Sputnikten tüsirilgen suretter men qolda bar özge de derekter 1 mausım küni ukrain drondarı Resey äskeri aerodromdarına jasağan şabuıldıñ saldarınan Resey keminde 10 strategiyalıq bombalauşı wşağınan ayırılğanın rastaydı dep habarladı Azattıqtıñ Orıs qızmeti.
“Strategiyalıq bombalauşı wşaqtar joyılğan”
OSINT-taldauşı Kris Biggers 2 mausım küni tañerteñ Reseydiñ Irkutsk oblısındağı “Belaya” aerodromına ukrain drondarı jasağan şabuıldan keyin sputnikten tüsirilgen suretterdi jariyaladı. Bwl suretter tipti bwlttıñ ar jağınan da jer betindegi nısandardı “köre” alatın jasandı aperturalı radardıñ (SAR) kömegimen tüsirilgen.
Fotosuretterge qarağanda, äskeri äue bazasında 4 Tu-95 jäne 4 Tu-22 strategiyalıq bombalauşı wşaq joyılğanğa wqsaydı.
Şabuılğa wşırağan Reseydiñ ekinşi äskeri äue bazası – Murmansk oblısındağı “Olen'ya” aerodromınıñ äzirge sputnikten tüsirilgen suretteri joq. Alayda Ukrainanıñ qauipsizdik qızmeti (SBU) jariyalağan dronnan tüsirilgen videolardıñ kömegimen 1 mausımda Reseydiñ äskeri aerodromdarına jasalğan, bwrın-soñdı bolmağan şabuıldıñ jalpı auqımın bağamdauğa boladı.
Intelshizo degen atpen tirkelgen H äleumettik jelisin qoldanuşı jürgizgen esepteulerge jüginsek, “Belaya” jäne “Olen'ya” aerodromdarında keminde:
• 7 Tu-95 strategiyalıq bombalauşı wşağı (tağı bireui zaqımdanğan),
• 4 Tu-22 strategiyalıq bombalauşı wşağı,
• 1 An-22 äskeri-kölik wşağı joyılğan.
Ukrainanıñ “Oko Gora ✙ Jañalıqtar men taldau” attı telegram-resursı Murmansk oblısındağı “Olen'ya” aerodromınıñ suretterin jariyaladı. Olarğa säykes, ukrain drondarı aerodromda twrğan bes wşaqqa şabuıl jasağan: törteui – Tu-95 strategiyalıq bombalauşı wşağı, al bireui – An-12 äskeri-kölik wşağı.
Ukrainanıñ “Örmek” operaciyası
Jeksenbi, 1 mausım küni Reseydiñ birneşe öñirindegi äskeri äue bazalarına drondar şabuıl jasadı. Ukrainanıñ arnaulı qızmeti Reseydiñ 40 äskeri wşağın joyudı közdegen “Örmek” (“Pautina”) operaciyası jaylı habarladı.
Dron şabuıldarınıñ nätijesinde 13 wşaq joyılğan dep habarladı Ukraina Wlttıq qauipsizdik jäne qorğanıs keñesi janındağı jalğan aqparat taratumen küres ortalığınıñ jetekşisi Andrey Kovalenko.
Onıñ aytuınşa, zaqımdalğan wşaq sanı bwdan da köp. Ukraina qauipsizdik qızmeti (SBU) keyinirek taratqan mälimdemesinde Reseydiñ strategiyalıq äue küşteriniñ 41 wşağı zaqımdanğanı aytılğan. “Dron jasalğan şabuıl nätijesinde A-50, Tu-95, Tu-22M3 jäne Tu-160 siyaqtı 41 wşaqqa zalal keltirildi”, – delingen SBU basşısı Vasiliy Malyuktıñ mälimdemesinde.
Ukraina prezidenti Vladimir Zelenskiy jeksenbi küni Reseydiñ birneşe öñirinde 117 FPV-dronnıñ kömegimen jasalğan şabuıldar nätijesinde “Reseydiñ negizgi aerodromdarında twrğan qanattı zımıran tasımaldauşı strategiyalıq wşaqtardıñ 34%”, yağni 43 wşaq zaqımdandı nemese joyıldı” dep habarlağan.
Qazirgi tañda anıq belgilisi – Murmansk jäne Irkutsk oblıstarındağı eki äue bazasında wşaqtar zaqımdanğan nemese joyılğan. SBU habarlamalarında atalğan Ivanov, Ryazan' jäne Amur oblıstarındağı aerodromdarğa jasalğan şabuıldar toytarıldı dep habarladı Resey qorğanıs ministrligi.
Murmansk pen Irkutsk oblıstarındağı äue bazalarına şabuıl jasağan drondar jük kölikterinen wşırılğan. Oğan kuägerler tüsirip, jelide tarağan köptegen videoderekter ayğaq.
1 mausım, jeksenbi küni Murmansk jäne Irkutsk oblıstarına şabuıl jasağan drondar tielgen konteynerler Çelyabinsk qalasındağı qoymada jinalğan boluı mümkin. Mwnday joramaldı OSINT-mamandarınıñ aytqanına süyenip, Baza jäne Mash telegram-arnaları habarladı. Mamandar ukrain derekközderi jariyalağan fotosuretterdi zerttep, Çelyabinskidegi Sverdlov tas jolı boyında soğan wqsas qoyma barın anıqtağan.
Ukraina prezidenti Vladimir Zelenskiy Reseydiñ strategiyalıq aerodromdarına drondarmen şabuıl jasau – Ukraina qauipsizdik qızmetiniñ arnayı operaciyası bolğanın rastadı. “Nätijesi öte keremet boldı. Mwnı Ukraina öz küşimen iske asırdı. Josparlauğa kiriskennen bastap sätti jüzege asırğanğa deyin bir jıl, altı ay, toğız kün ötti. Bwl – eñ alıstağı nısanağa soqqı bergen operaciyamız”, – dep jazdı Ukraina prezidenti SBU basşısı Vasiliy Malyukpen kezdeskennen keyin Telegram paraqşasında.
Resey qorğanıs ministrligi bwl oqiğanı “terakt” dep atadı. Reseylik äskeri blogerlerdiñ köpşiligi teoriya jüzinde mwnday şabuıl Reseydiñ yadrolıq doktrinasında jazılğan “strategiyalıq yadrolıq küşter nısandarına jasalğan şabuılğa yadrolıq qarumen qarımta qaytaruğa boladı” degen qağidağa say keledi dep jazdı. Alayda äzirge Resey basşılığı bwl şabuılğa baylanıstı eşqanday resmi reakciya bildirgen joq.
“Jük köligimniñ işinen drondar wşıp şıqtı”
Reseylik telegram-arnalar ukrain FPV-drondarı Çelyabinsk qalasındağı qoymada saqtalğan, al olardı tiegen jük kölikteri Çelyabinsk aymağına tiesili memlekettik nömirlermen tirkelgen dep jazdı.
Reseylik qwqıq qorğau organdarına jaqın Baza telegram-arnasınıñ mälimetinşe, drondar avtotwraqta twrğan jük kölikterinen wşıp şıqqan. Baza-nıñ jazuınşa, reseylik tergeuşiler jauap alğan jük köligi jürgizuşileriniñ biri – Çelyabinsk twrğını, 55 jastağı Aleksandr – köliktiñ iesi 37 jastağı Artem esimdi adam ekenin aytqan. Artemge Murmansk oblısındağı bir käsipkerden Kol'sk audanına tört qwrastırmalı üydi jetkizu turalı tapsırıs tüsken.
Bağasın keliskennen keyin Çelyabinsk twrğını älgi “tauardı” jük köligine tiep alıp, mejeli jerge qaray jolğa şıqqan. Jol boyı oğan belgisiz bireu habarlasıp, qay jerde toqtau keregin aytıp, jön siltep otırğan. Onıñ soñğı bergen nwsqauı – äskeri aerodrom mañındağı “Rosneft'” janarmay qwyu stansası janında toqta dep aytqan. Däl sol jerde köliginen äuege drondar wşa bastağan.
Özge jük köligin jürgizuşiler de osığan wqsas oqiğalardı bayandağan. 46 jastağı Sergey esimdi jürgizuşi Ryazan' qalasına kirgen kezde, jürip bara jatqan köliginiñ töbesi sıpırılıp qalıp, işinen drondar wşa bastağanın aytqan. Qwqıq qorğau organdarı kölikterdiñ “iesin” izdestirip jatır. Aldın ala mälimet boyınşa, ol – Ukraina tuması körinedi dep jazdı reseylik blogerler.
“Ostorojno, novosti” telegram-arnası Murmansk oblısındağı Olenegorsk qalasınıñ twrğındarı jarılıstar men ört bolğanın habarladı dep jazdı. Qalanıñ irgesinde “Olen'ya” äskeri aerodromı bar. Supernova+ telegram-arnası keminde on jarılıs estilgen deydi.
Äleumettik jelilerde aqparat tarap ketkennen keyin Murmansk oblısınıñ gubernatorı Andrey Çibis aymaqqa drondar şabuıl jasağanın rastadı. Alayda ol şabuıldardıñ naqtı qay jerde jäne qanday nısandarğa jasalğanı jaylı aqparat bermedi. Şeneunik halıqtı drondarğa qatıstı foto jäne videolardı äleumettik jelige jüktemeuge jäne eşkimge jibermeuge ündedi.
Bwl Resey Ukrainağa basqınşılıq soğısın bastağan 2022 jıldan beri alğaş ret Sibirge jasalğan dron şabuılı boldı. Irkutsk oblısınıñ gubernatorı Igor' Kobzevtiñ aytuınşa, Sredniy kentindegi äskeri bölim şabuılğa wşırağan.
“Novomal'tinsk eldi mekenindegi eski ğimaratqa bir dron tüsti. Drondardıñ naqtı sanı äli anıqtalğan joq”, – dedi ol.
Bwğan qosa, Kobzev drondar wşıp şıqqan jük köligi “bwğattalğanın” habarladı.
Bwğan deyin äleumettik jelilerde Irkutsk oblısı Usol'sk audanında äuege tütin köterilip jatqanı körinetin fotosuretter men videolar jariyalanğan. Ol jerde reseylik Tu-22M3 bombalauşı wşaqtarı jayğasqan “Belaya” äskeri aerodromı bar.
Ryazan' oblısınıñ gubernatorı Pavel Malkov ta özi basqaratın öñirge drondar şabuıldağanın habarladı. Onıñ aytuınşa, eşkim zardap şekpegen.
Ukrainalıq “Babel'” basılımı öz derekközderine süyenip, Ukraina arnaulı qızmetteri 40-tan astam reseylik äskeri wşaqtı (arasında A-50, Tu-95 jäne Tu-22M3 bar) joyudı közdegen “Örmek” operaciyasın iske asırdı dep habarladı.
Jurnalister birneşe video da jariyaladı. Solardıñ birinde Irkutsk oblısındağı “Belaya” äskeri aerodromına dron şabuılı jasalğan sät dep körsetilgen beynejazba bar.
Keyinirek “Babel'” basılımınıñ Ukraina qauipsizdik qızmetindegi derekközderi ukrain drondarı Reseydegi tört äskeri nısandı – “Belaya”, “Dyagilevo”, “Olen'ya” jäne “Ivanovo” aerodromdarına şabuıl jasağanın rastağan.
Derekközderdiñ aytuınşa, Ukraina arnaulı qızmetteri Resey äskeri aerodromdarına şabuıl jasau operaciyasına bir jarım jıl boyı dayındalğan. Onı Ukraina prezidenti Vladimir Zelenskiydiñ özi tikeley qadağalağan, al operaciyanı Ukraina qauipsizdik qızmetiniñ basşısı Vasiliy Malyuk pen onıñ qolastındağı qızmetkerler jüzege asırğan.
Aldımen Reseyge drondardı, odan soñ arnaulı konteynerlerdi jetkizgen. Keyinirek sol konteynerlerge drondardı jasırıp ornalastırğan. Al konteynerler qaqpağın aşudı jäne işine jasırılğan drondardı wşırudı qaşıqtan basqarğan.
Ukraina arnaulı qızmeti “jiıntığı 41 reseylik wşaqqa şabuıl jasaldı, bwl operaciyağa qatısqan adamdar qazir Ukrainada” dep habarladı.
Axios basılımı atı-jöni atalmağan ukrain şeneuniginiñ sözine süyenip, Ukraina bwl operaciya jöninde AQŞ prezidenti Donal'd Tramp äkimşiligin aldın ala habardar etken dep jazdı. Al CBS News derekközderi bolsa, Aq üy bwl şabuıldan habarsız bolğan dep aytqan.
Pikir qaldıru