Ukraina äskeri 5 qañtarda Reseydiñ Kursk oblısında jaña şabuılğa şıqtı. Bwl turalı Ukraina şeneunikteri men Reseydiñ z-blogerleri jazıp jatır. Qazir Kursk oblısındağı ahual qanday? Ukraina nege Kursk oblısında qayta şabuılğa şıqtı? 

KURSK OBLISINDA QAZİRGİ AHUAL

Ukraina keñsesiniñ basşısı Andrey Ermak 6 qañtarda “Kursk oblısınan jaqsı jañalıq, Resey sazayın tartıp jatır” dep jazdı. Al Ukraina wlttıq qauipsizdik qızmetiniñ jalğan aqparatpen küres ortalığınıñ jetekşisi Andrey Kovalenko Kursk oblısında birneşe bağıtta şabuıl jürip jatqanın ayttı.

Z-kanaldardıñ jazuınşa, qazir şayqas Puşkarnoe, Leonidovo jäne Tetkino auılında jürip jatır. Bwl auıldar Ukrainanıñ baqılauındağı Sudja qalasına jaqın ornalasqan. Kreml'şil blogerler Kursk oblısında ketip bara jatqan ukrainalıq kolonna degen videolar men fotolar da jariyaladı.

Al Kursk oblıs basşısınıñ mindetin atqaruşı Aleksandr Hinşteyn şabuıl jaylı eşteñe jazbaudı, tek qorğanıs ministrliginiñ aqparatına senuge şaqırdı. Biraq Resey qorğanıs ministrligi Kursk oblısındağı jaña şabuıl jaylı 7 qañtarğa deyin eşqanday mälimdeme jasamadı. Hinşteyn Ukrainanıñ şabuıldauşı tobınıñ betin qaytardıq deydi. Kursk oblısında soğısıp jürgen “Ahmat” tobınıñ komandiri Apti Alaudinov ta Ukrainanıñ şabuılına toytarıs berdik dep otır.

“Qazirge deyin Sudja bağıtında üş şabuıl boldı. Üş şabuılğa qoldanılğan tehnikalardıñ 13-i bir künde joyıldı. Olardıñ arasında tört tank bar, basqaları aytuğa twrmaytın tehnikalar” deydi Alaudinov.

Ukraina prezidenti Vladimir Zelenskiy 6 qañtarda Kurskidegi şayqasqa bes ay tolğanın aytıp, bwl maydandağı “Reseydiñ şığını köp ekenin” mälimdedi.

– Kursk oblısındağı bufer aymaqtı wstap, Reseydiñ äskeri potencialın joyıp jatırmız. Kursk operaciyası bastalğalı bwl bağıtta jauımız 38 mıñ soldatınan ayırıldı, onıñ işinde 15 mıñ soldat öltirildi, – dedi ol.

Soğıs uaqıtında taraptardıñ mälimdemelerin täuelsiz derekközder arqılı tekseru qiın.

Ukrainanıñ Kursk oblısında jaña şabuıl bastalğan soñ Reseydiñ Har'kov oblısındağı qarqını azayğan. Bwl turalı Har'kov aymağında soğısıp jürgen ukrainalıq äskeriler Reuters agenttigine aytqan.

– Qazir jağday özgerdi, atıs azaydı. Bwğan Kursk operaciyası sebep dep oylaymın. Ukraina qarulı küşteri Kursk oblısında şabuılğa şıqqan soñ jaudıñ artilleriya jäne raketamen atqılauı jeltoqsanmen salıstırğanda qısqardı, – deydi “Gefest” (laqap atı) degen ukrainalıq äskeri.

“RESEY ÜŞİN KÜTPEGEN ŞABUIL”

Ukrainadağı soğıstı täuelsiz baqılap otırğan reseylik äskeri sarapşı YAn Matveev “bwl Resey üşin aytarlıqtay kütpegen şabuıl boldı” dep topşılaydı.

– Sebebi Kursk oblısında biraz tınış edi, ol jaqtağı maydan da ülken emes. Bwğan qosa Ukraina äskerinde adam men tehnika tapşı bolıp jattı. Sondıqtan Ukrainadan belsendi şabuıldı eşkim kütpegeni anıq. Osı twsta biz aldın ala dayındalğan, köp tehnikamen twtqiıldan iri şabuıldı körip otırmız. Demek Ukrainanıñ maqsatı da mañızdı bolğanı, – deydi äskeri sarapşı “Nastoyaşee vremya” telearnasına.

Al izrail'dik äskeri sarapşı David Gendel'man Azattıqtıñ Ukrain qızmetine “Ukrainanıñ bwl şabuılına birneşe sebep boluı mümkin” deydi.

– Qazir Ukrainanıñ äskeriniñ aldında Kursk oblısındağı platcdarmdı wstap twru tapsırması bar. Al basıp alğan jerlerdi tek qorğanıspen wstap twru qiın. Küzde Ukraina äskeriniñ Kursk oblısında baqılauğa alğan jerleriniñ birazı Reseyge qayttı. Sondıqtan bwl bağıtta qayta şabuılğa şığudı tüsinuge boladı. Bwl Resey äskeriniñ nazarın bwru taktikası da boluı mümkin. Al negizgi şabuıl basqa bağıtta bolıp qaluı da mümkin. Ukraina äskeriniñ bas komandiri Sırskiy jıl soñında qarımta şabuıl boladı degen. Bälkim qazir körip otırğanımız sol qarımta şabuıl boluı mümkin.

Ukraina Reseydiñ Kursk oblısına 6 tamızda şabuıl bastap, qırküyektiñ basına deyin şamamen mıñ şarşı şaqırım jerdi basıp alğan. Keyin Resey qarımta şabuılğa şığıp, Ukraina baqılauındağı jerdiñ jartısın qaytarğan edi. Resey negizgi äskerin Ukrainanıñ Donbass aymağına salıp, Kursk oblısına Soltüstik Koreyadan äskeriler alıp kelgeni aytılğan.

Zelenskiy qañtardıñ basında Kursk oblısında Soltüstik Koreyanıñ 3800 soldatı jaralandı ya qaza taptı degen. AQŞ memlekettik hatşısı Entoni Blinken Seulge kelgende Kursk oblısında Soltüstik Koreyanıñ mıñnan asa äskerii qaza taptı ne jaralandı dep mälimdegen.

Blinken “Ukraina qarulı küşteriniñ Kursk oblısındağı poziciyası mañızdı, sebebi bwl 2025 jılı boluı mümkin kelissözde sözsiz esepke alınadı” deydi.

Azat Europa / Azattıq radiosı