پەزيا كەربۇعىسى
kerey.kz
اقىلبەك دالەلبەكۇلى 1974جىلى قحر-داعى
التاي ايماعى كوكتوعاي اۋدانىندا دۇنيەگە كەلگەن.
ونى قىتاي قازاقتارى <<پەزيا كەربۇعىسى>> دەپ اتاۋعا
داعدىلانىپ كەتكەن.
قانسوناردا باسىلعان ءىزدىڭ ءوزى بايىرعى
سۇرەندەرمەن كەلىسە بەرمەيدى،
اقىلبەكتىڭ ءىزى جاڭاشا سۇرەن رەتىندە قارالادى،
ءبورى سوقپاقتى بوز دالاداعى <<پوەزيا كەربۇعىسىنىڭ>>
سەزىم شىرپىسىنا تامدىرعان الاۋ وتى بۇكىل شىعىس القابىنان شۇباتىلا جەتىپ مىنەكي اتىراۋعا دەيىن دامىل تاپپاقشى.
ىڭكارلىق
كەڭ كەۋدەمە كەرۋەن تارتقان نۇرلارى ،
مەن ومىرگە ىنكار ەدىم …
وزىمشە !
قىتىعى مول قىيال دەيتىن قىرداعى ،
…قىيىلامىن ،
قىرشىن ءۇمىت كوز ىلسە…
ەنتەلەتىپ جان- ءدىلىمدى ءبىر باقىت ،
ەرتەگىدەي !
ەرتە ، ەرتە ، ەرتەدەن ،
جالعىز ساۋلە بار جالعاندا ، جىرلاتىپ -
جانارىمەن جۇرەگىمدى ورتەگەن .
بال موينىنا مىڭ بوياۋلار اسىلىپ ،
قىزىل- جاسىل جاپىراعىنا قونعان ءنار.
و، داريعا !
مىڭ جۇرەككە جول الىپ ،
ول تۋرالى ءان سالاتىن ورماندار .
سامال ەسكەن ساحارانىڭ تۇنىنەن ،
كىسىنەسە اڭساپ ارمان – ارعىماق ،
تاۋدىڭ تازا ءنىلىن سورعان تىلىمەن ،
ول ءجايىندا جىر وقىيتىن بال بۇلاق .
ءبىر عاجاپ ناز مىيىعىندا كىلكىگەن ،
سول بەينە ءۇشىن وزەگىمدى وت قارىپ…
جانارتاۋداي قايتا – قايتا سىلكىنەم ،
ۇشقىندارىم اسپان جاققا اتتانىپ…
جانعا شەككەن جازىمىشتىڭ جازۋىن ،
مەن – قىزعىش قۇس !
…ىنكار ،
ءومىر ،
ساۋلەگە …
سەن – جالىنسىڭ ،
ناركەس بەينە- نازىگىم ،
سالقىن تارتپاي سالا بەر سان اۋرەگە !!
سىبەرلە جاڭبىر
اعىل دا تەگىل وقىلعان ويلى جىر ما ەدىڭ ،
سىبەرلە ، ءجاڭبىر !
جانىمنىڭ جۋشى كىربەڭىن .
تىنىشتىق- كىيە تۇمارىن تاعىپ موينىما ،
تىڭداعىم كەلىپ تۇر مەنىڭ…
شىمشىلاپ تۇندەر ،
شىيرىقتىرىپ قىسقا كۇن وتكەن ،
كەۋدەمە كەرمەك تامشىنى ، ءجاڭبىر ، تۇنەتپەن !
جاۋراعان سەزىم جاپىراقتارىن جىلىتىپ ،
ۇشىرشى كەپتەر جۇرەكتەن .
بۇلتتارىڭ سەنىڭ – جۇلدىزدىڭ بۇيرا جولاعى ،
بۇلتتارىم مەنىڭ – بۇرقانعان مۇڭنىڭ بورانى .
قۇلازىپ كەتتىم عۇمىرلار ءۇشىن قاڭباقتاي ،
بەلگىسىز قايدا قونارى .
جاتىرقاپ كوڭىل جاندىكتەرىنەن نارىقتىڭ ،
قالعانداي قۇمدا ، قاتالاپ قانشا تالىقتىم .
سىبەرلە ، ءجاڭبىر !
سىلكىنىپ الىپ قاعايىن ،
قايمانا شاڭىن حالىقتىڭ !!
ساۋلە
ويعا باتىپ … و ، باتىسىم- شىعىسىم !
توسىت كوتەر ، توسىن تۋعان جىر ءۇشىن .
اڭىزداعى الىپ قارا كولەڭكە ،
كۇن نۇرىنا سۋارىپ تۇر قىلىشىن .
جەر !
تىرشىلىك !
كەرۋەن كوشىپ ، يت ۇرگەن ،
كۇرسىنەمىن ، كۇڭىرەنسە كۇيكى ىنگەن .
سۇرەنى كوپ ، سۇيكىمى جوق پەندەنىڭ ،
سۇر كوكەككە ۇقساتامىن سىيقىن مەن .
كەرمالداسقان كۇدىك جانە توتى – ءۇمىت ،
كەڭىستىككە زاۋال بولىپ وقىلىپ .
دالا جاتىر اڭساپ اسپان داۋىسىن ،
بارا جاتىر كەرىم ساۋلە كەتىلىپ .
جەر- ۇجىماق !
وزەگىندە ءومىر بار ،
ءومىر ءۇشىن ورتەنە قول سوعىڭدار .
عالاماتىن قايدان ۇقسىن عارىشتىڭ ،
توپىراققا تامىر تارتپاس ءتوبىرلار .
شانشىپ نايزا – كىرپىگىمدى كوككە مەن ،
كۇن كوزىنەن كۇرەڭىتكەن وت كورەم …
سوڭعى شۋاق مىڭ جۇرەككە توكتى اراي ،
و، داريعا !
ەرنىن تىستەپ ەپپەنەن .
جاپىراقتار ايىپ تاعىپ اڭعالعا ،
قاراڭعىلىق ءجايلاپ …
قالدىم ارماندا !
ساۋلە شاشىپ كەتۋ كەرەك – اۋ ،
مارجان- عۇمىر ۇزىلگەنشە …
بار ماڭعا !
رۋحىنداي وقىس سونگەن ساۋلەنىڭ ،
ەگىز جۇلدىز جاندى… جالعاپ داۋرەنىن .
ايحاي ،جالعان !
كەۋدەمە ەنگەن الەمنىڭ ،
كەرەمەتىن جىرلاي الماي اۋرەمىن…
———————————————–
kerey.kz
پىكىر قالدىرۋ