڭ “كاراۆانعا” بەرگەن سۇقباتىنىڭ قىسقاشا مازمۇنىنى مىنا جەردەن وقۋلارىڭىزعا بولادى.
“قازاق ءۇنى” اقپاراتتىق پورتالىنىڭ باس رەداكتورى ەرجان جاۋباي.
qazaquni.kz
پىكىر قالدىرۋ