Алматы әкімінің ауысуы туралы хабарды қалалықтар әрқалай қабылдаған болатын. Бірі қуанса, екіншісі ренішін білдіріп жатты. Алайда жас әкім өз жұмысын жақсы атқара ала ма деп бақылауға кіріскендер көбірек болды.

NUR.KZ порталы Comode-қа сілтеме жасап Бауыржан Байбек келгелі Алматыда байқалған 15 оң өзгерісті назарларыңызға ұсынады.

Әлеуметтік желі

Оң өзгерістер тізімін Бауыржан Байбек келгелі Алматы қаласының әкімдігінде жеке Instagram аккаунты пайда болғанынан бастаған дұрыс. Бұл қадамның арқасында қала тұрғындары әкімдік жұмысын бақылап қана қоймай, өз ұсыныстары мен шағымдарын да жеткізе алады. Ол үшін әкімдік аккаунтына фото жүктеу не болмаса өз парақшаңдағы фотоға @akimat_almaty деп белгілеу жетіп жатыр. Ал жақында қалалық әкімшілік Periscope қосымшасына да тіркелген.

Жабық люктер

Ашық қалған люктер қаладағы басты мәселе екенін алматылықтардың шағымынан-ақ байқауға болады. Әкімдік Instagram-ында бұл мәселе барынша қолға алынғанына дәлелдер бар. Тұрғындардың өтінішімен 20 люктің жабылғанын көрсететін фотолар әкімдіктің ел шағымдарын естіп жатқанын байқатады.

Жөнделген жолдар

Енді тұрғындар жолдың жоспармен жаңартылуын айлап күтіп жатпайды. Байбектің тобы шұңқырлар, опырылған асфальттар мен тозығы жеткен жолдарға қатысты шағымдарға жедел түрде әрекет етуде.

Мектеп тұсындағы жаңа спорттық алаңдар

Жаңа әкімнің келуімен  жаңа демеушілер пайда болған сияқты. Қалада белсенді түрде жаңа спорт алаңдары салына бастады (көбіне мектеп маңынан). Тек қана қазан айында Алмалы, Түрксіб, Жетісу, Әуезов, Бостандық, Медеу, Алатау аудандарында және “Алғабас”, “Нұркент” ықшамаудандарында 16 спорт алаңының салынуы басталды.

Балалардың ойын алаңы

Байбек қаланың кішкентай тұрғындарын да естен шығармаған. Қаламыздың Алатау, Медеу, Алмалы және Жетісу аудандарында балалардың жаңа ойын алаңдары салынды. Медеу ауданының өзінде ғана қараша айында 17 спорт және балалар алаңдары дайын болады деп күтілуде.

Саябақтар мен демалыс аймақтары

Жаңа әкімнің тобы тұрғын үй кешендерінің маңындағы бос жатқан аймақтарға жаңа құрылыс салуды барынша қолға алған. Ондай аймақтарға жүгіретін жолдары, турниктер, шахмат ойнау үшін арнайы орындықтары бар саябақтар салынып жатыр.

Таза арықтар

Қаланың арықтарын уақытылы тазартып тұрудың да өз маңызы бар. Көшелерді су басудың алдын алатын бұл шараға да Байбек ерекше көңіл бөлген.

Таза көшелер

Өкінішке қарай, Алматы таза қалалардың қатарына енбейді. Алайда жаңа әкім келгелі қоқыстар саны әлдеқайда азайған.

Тек тұрмыстық қоқыстар ғана емес, кәсіпорындардан қалатын қалдықтар да тазартыла бастады.

Қаланы көгалдандыру

Соңғы кездері ағаштарды шабу жиі көрініске айналғанынан хабардар болған әкім енді қаладағы әрбір ағашты есепке алатын болған. Ол үш айдың ішінде заңсыз ағаш кескен көптеген жеке кәсіпорындарды жауапкершілікке тартты. Енді ағашқа қол сұққан әр тұрғынға қолданылатын жаза да қатайтылған.

Жаяу жүргіншілерге жағдай жасау

Жаяу жүргіншілер, мүгедектер арбасына таңылғандар қалада пандустар мен жолдардың аз да болса ретке келіп қалғанына разы.

Жақында зообақтағы аю торы маңынан жаңа пандус салынды. Енді мүмкіндігі шектеулі адамдар еш кедергісіз аюларды тамашалау мүмкіндігін алды. Бұдан бөлек әкімдік жаңа өткелдер салып, зақымданған тротуарларды жөндеуге және көшелер мен жол асты өткелдерін жарықтандыуға кіріскен.

Заңсыз құрылыстарды сүріп тастау

Бауыржан Байбектің тобы заңсыз ағаш кесуден бөлек, заңсыз құрылыстарды да жауапқа тартуда. Соның арқасында мұндай құрылыстардың бірталайы сүріліп тасталды.

Қала нысандарын салуды бақылауға алу

Әлеуметтік маңыздылығы бар қала нысандарының құрылысын өз бақылауына алған Байбек балалар бақшасы, мектептер, емханалар мен халыққа қызмет ету орталықтарының уақытылы салынып бітуіне мүмкіндік жасады. Тұрғындар қай нысан қай мерзімде салынып бітетінін нақты біле алады.

Уақытылы хабардар ету

Instagram-да аккаунт ашу бір бөлек те, оны дұрыстап пайдаға асыру бір бөлек. Осы тұрғыда әкім парақшаны қала үшін маңызды ақпараттармен хабардар етуге пайдаланатын болған.

Тұрғындарды көшелердің апаттардан, жөндеу жұмыстарынан жабылғанынан бастап, қай нысан қай уақытта салынып бітетініне дейін құлағдар етіп отырған әкім күн санап тұрғындардың разылығын алуда.

Әдеттегіден тыс мәселелерді шешу

Қала басшылығы тек қана ашық люктер мен толып қалған арықтарға қатысты қалалықтардың шағымдарын шешіп отыр десек қате айтар едік. Тұрғындардың мысықты ағаштан түсіріп беру, көшені ескірген теміржол вагонынан тазарту сияқты әдеттегіден тыс шағымдарға да әкімшілік бей-жай қарамайды.

Білім гранттары

Әкімдіктің үкімімен тек үш оқушы ғана білім грантын алғанына қарамастан, бұл мәселеде де Байбек көзге түсе алды деп айтуға болады. Себебі Байбекке дейін ешбір әкім білім гранттарына қатысты мәселеге лайықты назар бөлмеген.

 Дереккөз: NUR.KZ