Ukraina sırtqı ister ministri Dmitriy Kuleba Azattıqtıñ Ukrain qızmetine (Radio Svoboda) bergen swhbatında Euroatlantika qauipsizdiginiñ bolaşağı jaylı pikirin ayttı.
“Euroatlantika qauipsizdiginiñ bolaşağı Ukrainada şeşilip jatır. Jäne däl qazir mwnı negizgi astanalar tüsindi. Älemniñ özge böliginde bolıp jatqannıñ barlığı – periferiya. Bwl mañızdı, mwnı tüsinu, esepke alu qajet, biraq qazir biz ortalıqpız” dedi miinistr.
Onıñ sözinşe, Kiev älemdik diplomatiya ortalığına aynalğan, al älem Ukrainada bolıp jatqan jağdaydı jiti baqılap otır.
Bwğan qosa ministr, Resey men Qazaqstan özderiniñ “tez äri qatañ” äreket ete alatının körsetti deydi. Sondıqtan sol aymaqtağı poziciyaların küşeytkenin atap ötti.
“Äskeri tilmen aytqanda, bwl Reseydiñ wjımdıq qauipsizdik şartı wyımı (WQŞW) ayasında jıldam äreket ete alatının körsetken jergilikti operaciya boldı. Qazaqstandağı jağdaydı twraqtandıru üşin WQŞW küşteriniñ qajeti boldı ma degenge toqtalmay-aq qoyayın, biraq Resey tez äri qatañ äreket ete alatının sezdirdi. Onı tek Vaşington emes, Pekin de körip, estidi. Mwnday şaradan keyin bwl aymaqta Resey poziciyası küşeye tüseri anıq” dedi Kuleba.
2 qañtarda Jañaözen twrğındarı eki ese qımbattağan swyıltılğan gaz bağasın tömendetudi talap etip mitingige şıqtı. Keyin Jañaözendi qoldağan beybit miting legi bükil Qazaqstandı qamtıdı. Ekonomikalıq mäselelermen birge sayasi talaptar kötergen jwrt bwrınğı prezident Nwrswltan Nazarbaevtıñ sayasatqa mülde jolamauın, onıñ öz ornına prezident etip qaldırğan Qasım-Jomart Toqaevtıñ qızmetten ketuin, elde sayasi reformalar jürgiziluin talap etti.
5 qañtardan bastap bilik “destruktivtik küşterdi” jeleu etip, halıqqa qarsı qaru qoldana bastadı. Ükimet Almatığa şetelde dayındıqtan ötken-mıs “20 mıñ terrorist” şabuıldağanın mälimdegen. Prezident Qasım-Jomart Toqaev WQŞW-dan äskeri kömek swradı.
Bilik orındarı aymaqtarda “terrorğa qarsı operaciyalar” bastalğanın habarlap, prezident küş qwrılımdarına “eskertpesten oq atıp, joyudı” tapsırdı.
Qazaqstanğa WQŞW äskerin kirgizu eldiñ işinde de, sırtında da qattı sınğa qaldı. Äskeri kirgizudi ayıptağan akciyalar osı wyımğa müşe elderdiñ keybiriniñ astanasında ötti.
7 qañtarda Resey qorğanıs ministriligi negizinen reseylik äskerilerden twratın WQŞW bölimşeleri Qazaqstanda “alğa qoyğan mindetti atqaruğa kiriskenin” habarladı. 11 qañtarda prezident Toqaev Resey bastağan äskeri al'yans küşteriniñ eldegi missiyasya ayaqtalğanın, olardıñ 13 qañtardan Qazaqstannan kete bastaytını, on künde tolıq şığıp ketetinin mälimdedi. Qazaqstan biligi men Resey qorğanıs ministrligi 19 qañtarda WQŞW küşteri Qazaqstannan tügel şığıp ketti dep jariyaladı.
Resmi mälimet boyınşa, qañtar oqiğası kezinde kemi 227 adam, sonıñ işinde küş qwrılımdarınan 19 adam mert bolğan. Bilik ölgenderdiñ keybirin “qarulı banditter” men “terrorister” dep atap, tärtipsizdikterge solar kinäli dep mälimdedi. Biraq oğan dälel körsetpegen. Bilik qañtar qırğını kezinde mert bolğandar arasında beybit twrğın sanı qanşa ekenin äli künge aytpay otır.
Pikir qaldıru