Elimizde Almatı halqı jaña taksi aşıp, al Şımkent halqı özbek körşisimen birge keşki matçtı tamaşalayın dep otırğanda qazaq ümitin arqalağan Airbus motorın dürildetip, Bryussel'ge wşıp ketken bolatın. Prezident Toqaev geosayasi qaqtığıstar, sauda soğıstarı, sankciyalıq qısım men logistikalıq täuekelder küşeyip jatqan bwl zamanda Qazaqstannıñ investiciya üşin eñ tınış aylaq ekenin tağı bir eske salu üşin bara jatqanı anıq. Tura osı sapar aldında Fitch Qazaqstannıñ VVV reytingin rastap, mıqtı argumentti qaltamızğa salıp jiberdi. Bryussel' Europa kapitalınıñ söresi ekenin bilemiz. Sol sörede jatqan milliard euro investiciyağa biz qol salğanda, bastısı eşkim “täyt” demeui kerek.

Sondıqtan Qazaqstan Prezidenti Qasım-Jomart Toqaevtıñ Bel'giya Prem'er-ministri Bart de Vevermen kezdesui jay ğana diplomatiyalıq protokol emes. Bwl Qazaqstannıñ Europadağı ekonomikalıq poziciyasın küşeytetin mañızdı sayasi signal.

Bel'giya kölemi jağınan şağın memleket bolğanımen, Europanıñ qarjılıq jäne logistikalıq ortalıqtarınıñ biri sanaladı. Älemdegi eñ iri porttardıñ biri – Antverpen däl osı elde ornalasqan. Europalıq Odaqtıñ köptegen ekonomikalıq jäne qarjılıq şeşimderine bel'giyalıq biznes pen instituttardıñ ıqpalı joğarı.

Prezident Toqaevtıñ aytuınşa, soñğı jiırma jılda Bel'giyadan Qazaqstan ekonomikasına tartılğan tikeley investiciyalar kölemi 15 milliard dollardan asqan. Bwl öte qomaqtı körsetkiş. Bel'giya Qazaqstandağı eñ iri on investor eldiñ qatarına kiredi.

Bir qarağanda, eki el arasındağı sauda aynalımı asa ülken emes siyaqtı körinui mümkin. Bıltırğı körsetkiş 580 million dollardan astı. Biraq mwnda bastı mäsele kölemde emes. Mañızdısı, Bel'giya Qazaqstandı wzaq merzimdi seriktes retinde qarastıruın jalğastırıp otır.

Büginde elimizde bel'giyalıq kapitaldıñ qatısuımen qwrılğan 110-nan astam käsiporın jwmıs isteydi. Soñğı jıldarı Qazaqstan men Europalıq Odaq arasındağı qarım-qatınas jaña deñgeyge köterildi. Europa üşin Qazaqstan Ortalıq Aziyadağı eñ iri ekonomika jäne mañızdı şikizat jetkizuşisi bolıp otır. Äsirese sirek kezdesetin metaldar, jasıl energetika, kölik dälizderi men öñdeu önerkäsibi bağıttarında qızığuşılıq artıp keledi.

Bwl jerde Bel'giyanıñ röli erekşe. Sebebi Europağa bağıttalğan köptegen logistikalıq tizbekter däl osı el arqılı ötedi. Sondıqtan Qazaqstannıñ Transkaspiy halıqaralıq kölik bağıtın damıtuı bel'giyalıq biznes üşin de mañızdı.

Tağı bir nazar audaratın jayt – büginde Europa öndiristi Qıtaydan tolıq äketpese de, jetkizu tizbekterin ärtaraptandıruğa belsendi kiristi. Osınday jağdayda Qazaqstan jaña öndirister men investiciyalardı tartatın alañğa aynala aladı. Onıñ üstine elimiz Europa men Aziya arasındağı tabiği köpir qızmetin atqarıp otır.

Prezident Toqaev pen Bart de Veverdiñ kezdesui osı twrğıdan alğanda bolaşaqqa jasalğan investiciya deuge boladı. Sebebi halıqaralıq kapital eñ aldımen sayasi twraqtılıqqa, boljamdı sayasatqa jäne senimdi äriptestikke keledi. Al Bel'giyanıñ Qazaqstanğa qızığuşılığı saqtalıp qana qoymay, jaña bağıttar boyınşa keñeyip jatqanı elimizdiñ investiciyalıq tartımdılığı äli de joğarı ekenin körsetedi.

Qarapayım tilmen aytqanda, Europa Qazaqstanğa aqşa saludı jalğastırıp jatır. Bwl bizdiñ ekonomika üşin jaqsı jañalıq.