قازاقستاندا جيىن-تەرىن ناۋقانى اياقتالىپ كەلەدى. بۇل – اۋىل ەڭبەككەرلەرى، اگروونەركاسىپ كەشەنى جانە بۇكىل ەلىمىز ءۇشىن ازىق-تۇلىك قاۋىپسىزدىگىنىڭ دەڭگەيىن ايقىن كورسەتەتىن اسا ماڭىزدى وقيعا.

بيىلعى ناۋقان ناتيجەسىن تاۋەلسىزدىكتىڭ 25 جىلدىعىنا تاماشا تارتۋ دەپ باعالاۋعا بولادى. ويتكەنى، بۇل جولى جينالعان استىق مولشەرى – وسى كەزەڭدەگى ەڭ ءىرى جەتىستىكتىڭ ءبىرى.

استىقتىڭ جالپى كولەمى 23 ميلليون توننادان استى،  بۇل – بىلتىرعىدان ءبىر جارىم ەسەدەي ارتىق كورسەتكىش.

اقمولا، سولتۇستىك قازاقستان جانە قوستاناي وبلىستارىنىڭ ديقاندارى 5 ميلليون توننادان استام استىق الدى. قاراعاندى وبلىسىندا ميلليون توننادان استام استىق جينالىپ، بۇرىن-سوڭدى بولماعان كورسەتكىشكە قول جەتكىزىلدى.

اۋىل شارۋاشىلىعى سالاسىنداعى وزگە ءداندى داقىلدار بويىنشا دا جيىن-تەرىن ناۋقانىنىڭ ناتيجەلەرى كوڭىل قۋانتىپ وتىر. قىزىلوردا وبلىسىندا كۇرىشتەن رەكوردتىق ءونىم الىندى. الماتى، جامبىل جانە وڭتۇستىك قازاقستان وبلىستارىندا كوكونىس پەن باۋ-باقشا داقىلدارىنىڭ ونىمدىلىگى ەداۋىر ارتتى. مايلى داقىلدار كولەمى 1,2 ەسە ۇلعايىپ، سوڭعى بەس جىلداعى ەڭ جوعارى كورسەتكىشكە جەتەدى دەپ بولجانۋدا.

وسىنىڭ بارلىعى مەيلىنشە مول تەر توگۋدى، ۇدايى قامقورلىقتى، زور قاجىرلىلىقتى، ءبىلىم مەن تاجىريبەنى تالاپ ەتەتىن سالانىڭ ءبىرى – ەگىن شارۋاشىلىعىنىڭ تابىستى دامىپ كەلە جاتقانىن داۋسىز دالەلدەيدى. بۇل سالاداعى ازاماتتاردىڭ ءبارىن قۇتتىقتاپ، بىردەن جەمىس بەرە قويمايتىن جەر توسىندەگى بەينەتتى ەڭبەكتەرى ءۇشىن زور العىس بىلدىرەمىن.

وتكەن شيرەك عاسىر ىشىندە اۋىل شارۋاشىلىعىنىڭ قالاي وركەندەگەنىن، قازاقستاننىڭ اگرارلىق دەرجاۆا رەتىندەگى ءوز جاعدايىن جاقسارتىپ قانا قويماي، ازىق-تۇلىك نارىعىنداعى جاڭا بەلەستەردى يگەرىپ كەلە جاتقانىن كورىپ وتىرمىز.

وسى جىلداردا مەملەكەتىمىز اگروونەركاسىپ كەشەنىنە جۇيەلى تۇردە قولداۋ كورسەتۋدىڭ ءتيىمدى مۇمكىندىگىن تاپتى. قازىر ول ستراتەگيالىق باسىمدىق رەتىندە قاراستىرىلىپ وتىر.

ءبىز بىرلەسە كۇش جۇمىلدىرىپ، حالقىمىزدىڭ ءوسىپ-وركەندەۋىنە سەپتىگىن تيگىزەتىن، تۋعان ولكەمىزدىڭ شىنايى الەۋەتىن كورسەتەتىن اۋىل شارۋاشىلىعىن جاڭعىرتۋدامىز.

قازىرگى زاماندا جوعارى تەحنولوگيالى قۋاتتى اگروونەركاسىپ كەشەنى ەلدىڭ الەۋمەتتىك-ەكونوميكالىق دامۋىنىڭ ولشەمى بولىپ سانالادى.

ءبىز قازاقستاندا ديقانداردىڭ ادال ەڭبەگى بارىنشا باعالانىپ، اۋىل شارۋاشىلىعى ينۆەستيتسياعا قولايلى، جاڭا جوبالارعا، جاستارىمىزدىڭ كۇش-قۋاتىنا ءورىس اشاتىن پەرسپەكتيۆالى سالاعا اينالۋى ءۇشىن بارلىق جاعدايدى جاسايمىز.