Hattıñ qısqartılğan mätini mınaday:

«Qwrmetti Nwrswltan Äbişwlı!

Salafizmge tiım salar sot şeşimi äli şıqqan joq. Mağan jetken mälimetterge qarağanda, QR İşki ister ministrligi, QR Bilim jäne Ğılım ministrligi, QR Prokuraturası, Din isteri komiteti, oblıs äkimşilikteri salafizmge tiım saludı qoldağanımen, QR WQK-niñ ökilderi salafizmge tiım saluğa üzildi-kesildi qarsı şığıp otır.

Bwl neğılğan sıñarjaqtıq?

WQK wlttıñ qauipsizdigin oylaytın organ ba, älde wltqa qauipti organ ba? Osını halıq tüsinbey otır.

Bülikşi ağım – salafilikti aşıq ayıptauğa barmay, tiip-qaşıp qana mälimetter berip otırğan WQK lauazımdı twlğalarınıñ is-äreketin qalay tüsinuge boladı?

Atı darday bwl asa jauaptı mekeme ökilderi bügin osılay sızdıqtatıp otırıp, erteñ salafilikke tiım saluğa jol bermeytin şığarıp salma qwjat äzirlep, Elbasınıñ atınan elge jariya etpesine kim kepil?!

Nege WQK mäseleni şeşuge emes, odan qaşuğa asa ıntalı bolıp otır?!

Qwrmetti Nwrswltan Äbişwlı!

Qoğamda köp orın alatın lobbizm derti WQK-ne jwqqan sıñaylı. Äytpese, Siriya, Irak, Täjikstan, Özbekstan, Şeşenstan jäne t.b. memleketterde bülik tudırıp, auızdıqtalğan dini ağımğa bizdiñ elimizde nege tiım salınbaydı?

WQK eldi qan-qaqsatıp, talay beykünä adamnıñ ömirin jalmağan salafizm ağımına tiım saluğa nege qarsı?

Jalpı, qazir memlekettik organdarda salafizmdi qoldaytın azamattardıñ jwmıs isteytini ämbege ayan. Olardıñ talayın kündelikti ömirde körip jürmiz.

Meniñ payımdauımşa, WQK-niñ qwramında da salafizmdi qoldaytın qızmetkerler bar.

WQK-degi salafizm emmisarları Qauipsizdik Keñesine jalğan aqparattar men koncepciyaların ötkizude. Osı sebepten de şeşimi kezek küttirmeytin atalmış mäsele sağızşa sozılıp keledi.

Qwrmetti Nwrswltan Äbişwlı!

Qaşan da wlt pen memleket bolaşağı üşin mañızdı mäselelerdi şeşuge atsalısıp, Öziñiz şeşim qabıldap kelesiz. Keybir memlekettik organdardı salafizm dertinen ayıqtırıp, elimizdiñ keleşegine asa qauipti bwl dini ağımğa tiım salu mäselesine de Öziñiz nükte qoyadı degen senimdemin», delingen Äzimbay Ğalidiñ hatında.