КРИМИНАЛ МЕН ТЕРРОРИЗМДІ ШАТАСТЫРМАЙЫҚ
kerey.kz
Кейінгі кезде кәдімгі криминал мен терроризмді шатастыру етек ала бастаған сияқты. Алматыда бүгін, 18-шілде күні орын алған оқиғаға байланысты әлеуметтік желілерде оны діни фундаментализмнен көрушілік те, асыл дініміз Исламға жала жабушылық та байқалып жатты. Іс жүзінде бұл террористік актіден гөрі кәдімгі криминалға ұқсайды.
Ресми деректер бойынша қарастырғанда күдікті Алматы аудандық ішкі істер басқармасына кірмек болғанда посттағы полиция қызметкері оны тоқтатқан. Сөзге келіп қалды ма кім білсін? Күдікті жігіт оқ атып жарақаттап, полиция қызметкерінің автоматты қаруын тартып әкеткен. Анықталған деректерге қарағанда оның өткен жексенбіде бір әйелдің өліміне қатысы болған көрінеді. АІІБ сол іс бойынша келсе керек. Күдікті сол бетте көше бойында біреудің жеңіл көлігін тартып алмақ болып иесіне оқ атқан. ҚР ІІМ баспасөз қызметінің хабарлауына қарағанда күдікті артынан қуған «Боран» экипажын автоматпен атқылаған. Кейбір деректерде күдікті екеу делінеді. Абай мен Байзақов көшелері қиылысында олар мінген қара «Камри» автокөлігі тоқтатылған. Күдіктілердің бірі қызылордалық 27 жастағы жігіт Абылайхан мен Қазбек би көшелерінің қиылысында «Қазақконцерт» ғимаратының жанында оқ тиіп, қолға түскен. Сол жердегі атыста екі полицей жараланған. Күдіктінің іздестіріліп жатқан екінші сыбайласы да бүгін 16.30-да ұсталды.
Сөйтіп Алматыдағы бүгінгі атыста 4 адам (үшеуі полиция қызметкері) қаза болып, жетеуі ауруханаға түскен (жетеудің бесеуіне оқ тиген). Бұл ұйымдасқан әлде бір лаңкестік әрекет емес, нағыз криминалдық оқиға. Қала бойынша «террорлық қауіптің қызыл деңгейі» енгізілуі тек сақтық, қауіпсіздік мақсатта болар. Әйтпесе, төніп тұрған ұйымдасқан лаңкестік әрекет байқалмайды. Жалпы Қазақстанда террористік әрекеттерге ешқандай негіз жоқ.
Алматы үшін ауыр сынақ болған бүгінгі күнде қарақшылардың қолынан опат болған капитан Бауыржан Нұрмаханбетов, старшина Аян Ғаниев, сержан Мақсат Сәлімбаев бауырларымыздың отбасына қайғыларына ортақтасып көңіл айтамыз! Жараланып ауруханаға түскен құқық қорғау қызметкерлеріне Алла шипасын берсін. Тезірек сауығып қатарға қосылуына тілектеспіз!
Бүгін күн үшін билік тарапынан халыққа жетіспегені ақпарат қана болды. Сол ақпараттың жетімсіздігінен түрлі қауесет, бұрмаланған болжам, өрекпіген өсек желдей есті. Ақорда, қала әкімшілігі, ТЖ мұндайда халыққа ақпарат берудің желісі мен тәртібін алдын ала ойластырып қойғаны тиімді. Орынсыз дүрбелеңге жол берілмеуі керек.
Ал мені ойландырғаны – қылмыстық әрекеттің мотивациясы. Ол туралы кейінірек жазармын.
ҚАРАЛЫ КҮН ЖАРИЯЛАНСА?!
Криминал мен лаңкестікті шатастырмау туралы кеше жазғанмын. Алматыда өткен брифинг барысында ҚР Ішкі істер миинистрі Қалмұханбет Қасымов полиция қызметкерлеріне қарсы шабуыл жасаған қылмыскердің мақсаты олардан «кек алу болғанын» тайға таңба басқандай айтып берді. Сөйтіп қанды оқиға терроризмнен гөрі құқық қорғау органдарымен «разборкаға» жақын болып шықты.
Ресми дерек бойынша бұрын екі рет сотталған Руслан Күлікбаев «түрмеде отырғаны үшін» құқық қорғау органдары қызметкерлерінен кек алуды ұйғарған. Алматы аудандық ІІБ, одан кейін ҚР ҰҚК Алматы қаласы бойынша департаментіне шабуыл жасап жүргені содан екен. Қылмысы үшін әділетті жаза алған адамда кек болмайды. Ол мойынсұынып жазасын өтейді. Ал әділетсіз жазаға ұшыраған адамда өзін сондай жағдайға ұшыратқандарға қарсы өштік оянады. Ашыну оқыс әрекеттерге ұрындырады. Қылмыскер басынан кезінде осындай бір келеңсіздіктер өткен сияқты.
Құқық қорғау органдарының қызметкерлері әрбір адамға «қылмыскер» деп емес, «Адам» деп қарауды жандарына серік еткендері жөн бе деймін. Терроризм әдетте үрей туғызу үшін халықты көбірек қыруды мақсат етеді. Ал күдіктінің әрекеттік мотивациясы бүкіл қоғамға емес, тек құқық қорғау органдарына қарсы бағытталған. Сондықтан күдіктінің бұл қылмыстық әрекеттері оның қандай дінді ұстанғанына қарамастан криминалдық сипатта боғанын дәлелдейді.
Куәгерлер оның сыбайласы деп ойлаған жігіт қылмыскердің тырнағына ілініп қалған автокөлік жүргізушісі болып шықты.
Қанды оқиға 25 минутқа созылған. 10 сағат 54 минутта ол Алмалы аудандық Ішкі істер басқармасына кірген, ал 11 сағат 19 минутта қолға түскен. Соңғы деректерде шекара әскерінің тағы бір сардары қаза тапқаны айтылады. Сөйтіп бір бандиттің қолынан 5 адам қаза болып, 8 адам жараланған. Марқұмдардың отбасына қайғыларына ортақтасып тағы да көңіл айтамыз. Жараланғандар тезірек жазылсын!
Дәл осындай қанды оқиға алдыңғы күні, 17-шілдеде АҚШ-тың Луизиана штатының Батон-Руж қаласында орын алды. Иракта бұрын теңіз жаяу әскері қызметін атқарған Гэвин Лонг деген біреу афроамерикалықтарға қатыгездік танытқаны, сотсыз, тергеусіз қара нәсілді жасөспірімді өлтіріп тастағаны үшін тәртіп сақшыларынан кек алып, үш полицейді атып тастаған. Осының алдында Миннесота штатында тағы бір афроамерикалық полицейлердің қолынан қаза тапқан болатын. Осыдан соң қарсылық шаралары басталып, полицейлерге жекелеген тұлғалардың оқ ату оқиғасы жиілеп кеткен.
Кеше АҚШ Президенті Барак Обаманың өкімімен Батон-Руж қаласында полицейлерге шабуыл жасау оқиғасына байланысты 22 шілде (алдағы жұма) Қаралы күн деп жарияланды. Біздің елімізде де бес адамның жазықсыз құрбан болуына байланысты олар жер қойнына тапсырылатын күн Қаралы күн болып жарияланғаны дұрыс болар еді.
Пікір қалдыру