24 jastağı önerpaz «Altın Orda» küyin şığardı
kerey.kz
Nwr – Swltan qalası äkimdiginiñ memlekettik akademiyalıq filarmoniyasınıñ “Qorqıt” etno-ansambliniñ önerpazdarı jan-jaqtı önerlerimen tanıluda. Tayauda ğana Ginnestiñ Rekordtar kitabına engen önerli ansambl' qazaqtıñ öner qorjının dombıranıñ kümbirimen ündesken tağı da bir tuındımen tolıqtırmaq. Küy – tarihi sipatqa ie. Onıñ avtorı men orındauı da şığarmaşılıq top üşin aytarlıqtay jañalıqqa aynaları sözsiz.
Jiırma tört jastağı dombıraşı, äri toptıñ koncertmeystri Aybek Ärimbek Prezidentimiz Qasım-Jomart Toqaev Kemelwlınıñ Altın Ordanıñ 750 jıldığın ötkizu turalı halıqqa jariya etkenin estigen soñ, soğan arnap küy şığaru turalı oy kelgenin aytadı. Dombıramen qatar şañqobız, sıbızğı aspaptarın da jaqsı meñgergen küyşiniñ aytuınşa alğaşqı tuındı bir jetiniñ işinde tuğan.
-”Küy öte jıldam temppen orındaladı. Bwdan qazaq batırlarınıñ beynesin köruge boladı. Jalpı, jastarımızğa patriottıq ruh beru üşin şığarılğan dünie. Üş bölimmen twratın küy şamamen eki minutqa sozıladı”,- deydi Aybek Kenjebaywlı.
Alda ötetin aytulı keşte Aybektiñ «Altın Orda» küyi twñğış ret orındaladı. Şığarmanı avtordıñ jalğız özi ğana emes, “Qorqıt” etno-ansambli paş etpek. Top jetekşisi Şolpan Qorğanbek jas talanttıñ tuındısın joğarı bağalap, ansambl'ge layıqtap öñdep şıqqan.
Almatı oblısı Kerbwlaq audanı, Qaraşoqı auılınıñ tuması, 24 jastağı önerpaz şığarmaşılıqqa 14-15 jasınan bastap bet bwra bastaptı.
– Äkem üyirmege qatısıp, dombıraşı bolğanımdı qalaytın. Bastapqı kezde dombırağa degen müldem qızığuşılığım bolğan joq. Bir küni teledidardan dombıraşı, «Darın» memlekettik jastar sıylığınıñ laureatı Mwrager Sauranbaev ağamızdıñ jeke koncertin körip qaldım. Koncert ayaqtalğan soñ barşa körermen qol soğıp, jılı lebizin bildirip jattı. Dombıraşınıñ talantı, şertken küyiniñ kümbiri jüregime öte qattı äser etti. Bwl jağday üydegi qara dombırağa degen mahabbatımdı oyatıp, közqarasımnıñ özgeruine sebepker oqiğağa aynaldı. Söytip dombırağa erekşe ıqılaspen äuestene bastadım. Meniñ bwl qızığuşılığım äkemdi de erekşe quanttı. Bwğan deyin tañdap jürgen bağdarlamalau mamandığına degen maqsatım jüregimniñ qalauı jäne äkemniñ aq batasımen öner jolına qaray oyısa berdi. 2011 jılı Almatı qalasındağı P.Çaykovskiy atındağı Almatı muzıkalıq kolledjine küyşi,prezident stipendiyasınıñ iegeri Aqbasov Sayat Qırğızbaywlınıñ sınıbına tüsip, onı tämamdağan soñ Nwr-Swltan qalasındağı Qazaq wlttıq öner universitetindegi dästürli öner fakul'tetiniñ «Dombıraşı» mamandığın professor, QR eñbek siñirgen qayratkeri,kompozitor Orınbay Düysen Käriğwlwlınıñ sınıbında oqıp şıqtım”,- deydi küyşi.
Bwğan deyin qazaqstandıq jäne şeteldik tuındılardı orındap, öner körsetip jürgen jas darın öz şığarmaşılığınıñ twsaukeser sätine degen qobalju men tolqınıs boyın ayrıqşa bilep jürgenin aytadı.
Pikir qaldıru