Twtas bir däuirlerdiñ kuägeri bolğan bizdiñ halıq öz damuında köpğasırlıq kürdeli joldan ötti. Äl-Farabi aytqan eken, memleket te adam siyaqtı öz ömirinde eki tabaldırıqtan attaydı. Birinşisi – ömirge kelui, ekinşisi – eresek ömirge qadam basuı. Osı kezeñderdiñ ärqaysısı qaytalanbaytın äri qımbat kezeñ bolıp sanaladı, – dedi Qazaqstan Prezidenti.

Nwrswltan Nazarbaev 24 jasqa tolğan Qazaqstan wlı maqsattarğa qol jetkizuge wmtılatının atap ötti.

Tarih – bizdiñ halqımızdıñ saq pen türkiniñ, Qazaq handığınıñ däuirinde, Wlı Otan soğısı kezinde körinis tapqan wlı küresiniñ kuäsi. Bwl bizdiñ ötkenimiz jäne tağdırımız. Babalarımız wmtılğan añsarlı maqsat – Täuelsizdikke bizdiñ wrpaq qol jetkizdi. Sondıqtan da bwl kün twtas wrpaqtardıñ orındalğan armanın bildiretin quanıştı äri mañızdı mereke bolıp sanaladı. Öytkeni, täuelsizdik pen teñdik, egemendik pen memlekettilik – kez kelgen halıq üşin asa qwndı wğımdar, – dedi Qazaqstan Prezidenti.

Memleket basşısı elimiz nebäri 24 jılda jañaru üderisin ötkerip, bükil älemde sıy-qwrmetke ie bolğanına nazar audardı.

Şirek ğasırğa juıq kezeñde biz keybir memleketter eşteñesiz şığatın, al endi biri ğasırlardı sarp etetin tarihi joldan öttik. Bwl babalardıñ erligimen ruhtanıp, bolaşaq wrpaqqa jol aşqan barşa qazaqstandıqtardıñ eñbegi arqasında mümkin boldı, – dedi Nwrswltan Nazarbaev.

Qazaqstan Prezidenti Otandı süyu ayrıqşa baqıt ekenin ayttı.

Şeksiz arman jolında Otan üşin orasan qiındıqtardan ötuge boladı. Biz öz egemendigimizdi babalardıñ önegesi men halqımızdıñ parasattılığınıñ arqasında aldıq. Täuelsizdik – küşti ruhpen jäne mıqtı minezben ğana wstap twruğa bolatın tarih tolqını, – dedi Memleket basşısı.

Nwrswltan Nazarbaev Täuelsizdik bükil halıq üşin zor jauapkerşilik ekenine nazar audardı.

Biz osı tağdırdı qabıl alıp, birlik pen eñbek arqılı tarihi jolımızben şığınsız jürip kelemiz. Bizdiñ el egemendigin nığaytıp, Mäñgilik el boluğa bağdar wstadı. Sondıqtan Täuelsizdik küni – barşa Qazaqstan halqı men älemniñ barlıq tükpirindegi dostarımız üşin wlı mereke, – dedi Qazaqstan Prezidenti.

Memleket basşısı büginde qazaqstandıqtar üşin bizdiñ däuirdi Täuelsizdikti jariyalağanğa deyin jäne odan keyin dep bölu qalıptı jaytqa aynalıp kele jatqanın ayttı.

1991 jılı 16 jeltoqsanda Qazaqstan mülde jaña tarihın bastadı. Bizder, qazaqstandıqtar, wlt örleuiniñ qazaqstandıq däuiriniñ negizin qalauşığa äri twñğış izaşarına aynaldıq. Bwl – bizdiñ izgi uaqıtımızdıñ jäne barlıq wlı jetistikterimizdiñ sipatın däl beretin atau. Biz Täuelsiz Qazaqstanmen birge ösip kelemiz, – dedi Nwrswltan Nazarbaev.

Qazaqstan Prezidenti elimizdiñ jolı birlikpen jäne kelisimmen astasıp jatqanın ayttı.

Jıl basında ötken prezident saylauı bizdiñ tabıstı türde bolaşağı birtwtas wltqa aynalıp kele jatqanımızdı körsetti. Birlik pen kelisimdi saqtap, nığaytu oñay jwmıs emes. Ol danalıq pen körgendilikti, köregendik pen elimizdiñ barşa azamattarınıñ özara sıylastığın qajet etedi. Ğılım Jer betindegi ärbir etnos keminde bir erekşe qasietke ie ekenin aytadı. Bizdiñ ömirimiz Qazaqstandağı 100 etnostıñ 100 ayrıqşa jäne qaytalanbas qasieti bar ekenin körsetip otır. Sonıñ bäri jinalıp kelip bizdiñ Birtwtas Wltımızdıñ biregey basımdılığın qwraydı. Qazaqstannıñ ärbir etnosı – bizdiñ baylığımız. Köpetnostılıq – bizdiñ ortaq wlı qazınamız. Qazaqstan halqı Assambleyası, mine, 20 jıl boyı osı baylıqtıñ bastı qorğauşısı mindetin tabıstı atqarıp keledi. Täuelsiz Qazaqstan – bizdiñ ülken otbasımız jäne ortaq şañırağımız, – dedi Memleket basşısı.

Nwrswltan Nazarbaev XXI ğasır adamzat üşin älemdik ekonomika men sayasattıñ, aqparattıq jäne äleumettik keñistiktiñ jaña ölşemderine jol aşqanına nazar audardı.

Bükil älem arhitekturasında orasan özgerister jürip jatır. Älemdik damudıñ köptegen tüytkilderi tabıldı. Büginde 1,2 milliard adam planetanıñ qaqtığıstar men twraqsızdıq jaylağan arealında tirşilik etip jatır. Kün sayın 42 mıñ adam üyin tastap, qauipsiz jer izdestirude. 13 mıñnan astam terrorlıq akt 33 mıñ adamnıñ ömirin qidı. Biz özimizdiñ twraqtı äri qarıştı damığan elimizdi mülde basqa jağdayda – beybitşilik pen qauipsizdik jağdayında örkendetip jatqanımızdı este wstauğa jäne bağalauğa tiispiz, – dedi Qazaqstan Prezidenti.

Memleket basşısı ekinşi jıl qatarınan jahandıq ekonomikalıq dağdarıstıñ dendep kele jatqanın ayttı.

Osı qiındıqtarğa qaramastan, täuelsizdiktiñ 24-şi jılı jadımızda köptegen jan tolqıtarlıq, Qazaqstan üşin ayrıqşa mäni bar oqiğalarımen este qaladı. Biz ekonomikamızdıñ oñ ösimin saqtadıq. Industriyalıq damudıñ ekinşi besjıldığı jäne «Nwrlı jol» bağdarlaması bastaldı. 2015 jılı 800 milliard teñgeniñ 120 jobası iske qosıldı, 10 twraqtı jwmıs ornı aşıldı, mıñdağan şarşı metr baspana paydalanuğa berilip, olarğa jastar men az qamtılğan otbasılar qonıstandı, – dedi Nwrswltan Nazarbaev.

Qazaqstan Prezidenti el ömirinde bolğan özge de ayşıqtı oqiğalarğa toqtaldı.

Qazaqstan Düniejüzilik sauda wyımına kirdi. Euraziyalıq ekonomikalıq odaq jwmısın bastadı. Biıl Qazaqstan älemdik jetekşi eksporttauşılardıñ eluligi qatarına qosılıp, 43-orındı ielendi. Bizde şiraq, sauattı, jañaşıl jastar buını ösip keledi. Älemniñ jetekşi joğarı oqu orındarınıñ qatarına qosılğan Nazarbaev Universitetinde dayarlanğan alğaşqı 500 maman biıl bitirip şıqtı. Qazaqstan MAGATE-men birlesip, YAdrolıq otın bankin qwrdı, ol bizdiñ elge ornalastırıladı. Üşinşi ğarışkerimiz Aydın Ayımbetov Jer töñiregindegi orbitağa sapar şekti. Biz Wlt josparın orındauğa kiristik. Onı Täuelsizdiktiñ 25 jıldığı qarsañında jüzege asıra bastağanımızdıñ da simvoldıq mäni bar, – dedi Memleket basşısı.

Nwrswltan Nazarbaev qazir qoğamda Qazaqstan halqına jıl sayınğı Joldaudıñ qızu talqılanıp jatqanına nazar audardı.

Men memleket pen qoğam aldına qoyılğan mindetter keñ qoldau tapqanın bayqap otırmın. Jaña Joldauda kemeldengen eldiñ mindetteri belgilendi. XXI ğasırdağı bolaşaq  – kez kelgen twsınan jol saluğa bolatın aşıq alañqay emes. Bizdi alda bwrınğımız ben qazirgimizden de kürdeli bağıttar kütip twr. Tarih eşqaşan tek jeñister jılnamasınan twrmaydı. Eger ärdayım bäri jaqsı bolğan bolsa, tarihtıñ özi de bolmağan bolar edi. Dağdarıstar jeñu ilimin üyretedi. Sondıqtan qazir twraqtılıqtıñ qwnı arta tüsude. Twraqtı ekonomika, twraqtı sayasat, twraqtı qoğam – biz ärqaşan wstanıp kele jatqan bağdar osı, – dedi Qazaqstan Prezidenti.

Memleket basşısı Täuelsizdik jıldarı respublikamız tarihi damu twrğısınan ğajayıp sekiris jasağanın ayttı.

Bizdiñ Qazaqstan – Wlı Dala Eli, Jañğırğan Wlı Dala Eli. Bwl bizdiñ asqaq añsarımız äri erekşe maqtanışımız. Qazaqstandıqtardıñ bolaşaq wrpağı bizdiñ jetistikterimizdi layıqtı bağalap, maqtan twtarına eş kümän joq. Olar bizdiñ täjiribemizden danalıqtıñ, sındarlı is-ärekettiñ jäne kez kelgen qiındıqtıñ aldında iilmes beriktiktiñ ülgisin köretin boladı, – dedi Nwrswltan Nazarbaev.

Soñında Qazaqstan Prezidenti barşanı tağı da eldiñ Täuelsizdik künimen qwttıqtadı.

Aqorda baspa söz qızmeti