قازاقستا رەسپۋبليكاسىنىڭ
پرەمەر-ءمينيسترى ب.ءا.ساعىنتاەۆقا
قۇرمەتتى باقىتجان ءابدىرۇلى!
الداعى، 2017 جىلى – الاش ۇلتتىق اۆتونومياسىنىڭ، الاش پارتياسىنىڭ جانە الاش وردا ۇكىمەتىنىڭ قۇرىلعانىنا 100 جىل تولادى. بۇل – ۇلتتىق-دەموكراتيالىق قوزعالىس تاريحىنداعى ەلەۋلى كەزەڭ. الاش قوزعالىسىنىڭ ۇستانىمدارى قازاق مەملەكەتتىگىن ماقسات ەتتى. بىراق، ازاتتىقتىڭ جارشىسى بولعان ءاليحان بوكەيحان باستاعان الاش قايراتكەرلەرىنە كوزدەگەن ماقساتتارىنا جەتۋگە مۇمكىندىك بولمادى. الاش ارىستارىنىڭ ەڭ باستى ەڭبەگى – ولار زاماننىڭ قيىنشىلىقتارىنا قاراماستان ەل ەركىندىگىنە اتسالىسىپ، قولدان كەلگەننىڭ ءبارىن جاسادى. سول جولدا ولار قانىن دا، جانىن دا اياعان جوق.
دەگەنمەن، بوستاندىق جولىندا قۇربان بولعان الاش ارىستارىنىڭ ەڭبەگى مەن ەرلىگى زايا كەتكەن جوق. ولاردىڭ ارمان-ماقساتتارى بۇگىنگى تاڭدا ورىندالدى. بۇگىنگى تاۋەلسىز قازاقستان وعان دالەل. الاش قايراتكەرلەرىنىڭ تاجىريبەسى ەلباسى ايقىنداپ بەرگەن «ماڭگىلىك ەل» پاتريوتتىق اكتىسىمەن ۇندەسىپ جاتىر. پرەزيدەنتىمىز ن.ءا.نازارباەۆ ءوزىنىڭ «تاريح تولقىنىندا» ەڭبەگىنىڭ «الاش مۇراسى جانە وسى زامان» اتتى تاراۋىندا «حح عاسىردىڭ باسىنداعى قازاق قوعامىندا زيالى قاۋىم قالىپتاسۋىنىڭ ۇرپاقتار ەستافەتاسى سياقتى سيپاتى بولعانىن اتاپ ايتقان ابزال» دەپ كورسەتكەن بولاتىن.
ەندەشە، «الاشتىڭ» 100 جىلدىعىن ەل ومىرىندەگى ماڭىزدى تاريحي وقيعا رەتىندە باعالاپ، جاس ۇرپاقتى وتانسۇيگىشتىككە، مەملەكەتشىلدىككە تاربيەلەۋدىڭ بىردەن-ءبىر جولى دەپ ساناپ، ونىڭ دايىندىعىنا ۇكىمەتتى، باسقا دا مەملەكەتتىك ورگاندار مەن قوعامدىق ۇيىمداردى قازىردەن كىرىسۋگە شاقىرامىز.
ونى وتكىزۋدى سالماقتى ءارى ساپالى دايىندىقپەن جوسپارلاۋ قاجەت دەپ سانايمىز. «اق جول» فراكتسياسى قازاقستان رەسپۋبليكاسى ۇكىمەتىنە، قازاق حالقىنىڭ بوستاندىعى ءۇشىن ايانباي ەڭبەك ەتكەن الاش قايراتكەرلەرىن لايىقتى ۇلىقتاۋعا ارنالعان تانىمدىق ءىس-شارالار بەلگىلەپ، ىسكە اسىرۋدى ۇسىنادى.
وسى ۇسىنىسىمىزدى ەسكەرە وتىرىپ، كوتەرىلگەن ماسەلەگە وراي ۇكىمەت تاراپىنان قابىلداناتىن شارالار جونىندە حاباردار ەتۋىڭىزدى سۇرايمىز.
قۇرمەتپەن،
«اق جول» قدپ پارلامەنتتىك
فراكتسياسىنىڭ دەپۋتاتتارى
ا.پەرۋاشەۆ
ە.بارلىباەۆ
ە.نيكيتينسكايا
ك.ابساتيروۆ
ب.دۇيسەنبينوۆ
د.ەسپاەۆا
م.قازبەكوۆا
Abai.kz
پىكىر قالدىرۋ