قالىڭ قازاققا كەيكى باتىر دەگەن اتپەن تانىس نۇرماعامبەت كوكەمبايۇلىنىڭ باس سۇيەگى بۇگىن رەسەي استاناسىنان قازاقستانعا اكەلىندى. بۇل تۋرالى “ەگەمەن قازاقستان” سايتى حابارلادى.
وسىعان دەيىن بەلگىلى ساياساتكەر بەرىك ابدىعالي مىرزا “فەيسبۋك” جەلىسىندەگى جەكە پاراقشاسىندا باتىردىڭ باسىن الىپ كەلە جاتقاندىعىن جازعان بولاتىن.
ساياساتكەردىڭ ايتۋىنشا استانا ۋاقىتىمەن ەرتەڭ تاڭعى ساعات 04:50-دە 1916 جىلعى ۇلت ازاتتىق كوتەرىلىسىنىڭ قاھارمانى كەيكى باتىردىڭ (نۇرماعامبەت كوكەمبايۇلىنىڭ) باس سۇيەگى ارنايى بورتپەن استاناعا جەتكىزىلدى.
سونداي-اق، جەرلەۋ ءراسىمىن ۇيىمداستىرۋ ءۇشىن ۇكىمەت جانىنان ارنايى كوميسسيا قۇرىلاتىنى دا ءمالىم بولدى.
ايتا كەتەيىك، بيىلعى جىلدىڭ مامىر ايىندا قر مادەنيەت جانە سپورت ءمينيسترى ارىستانبەك مۇحامەديۇلى باتىر بابامىزدىڭ باس سۇيەگى ەلگە قايتارىلاتىنى تۋرالى حابارلاعان بولاتىن.
“قازىر ءبىز بۇل ماسەلەنى شەشە الامىز. رەسەيدەن كەلىسىم كەلدى. ءبىزدىڭ عالىمدار دا كەرەك مالىمەتتەردى جيناپ قويدى. تەك ونى اكەلۋدىڭ تەحنيكالىق پروتسەدۋرالارىن شەشۋ عانا قالدى”, – دەگەن بولاتىن مينيستر مىرزا.
كەيىن ءوزىنىڭ رەسەيلىك ارىپتەسىمەن ماسكەۋدە كەزدەسكەن ەكس-پرەمەر-مينيستر كارىم ءماسىموۆ تە كۋنسكامەرادا جاتقان قازاقتىڭ سوڭعى حانى كەنەسارى مەن كەيكى باتىردىڭ باس سۇيەگىن ەلگە قايتارۋ ماسەلەسىن تالقىلايتىنىن مالىمدەگەن.
كەيىن كارىم مىرزانىڭ رەسەي پرەمەرىمەن كەزدەسۋىندە تەك كەيكى باتىردىڭ سۇيەگى تۋرالى ءسوز قوزعالعانىن جانە كەلىسسوزدەردىڭ وڭ ناتيجە بەرگەنىن ايتقانى دا ەسىمىزدە.
ايتسە دە رف باسشىلارى كەيكىنىڭ باسىن قايتارۋعا سوناۋ مامىردا كەلىسىمدەرىن بەرگەنىن ەسكەرسەك، بۇل ماسەلەگە قاتىستى 25 جىلدا جاق اشپاعان ەكس-پرەمەردىڭ پارمەنى سەبەپ بولدى دەۋ قيسىنسىزداۋ، راس. دەگەنمەن، “ازاتتىق جولىندا مەرت بولعان باتىردىڭ باسى ەلگە قايتارامىن” دەگەن ۋاعدا ءسوز جۇرت ىشىندە بەدەلى تۇسە باستاعان كارىم قاجىمقانۇلىنا ۇپاي جيناپ بەردى دەسەك تە جالعان ايتپاعان بولار ەك.
وسىعان دەيىن قازاقستان تاريحشىلارى بابالارىمىزدىڭ باس سۇيەكتەرىن ەلگە قايتارۋ ماسەلەسىن قوتارا-قوتارا كوتەرگەنىمەن ەش ناتيجە بولماعان ەدى.
قوس-قوسىنان وداقتاس بولىپ وتىرعان رەسەيدىڭ توپىراعىندا ەندى، حان كەنەنىڭ باسى قالدى. الەمدىك گەوساياساتتا ىرگەلەسىپ، ءتۇرلى جاعدايلاردا رەسەيگە ءام ونىڭ ساياسي باستامالارىنا دەمەۋشى بولىپ كەلە جاتقان قازاقستاننىڭ جانە ونىڭ نەگىزىن قۇرۋشى قازاق ۇلتىنىڭ تاعى ءبىر ۇلى كەنەسارى حاننىڭ باس سۇيەگىن قايتارۋ ماسەلەسى كۇن تارتىبىندە بولۋى تالاپ!
نۇرزات توعجان
Abai.kz
پىكىر قالدىرۋ