ۋكراينا اسكەرى 5 قاڭتاردا رەسەيدىڭ كۋرسك وبلىسىندا جاڭا شابۋىلعا شىقتى. بۇل تۋرالى ۋكراينا شەنەۋنىكتەرى مەن رەسەيدىڭ z-بلوگەرلەرى جازىپ جاتىر. قازىر كۋرسك وبلىسىنداعى احۋال قانداي؟ ۋكراينا نەگە كۋرسك وبلىسىندا قايتا شابۋىلعا شىقتى؟
كۋرسك وبلىسىندا قازىرگى احۋال
ۋكراينا كەڭسەسىنىڭ باسشىسى اندرەي ەرماك 6 قاڭتاردا “كۋرسك وبلىسىنان جاقسى جاڭالىق، رەسەي سازايىن تارتىپ جاتىر” دەپ جازدى. ال ۋكراينا ۇلتتىق قاۋىپسىزدىك قىزمەتىنىڭ جالعان اقپاراتپەن كۇرەس ورتالىعىنىڭ جەتەكشىسى اندرەي كوۆالەنكو كۋرسك وبلىسىندا بىرنەشە باعىتتا شابۋىل ءجۇرىپ جاتقانىن ايتتى.
Z-كانالداردىڭ جازۋىنشا، قازىر شايقاس پۋشكارنوە، لەونيدوۆو جانە تيوتكينو اۋىلىندا ءجۇرىپ جاتىر. بۇل اۋىلدار ۋكراينانىڭ باقىلاۋىنداعى سۋدجا قالاسىنا جاقىن ورنالاسقان. كرەملشىل بلوگەرلەر كۋرسك وبلىسىندا كەتىپ بارا جاتقان ۋكراينالىق كولوننا دەگەن ۆيدەولار مەن فوتولار دا جاريالادى.
ال كۋرسك وبلىس باسشىسىنىڭ مىندەتىن اتقارۋشى الەكساندر حينشتەين شابۋىل جايلى ەشتەڭە جازباۋدى، تەك قورعانىس مينيسترلىگىنىڭ اقپاراتىنا سەنۋگە شاقىردى. بىراق رەسەي قورعانىس مينيسترلىگى كۋرسك وبلىسىنداعى جاڭا شابۋىل جايلى 7 قاڭتارعا دەيىن ەشقانداي مالىمدەمە جاسامادى. حينشتەين ۋكراينانىڭ شابۋىلداۋشى توبىنىڭ بەتىن قايتاردىق دەيدى. كۋرسك وبلىسىندا سوعىسىپ جۇرگەن “احمات” توبىنىڭ كومانديرى اپتي الاۋدينوۆ تا ۋكراينانىڭ شابۋىلىنا تويتارىس بەردىك دەپ وتىر.
“قازىرگە دەيىن سۋدجا باعىتىندا ءۇش شابۋىل بولدى. ءۇش شابۋىلعا قولدانىلعان تەحنيكالاردىڭ 13-ءى ءبىر كۇندە جويىلدى. ولاردىڭ اراسىندا ءتورت تانك بار، باسقالارى ايتۋعا تۇرمايتىن تەحنيكالار” دەيدى الاۋدينوۆ.
ۋكراينا پرەزيدەنتى ۆلاديمير زەلەنسكي 6 قاڭتاردا كۋرسكىدەگى شايقاسقا بەس اي تولعانىن ايتىپ، بۇل مايدانداعى “رەسەيدىڭ شىعىنى كوپ ەكەنىن” مالىمدەدى.
– كۋرسك وبلىسىنداعى بۋفەر ايماقتى ۇستاپ، رەسەيدىڭ اسكەري پوتەنتسيالىن جويىپ جاتىرمىز. كۋرسك وپەراتسياسى باستالعالى بۇل باعىتتا جاۋىمىز 38 مىڭ سولداتىنان ايىرىلدى، ونىڭ ىشىندە 15 مىڭ سولدات ءولتىرىلدى، – دەدى ول.
سوعىس ۋاقىتىندا تاراپتاردىڭ مالىمدەمەلەرىن تاۋەلسىز دەرەككوزدەر ارقىلى تەكسەرۋ قيىن.
ۋكراينانىڭ كۋرسك وبلىسىندا جاڭا شابۋىل باستالعان سوڭ رەسەيدىڭ حاركوۆ وبلىسىنداعى قارقىنى ازايعان. بۇل تۋرالى حاركوۆ ايماعىندا سوعىسىپ جۇرگەن ۋكراينالىق اسكەريلەر Reuters اگەنتتىگىنە ايتقان.
– قازىر جاعداي وزگەردى، اتىس ازايدى. بۇعان كۋرسك وپەراتسياسى سەبەپ دەپ ويلايمىن. ۋكراينا قارۋلى كۇشتەرى كۋرسك وبلىسىندا شابۋىلعا شىققان سوڭ جاۋدىڭ ارتيللەريا جانە راكەتامەن اتقىلاۋى جەلتوقسانمەن سالىستىرعاندا قىسقاردى، – دەيدى “گەفەست” (لاقاپ اتى) دەگەن ۋكراينالىق اسكەري.
“رەسەي ءۇشىن كۇتپەگەن شابۋىل”
ۋكرايناداعى سوعىستى تاۋەلسىز باقىلاپ وتىرعان رەسەيلىك اسكەري ساراپشى يان ماتۆەەۆ “بۇل رەسەي ءۇشىن ايتارلىقتاي كۇتپەگەن شابۋىل بولدى” دەپ توپشىلايدى.
– سەبەبى كۋرسك وبلىسىندا ءبىراز تىنىش ەدى، ول جاقتاعى مايدان دا ۇلكەن ەمەس. بۇعان قوسا ۋكراينا اسكەرىندە ادام مەن تەحنيكا تاپشى بولىپ جاتتى. سوندىقتان ۋكراينادان بەلسەندى شابۋىلدى ەشكىم كۇتپەگەنى انىق. وسى تۇستا ءبىز الدىن الا دايىندالعان، كوپ تەحنيكامەن تۇتقيىلدان ءىرى شابۋىلدى كورىپ وتىرمىز. دەمەك ۋكراينانىڭ ماقساتى دا ماڭىزدى بولعانى، – دەيدى اسكەري ساراپشى “ناستوياششەە ۆرەميا” تەلەارناسىنا.
ال يزرايلدىك اسكەري ساراپشى داۆيد گەندەلمان ازاتتىقتىڭ ۋكراين قىزمەتىنە “ۋكراينانىڭ بۇل شابۋىلىنا بىرنەشە سەبەپ بولۋى مۇمكىن” دەيدى.
– قازىر ۋكراينانىڭ اسكەرىنىڭ الدىندا كۋرسك وبلىسىنداعى پلاتتسدارمدى ۇستاپ تۇرۋ تاپسىرماسى بار. ال باسىپ العان جەرلەردى تەك قورعانىسپەن ۇستاپ تۇرۋ قيىن. كۇزدە ۋكراينا اسكەرىنىڭ كۋرسك وبلىسىندا باقىلاۋعا العان جەرلەرىنىڭ ءبىرازى رەسەيگە قايتتى. سوندىقتان بۇل باعىتتا قايتا شابۋىلعا شىعۋدى تۇسىنۋگە بولادى. بۇل رەسەي اسكەرىنىڭ نازارىن بۇرۋ تاكتيكاسى دا بولۋى مۇمكىن. ال نەگىزگى شابۋىل باسقا باعىتتا بولىپ قالۋى دا مۇمكىن. ۋكراينا اسكەرىنىڭ باس كومانديرى سىرسكي جىل سوڭىندا قارىمتا شابۋىل بولادى دەگەن. بالكىم قازىر كورىپ وتىرعانىمىز سول قارىمتا شابۋىل بولۋى مۇمكىن.
ۋكراينا رەسەيدىڭ كۋرسك وبلىسىنا 6 تامىزدا شابۋىل باستاپ، قىركۇيەكتىڭ باسىنا دەيىن شامامەن مىڭ شارشى شاقىرىم جەردى باسىپ العان. كەيىن رەسەي قارىمتا شابۋىلعا شىعىپ، ۋكراينا باقىلاۋىنداعى جەردىڭ جارتىسىن قايتارعان ەدى. رەسەي نەگىزگى اسكەرىن ۋكراينانىڭ دونباسس ايماعىنا سالىپ، كۋرسك وبلىسىنا سولتۇستىك كورەيادان اسكەريلەر الىپ كەلگەنى ايتىلعان.
زەلەنسكي قاڭتاردىڭ باسىندا كۋرسك وبلىسىندا سولتۇستىك كورەيانىڭ 3800 سولداتى جارالاندى يا قازا تاپتى دەگەن. اقش مەملەكەتتىك حاتشىسى ەنتوني بلينكەن سەۋلگە كەلگەندە كۋرسك وبلىسىندا سولتۇستىك كورەيانىڭ مىڭنان اسا اسكەريى قازا تاپتى نە جارالاندى دەپ مالىمدەگەن.
بلينكەن “ۋكراينا قارۋلى كۇشتەرىنىڭ كۋرسك وبلىسىنداعى پوزيتسياسى ماڭىزدى، سەبەبى بۇل 2025 جىلى بولۋى مۇمكىن كەلىسسوزدە ءسوزسىز ەسەپكە الىنادى” دەيدى.
ازات ەۋروپا / ازاتتىق راديوسى
پىكىر قالدىرۋ