Qazaqstan törtinşi olimpiada qatarınan bokstan 69 kilogramm salmaqta altın medal' ielendi. Finalda Daniyar Eleusinov özbekstandıq 23 jastağı Şahram Giyasovtı jeñdi. Üş töreşi de birinşi, ekinşi raundta basım wpay sanın Qazaqstan boksşısına, üşinşi raundta Özbekstan sportşısına berdi.

Daniyar Eleusinovtiñ qarsılası Giyasovtıñ soqqısınan qorğanıp jatqan kezi. Rio-de-Janeyro. 17 tamız 2016 jıl.

Eleusinov qorğana jürip qarsı şabuılğa şığıp, köbirek däl soqqı jasaumen boldı. Jartılay finalda qarsılasınıñ bası soğılıp, mañdayına jaraqat salğan qazaq boksşısınıñ aqtıq jekpe-jekte barınşa saqsınğanı da bayqaldı.

Bwl salmaqta Afinada Baqtiyar Artaev, Pekinde Baqıt Särsekbaev, Londonda Serik Säpiev çempion atanğan. Sport mamandarı men janküyerler arasında “69 kilogramm – Qazaqstannıñ salmağı” degen söz de qalıptasıp ketken. BBCmen Daily Mail siyaqtı wlıbritaniyalıq basılımdar da Qazaqstannıñ soñğı tört olimpiada oyındarında däl osı salmaqta jeñimpaz bolğanın atap ötti. Özbekstandıq resmi BAQ-tardıñ biri Eleusinovti “üş raundta da jeñiske jetti” dep habarladı.

Daniyar Eleusinovtiñ finalda jeñiske jetken säti. Rio-de-Janeyro. 17 tamız 2016 jıl.

​Riodağı ringte referi Eleusinovtiñ qolın kötergen sätte boksşı quanğannan bir sekirip, qarsılasın qwşaqtap qwrmet qıldı. Körermenderge iilip izet qılğasın, Qazaqstan tuın jamılıp alıp, zaldı aynalıp şıqtı. Eleusinov özin alqalağan toptıñ işinde aldımen London olimpiadasınıñ çempionı Serik Säpievtiñ qolın aldı da, barlıq janküyerlerdiñ qwşağına enip ketti. Boksşı marapattau räsiminde änwrandı tolıq aytıp, közine jas alıp twrdı.

- Qarsılasım eki raund jeñilip jatqanın bilip üşinşi raundta döreki bokstasa bastadı. Bwl – meniñ ğana eñbegim emes. Bapkerler men därigerlerdiñ de eñbegi. Sporttan ketem be, ketpeymin be äli bilmeymin. Biraz es jiıp alayın. Qazir ol turalı oylaytın şamam da joq. Levittiñ jeñilisin bilemiz. Biraq final aldında jaman närse oylamadım. Bermey qoysa bwyırğanı dep oyladım, – dedi boksşı.

“JARAQATI AUIR BOLDI”

Eleusinov jartılay finalda Suleymen Sissokomen bokstasıp jatqanda qarsılasınıñ bası tiip, mañdayı men qabağın jırtıp alğan. Boksşınıñ äkesi äri jeke bapkeri Marat Eleusinov “wlımdı jaraqatına baylanıstı finalğa şığarmay qoyar” dep qauiptengen.

Daniyar Eleusinovtiñ altın medal' alğan säti. Rio-de-Janeyro. 17 tamız 2016 jıl.

- Jaraqatı öte auır boldı. Qabağı 10 santimetrdey jırtılıp ketti. Közine jetip qalğan edi. Därigerler aldımen işindegi etin tigip aldı. Odan keyin sırtın tikti. Qattı soqqı tise tikken jeri qayta jırtılıp keter edi. Jaraqat alğan mañdayın da saqtap jürdi. Özbekstan boksşısı alğa jürip şabuıldaydı. Sondıqtan Daniyar qorğana jürip jıldam qozğalıp, qarsılası şabuıldağanda kütip alıp soqqı darıtu kerek boldı. Bastısı – ümitimizdi aqtadı, – dedi boksşınıñ äkesi Azattıq tilşisine.

Daniyar Eleusinov aytuınşa, “jaraqatın emdeuge qwramanıñ därigerleri men AIBA därigerleri birigip kömektesken”.

“KAPITAN RETİNDE ALTIN ALU MİNDET BOLDI”

Al Qazaqstan qwramasınıñ bas bapkeri Mırzağali Aytjanov finaldan keyin wzaq qol soğıp, keyin boksşınıñ betinen süydi. Bapkerdiñ quanğannan közine jas alğanı da bayqalıp twrdı.

- Bwl – ülken jäne köp eñbektiñ nätijesi. Olimpiada – beybit kündegi tartıs. Daniyardıñ aldında ülken missiya twrdı. Onıñ aldında komanda kapitanı retinde çempion atanu mindeti twrdı. Daniyar Eleusinov – Serik Säpievten keyin olimpiadada jäne älem çempionatında altın alğan ekinşi qazaq. Final ötetin küni tañğı jetide jarıstı ayaqtağan boksşılar bar, endi kezdesuge şığatındarı bar barlığı twrıp Daniyardıñ dayındığına kömektesti. Komanda bolıp dayındaldıq. Kezdesu aldında barlığımız “basqa boksşılardıñ ketken esesin sen qaytar” dep sättilik tilegenbiz. Daniyar – ayla-täsili mol boksşı. Oğan barlıq qarsılası dayındalıp kelgeni anıq. Biraq ol olimpiadada wratın jerde wrıp, qaşatın jerde qaşıp, sauattı bokstastı, – dedi Aytjanov.

Jurnalister sportşılar men bapkerlerden swhbat alatın miks-zonada Özbekstan boksşısı kelip, tilşilermen söylesip twrğan Aytjanovtı “layıqtı jeñis, quanıştımın” dep qwttıqtadı. Al jartılay finalda Eleusinovten jeñilip, qola alğan franciyalıq Sissoko “Ol jeñiske layıqtı boldı, çempion. Jaraqat üşin keşirim swraymın” dedi.

Eleusinovtıñ altın medalinen keyin üş altın, üş kümis, altı qolamen Qazaqstan jalpı esepte 20-orınnan 17-orınğa köterildi.

Bwğan deyin auır atletikadan Nijat Rahimov pen jüzuden Dmitriy Balandin altın jülde alğan. Jazira Japparqwl (auır atletika) men Eldos Smetov (dzyudo) kümis medal' enşilegen. Galbadrah Otgonceceg (dzyudo), Karina Goriçeva men Farhad Harki (ekeui de – auır atletika), Ol'ga Rıpakova (jeñil atletika), Elmira Sızdıqova (äyelder küresi) qola medal' ielengen. Qazaqstan 17 tamızdağı komandalıq esepte 17-orında twr.

Ruslan MEDELBEK

 “Azattıq” radiosı