kerey.kz TV جاڭالىقتار زۋقا باتىر 150 جىل مادەنيەت رۋحانيات سۋرەتتەر سويلەيدى قازاق حاندىعىنا 550 جىل ادەبي الەم الەۋمەت

“تۇعىرى بيىك ماڭگىلىك ەل”اتتى ەل تاۋەلسىزدىگىنىڭ 25 جىلدىعىنا جانە زۋقا باتىردىڭ تۋعانىنا150 جىل مەرەيتويىنا ارنالعان وبلىستىق اقىندار ايتىسى ءوتتى.

kerey.kz

 |  Apr 27, 2016

جەر جاناتى جەتىسۋدىڭ ورتالىعى تالدىقورعان قالاسىندا، 24 ءساۋىر كۇنى، تاۋەلسىزدىكتىڭ 25 جىلدىعىنا جانە  اتى تىرىسىندە اڭىزعا اينالعان زۋقا باتىر ءسابيتۇلىنىڭ  150 جىلدىق مەرەي تويىنا ارنالعان وبلىستىق اقىندار ايتىسى ءوتتى.

ايتىستى، الماتى وبلىسىنىڭ جاستار ساياساتى ماسەلەلەرى باسقارماسى، «زۋقا باتىر 150 جىل» ۇيىمداستىرۋ القاسى، وبلىستىق جاستار رەسۋرستىق ورتالىعى، الماتى وبلىسى مادەنيەت، مۇراعاتتار جانە قۇجاتتاما باسقارماسى، «جاسىل ەل» جاستار ەڭبەك جاساقتارىنىڭ  رەسپۋبليكالىق شتابى الماتى وبلىستىق فيليالى، «الاش ۇلانى» جاستار قوعامدىق بىرلەستىگى بىرىگىپ وتكىزدى.

ايتىستىڭ ماقساتى ۇلتتىقونەردىڭ اياسىن كەڭەيتۋ، تالانت يەلەرىن ىزدەپ تابۋ، اقىندىقونەرگە باۋلي وتىرا، عاسىرلار بويى بابالار ارمانىمەن، ەرلىك ىستەرىمەن، تاۋەلسىزدىك جىلدارىندا قول جەتكىزگەن قۇندىلىقتاردى دارىپتەپ، مەملەكەتتىلىكتى نىعايتىپ، جاس ۇرپاقتى وتان سۇيگىشتىككە، ۇلتجاندىلىققا تاربيەلەي وتىرا، ەلدەگى حالىقتار دوستىعىن، بەرەكە-بىرلىكتى جانە ساياسي تۇراقتىلىقتى دارىپتەۋ، ەلىمىزدىڭالەم الدىنداعى ابىروي-بەدەلىن اسقاقتاتا كورسەتۋ. ەل تاۋەلسىزدىگىن جالىندى جىرلار، تەرەڭ تەڭەۋلەر، اسەم اۋەندەر ارقىلى جان-جاقتى جىرلاۋ. زۋقا بابامىزدىڭ رۋحىن قاستەرلەپ، ءتول ونەردىڭ ماڭگىلىك عۇمىرى جايلى ءداستۇر جالعاسىن ساقتاي وتىرىپ، ۇرپاقتان-ۇرپاققا كەڭىنەن ناسيحاتتاۋ ەدى.

ايتىستىڭ باستالۋ ءسوزىن “زۋقا باتىر 150 جىل” مەرەي تويىن ۇيىمداستىرۋ القاسىنىڭ  توراعاسى ءومىرحان التىننىڭ  گەرمانيادان ارنايى جولداعان قۇتتىقتاۋىمەن  ورنىباسارى نۇرلان بيبرال باستادى. وبلىستىق جاس وتان جاستار قاناتىنىڭ اتقارۋشى حاتشىسى، الماتى وبلىستىق ماسليقات دەپۋتاتى ايدىن نۇرمۇحامبەتوۆ ارنايى كەلىپ قۇتتىقتاۋ ءسوزىن ايتتى. زۋقا باتىر تۋرالى بەينە سيۋجەت كورسەتىلدى.

وبلىستاعى اۋدان-قالالار  جانە الماتى قالاسىنان بارلىعى 14 اقىن  قاتىستى.  ايتىس سۇيەر قاۋىم الدىندا 7 جۇپ ونەر كورسەتتى. ءوزارا ءسوز قاعىستىرىپ، ەر زۋقانىڭ ەل باسىنا كۇن تۋعاندا، جۇرتىنا پانا بولىپ، حالىقتى بىرىكتىرە بىلگەن، جاۋعا قارسى باس كوتەرگەن باتىرلىعىن جىرلادى. ءباھادۇر بابالاردىڭ ارقاسىندا ازاتتىققا قول جەتكىزىپ، بۇگىندە ەگەمەندىگىمىزدىڭ 25 جىلدىق تويىن تويلاپ جاتقانىمىزدى ماقتانىش ەتتى. ورەلى ءسوز ايتىپ، ادەمى ايتىس جاساي ءبىلدى. قازىلار شەشىمىمەن فينالدىق كەزەڭگە 2 جۇپ سۋرىلىپ شىعىپ، شاپپا-شاپ ايتىس ۇلگىسىن كورسەتتى. 

جىر بايگەسىندە وزا شاپقان كوكسۋ اۋداننىڭ اقىنى العىسبەك داۋرەن 150 مىڭ تەڭگەلىك باس جۇلدەنى ەنشىلەسە، ءبىرىنشى ورىندى اقسۋلىققانات بوقان جەڭىپ السا، ەكىنشى ورىندى تەكەلى قالاسىنىڭ اقىن قىزى ءجاميلا ورازبايقىزى ەنشىلەدى. ءۇشىنشى ورىندى  ەسكەلدى اۋداننان كەلگەن فاتيح اقىنۇلى الدى.باسقا قاتىسۋشى اقىندار ىنتالاندىرۋ سيلىعىمەن ماراپاتتالدى.

الامان ايتىستى تاماشالاۋعا جينالعان قاۋىمنىڭدا قاراسى مول بولدى. زۋقا باتىر اتىنداعى ايتىس وتەدى دەگەندى ەستىگەن ءتول ونەرىمىزدىڭ جاناشىرلارى ەڭكەيگەن كارىدەن، ەڭبەكتەگەن جاسعا دەيىن ءىلياس جانسۇگىروۆ اتىنداعى مادەنيەت سارايىنا جينالدى. الماتى قالاسىنان ارنايى كەلگەن قوناقتار اراسىندا ونەر جۇلدىزدار مەن قوعام قايراتكەرلەرى بولدى.

ايتىس مارەسىنە جەتكەن سوڭ، “زۋقا باتىر 150 جىل” مەرەي تويىن ۇيىمداستىرۋ القاسى، ۇيىمداستىرۋعا بەلسەنە اتسالىسقان ازاماتتارمەن، جەڭىمپازدارعا جانە قازىلار القاسىنا ارنالىپ داستارقان جايدى. باتىر اتامىزعا ارنالىپ قۇران وقىلدى. بارلىق قاتىسۋشىلارعا “زۋقا باتىر 150 جىل” مەرەي توي ۇيىمداستىرۋ القاسى اتىنان قازاقستان بويىنشا توراعانۇربەك نۇراحمەتتىڭ العىسى ايتىلدى. الماتىدان  “زۋقا باتىر 150 جىل” مەرەي تويىن ۇيىمداستىرۋ القاسى  توراعا  ورنىباسارى نۇرلان بيبرال،باتىر اتا ۇرپاقتارى قالمان قوچيگىت، ومىبەك مانەن، توقان ماكەي، قوعام قايراتكەرى ساعات زاقانقىزى، ونەر قايراتكەرلەرى ءانشى قۇرمانبەك پەن ريزا،ساۋلەش دۇيسەن، جاۋاپتى قاتشى جۇماباي ءمادىبايۇلى،«الاش ۇلانى» جاستار قوعامدىق بىرلەستىگى جەتەكشىسى بالعىنبەك نىعىمەتۇلى قاتارلى ازاماتتار قاتىسىپ قايتتى.

زۋقا باتىر- 1866 جىلى قازىرگى شىعىس قازاقستان وبلىسىنىڭ زايسان ايماعىندا دۇنيەگە كەلگەن. زۋقانىڭ اكەسى شىعىس وڭىرىنە اسا تانىمال بولعان ءسابيت داموللا. ارعى اتاسى نۇرمۇحاممەد ابىز. تەكتى اۋلەتتەن شىققان باتىر بابامىز، ورىس وتارشىلدىعى مەن گومينداڭ قىتاي ەزگىسىنە تاپ بولعان قازاق حالقىن ازات ەتۋ جولىندا قازا تابادى. بيىل باتىر بابامىزدىڭ تۋعانىنا 150 جىل تولدى.

ەسكە الۋ شارالارى قازاقستان، گەرمانيا، اۆستريا، انگليا، امەريكا، تۇركيا، قىتاي، موڭعىليا سىندى 10 شاقتى ەلدە جۇرگىزىلەدى.

جۇماباي ءمادىبايۇلى
kerey.kz

kerey.kz