Türkiya – Qazaqstannıñ eñ jaqın äri senimdi sayasi jäne ekonomikalıq äriptesteriniñ biri. Büginde ortaq tarih pen ruhani mwrağa negizdelgen qarım-qatınasımız öristey tüsude. Baylanıstarımız birte-birte ilgerilep, qazir strategiyalıq sipatqa ie bolıp otır. Qazaqstan bauırlas türik halqına ünemi tolıq qoldau körsetedi jäne ärqaşan qol wşın beruge dayın. Bwl sapar eki eldiñ qarım-qatınastarın odan äri nığayta tüsuge septigin tigizedi dep senemin, – dedi Qazaqstan Prezidenti.

Memleket basşısı kelissözder barısında sauda-ekonomikalıq jäne investiciyalıq salalardağı özara is-qimıl boyınşa birqatar uağdalastıqqa qol jetkizilgenin de atap ötti.

–  Qazir elimizde türik kapitalınıñ qatısuımen 1600-den astam käsiporın jwmıs isteydi. Türik biznesiniñ ökilderi jaña elordamızdıñ qwrılısına belsene atsalıstı. Türik kompaniyasınıñ ökilderi büginge deyin elimizde 20 milliard dollar köleminde merdigerlik jwmıstar atqarıp, 460 nısan paydalanuğa berildi. Elderimizdiñ arasındağı tauar aynalımı ötken jılı 2 milliard  dollardı qwradı, – dedi Nwrswltan Nazarbaev.

Sonımen qatar, Qazaqstan Prezidenti R.Erdoğannıñ ötken jılğı Astanağa saparı ayasında qabıldanğan «Jaña sinergiya» birlesken ekonomikalıq bağdarlamasınıñ mañızdılığına toqtaldı.

– Bizdiñ mindetimiz – özara tauar aynalımın 10 milliard dollarğa jetkizu. Bağdarlama ayasında jalpı qwnı şamamen 813 million dollardı qwraytın 20 investiciyalıq jobanı iske asıru qarastırılğan. Türkiyanıñ infraqwrılımı damığan mañızdı tranzittik el ekenin eskerip, men bauırlas türik halqın «Nwrlı Jol» bağdarlamasın jüzege asıruğa atsalısuğa şaqırdım. Osığan oray, Qazaqstan-Türkiya industriyalıq aymaqtarın qwru jwmıstarı asa mañızdı. Bwl qadamdar eki eldiñ ekonomikalıq äleuetiniñ äri qaray damuına serpin beredi, – dep atap ötti Memleket basşısı.

Nwrswltan Nazarbaev halıqaralıq twraqtılıqtı qamtamasız etu mäselesi boyınşa jappay küş jwmıldırudıñ mañızdılığına da nazar audarıp, bizdiñ elimizdiñ Birikken Wlttar Wyımınıñ Qauipsizdik Keñesiniñ 2017-2018 jıldardağı twraqtı emes müşeligine ötuine qoldau körsetkeni üşin Türkiyağa alğıs ayttı.

– Jahandıq sın-sınaqtar men qauip-qaterler arta tüsken almağayıp zamanda Qazaqstan men Türkiya  älemdik qauipsizdik pen twraqtılıqtı qamtamasız etu üşin küş jwmıldıruğa dayın. Osı orayda biz HHİ ğasırdıñ bastı keseli – terrorizmge qarsı üzildi-kesildi toytarıs beruge kelistik. Elderimizdiñ arasındağı äskeri jäne äskeri-tehnikalıq saladağı ıntımaqtastıq ornıqtı damuda, – dedi Memleket basşısı.

Qazaqstan Prezidenti mädeni-gumanitarlıq saladağı ekijaqtı ıntımaqtastıq ünemi ilgerilep kele jatqanın atap ötti.

– Kelesi jılı Astanada «Bolaşaq energiyası» taqırıbımen «EKSPO-2017» halıqaralıq körmesi ötedi. Bwl auqımdı şara balamalı energetika salasındağı innovaciya mäselesine arnalğan. Men bügin Türkiya basşılığın, biznes ökilderin jäne bauırlas türik halqın osı şarağa qatısuğa şaqırdım, – dedi Nwrswltan Nazarbaev.

Qazaqstan Prezidenti söziniñ soñında Qazaqstan-Türkiya qarım-qatınastarınıñ äri qaray nığaytudıñ äleueti zor ekenine toqtaldı.

Sonday-aq, bizdiñ respublikamızdağı qazaq-türik liceyleriniñ jwmısına qatıstı mäsele de qaralıp, taraptar özara tüsinistik taptı.

R.Erdoğan Qazaqstan Prezidentine Türkiya men Reseydiñ qarım-qatınasın qalıpqa keltiruge küş salğanı jäne tarihı saparı üşin tağı da alğıs aytıp, türik halqı üşin kürdeli bolıp otırğan kezeñde mwnday qoldaudıñ der kezinde körsetilip otırğanına toqtaldı. Sonımen qatar ol Nwrswltan Nazarbaev Türkiyadağı äskeri töñkeris jasau äreketinen keyin bwl elge kelgen alğaşqı memleket basşısı ekenin atap ötti.