كوكباستاۋدا توپ جارعان
پرەزيدەنت كۋبوگى
كوكباستاۋدا توپ جارعان
الماتى وبلىسى اكىمدىگىنىڭ دەمەۋىمەن جامبىل اۋدانىنداعى «كوكباستاۋ» يپپودرومىندا قازاقستان رەسپۋبليكاسى پرەزيدەنتىنىڭ كۋبوگى ءۇشىن ەل تاۋەلسىزدىگىنىڭ 25 جىلدىعىنا كونستيتۋتسيا كۇنىنە وراي ۇيىمداستىرىلعان ات سپورتى تۇرلەرىنەن وتكەن ءدۇبىرلى جارىس ءوتتى. وعان قازاقستان پرەزيدەنتى كۋبوگىن جەڭىپ الۋ ءۇشىن رەسپۋبليكامىزدىڭ تۇكپىر-تۇكپىرىنەن كەلگەن شاباندوزدار مەن جالدارىنان جەل ەسىپ، اتقان وقشا زۋلاعان سايگۇلىكتەرىنىڭ قارىمى وسى جارىستا سىنالدى. سونىمەن قاتار كورشى قىرعىز ەلىنىڭ تۇلپارلارى دا جارىس جولىندا بوي كورسەتتى.
جۇرت تولىق جينالىپ، سايگۇلىكتەر سايلانىپ بولعانسوڭ قازاقستان رەسپۋبليكاسىنىڭ مەملەكەتتىك گيمنى ورىندالىپ، اۋەزدى ساز بيىككە قالىقتادى. حالىق الدىنداعى ساحنا تورىنە شىققان «ءسۇيىنباي سازى» فولكلورلىق-ەتنوگرافيالىق ءانسامبىلىنىڭ ونەرپازدارى ءان مەن كۇيدى توكپەلەپ مەرەكە شىرايىن كىرگىزدى.
پرەزيدەنت كۋبوگى جۇلدەسىنە ارنالعان ات سپورتى تۇرلەرىنىڭ جىل سايىن وتكىزىلۋى تۇعىرلى تاۋەلسىزدىگىمىزدىڭ ارقاسى دەسەك قاتەلەسپەيمىز. ات بايگەسىنە 7 اۆتوكولىك جانە اقشالاي سىيلىقتار بەلگىلەندى. مەجەلى ۋاقىتتا بەلگىلى اتبەگى، جارىستىڭ باس تورەشىسى ورىنتاي امىرعاليەۆ باستاعان شاباندوزدار جانكۇيەرلەر الدىنان سالتاناتپەن ساپ تۇزەپ ءوتتى.
ءدۇبىرلى جارىستىڭ سالتاناتتى اشىلۋ راسىمىندە، الماتى وبلىسىنىڭ اكىمى اماندىق باتالوۆ ەلىمىز ەگەمەندىگىن العاننان بەرى ەلباسىمىزدىڭ سارابدال ساياساتىنىڭ ارقاسىندا بەيبىت عۇمىر كەشىپ، ۇلتتىق قۇندىلىقتارىمىزدى قايتا جاڭعىرتىپ، اتا سالتىمىز جاندانىپ بەرەكەلى ەلگە اينالدىق. سالاۋاتتى ءومىر سالتىن قالىپتاستىرۋ، ات سوپرتى تۇرلەرىن دامىتۋ ءۇشىن، الماتى وبلىسىندا كوپتەگەن شارالار جۇزەگە اسىرىلدى. ءار ءتۇرلى دەڭگەيدەگى ۇلتتىق سپورت جارىس تۇرلەرىن تۇراقتى تۇردە وتكىزىپ كەلەدى. سونىڭ ءبىرى بۇگىنگى قازاقستان رەسپۋبليكاسى پرەزيدەنتىنىڭ كۋبوگى ءۇشىن وتكىزىلىپ وتىرعان رەسپۋبليكالىق جارىس. ءبىز ەجەلدەن ات قۇلاعىندا ويناپ جەلمەن جارىسىپ سايگۇلىك باپتاعان ەلدىڭ ۇرپاعى ەكەنىمىزدى ماقتان تۇتامىز دەي كەلە، كونستيتۋتسيا كۇنىمەن قۇتتىقتاپ، ءدۇبىرلى دودا جۇزدەن جۇيرىك، مىڭنان تۇلپار شىعاتىن سايگۇلىكتەرگە، شاباندوزدارعا ساتتىلىك تىلەپ، ۇيىمداستىرۋشىلارعا ريزاشىلىعىن ءبىلدىردى.
تەرى الىنىپ، بابىنا كەلگەن 29 تاي 5شاقىرىم جارىس جولىنا شىعىپ، دالا ءتوسىن دۇبىرلەتتى. سوڭعى اينالىمدا توپ جارىپ مارەگە جەتكەن جامبىل اۋدانىنڭ تۋماسى احاتتىڭ يەلىگىندەگى «جۇلدىزى» ءبىرىنشى بولسا، قاراساي اۋدانىنىڭ نامىسىن قورعاعان جانقۇليەۆتەر اۋلەتىنىڭ «تەمىرى» ەكىنشى، كوكسۋ اۋدانىنان مۇرات كۇلتەنوۆتىڭ «ەركەتورىسى» ءۇشىنشى، الاكول اۋدانىنان بايباتىر ءساتىبالديننىڭ «ناركۇرەڭى» ءتورتىنشى، ەسكەلدى اۋدانىنان اقىلباي اقبەرلىننىڭ «كۇنقۋارى» ءوزارا ءبولىستى. اراسىندا جىگىتتىڭ ەپتىلىگى مەن جىلدامدىعىن انىقتايتىن تەڭگە ىلۋدە ءمارتجان مەيىرجاننان ەشكىم اسا المادى. 9 شاقىرىمدىق جورعا جارىسىنا 24 جورعا شىعىپ، سۋ توگىلمەس جورعالار ىشىنەن ويقاستاپ جەتكەن جامبىل اۋدانى نامىسىن قورعاعان اسىلبەك بوكەباەتىڭ «جويقىنى» ءبىرىنشى ورىن، شىعىس قازاقستان وبلىسىنان كەلگەن نيكولاي شاپارەۆتىڭ «ەەلەگنتى» ەكىنشى ورىن، ءۇشىنشى ءتورتىنشى ورىنداردى قىرعىزستان ەلىنەن اليپبەك ءجۇنىسوۆتىڭ «گانگى» زاميربەك مۇقاشەۆتىڭ «پلەننيكى» ءوزارا بولىسسە بەسىنشى ورىندى جامبىل اۋدانىنان اسىلبەك بوكەباەۆتىڭ «سۇلۋتورىسى» الدى. 11 شاقىرىمدىق قۇنان بايگەدە 49 قۇنان باق سىنادى. بىردەن توپالا جۇيتكىگەن جۇيرىكتەر اراسىنان وق بويى وزى شىعىپ، قۇيىنداي قۇيعىتىپ مارەگە جەتكەن جامبىل وبلىسىنان مۇرات وسەرباەۆتىڭ «اجارتورىسى» ءبىرىنشى، تاعىدا جامبىل وبلىسىنان الىبەك جۇمابەكتىڭ «جادراتى» ەكىنشى، قاراساي اۋدانىنان سەيتجان قايقىباەۆتىڭ «ساميرى» ءۇشىنشى، جامبىل وبلىسىنان ەسبول شىڭتاسوتىڭ «تاۋسامالى» ءتورتىنشى، قاراساي اۋدانىنان مايلىباەۆتار اۋلەتىنىڭ «ميلەديىنە» بەسىنشى ورىن بۇيىردى. 16 شاقىرىمدىق توپ بايگەدە 40 ات باق سىناسىپ توپجارعان قاراساي اۋدانىنان ءالنۇر نازارباەتىڭ «سۇلىكقاراسى» ءبىرىنشى، جامبىل اۋدانىنان ۇلان ءوماروۆتىڭ «بەرىكتاسى» ەكىنشى، جامبىل وبلىسىنان مۇرات وسەرباەتىڭ «شەحريزاتى» ءۇشىنشى، بالقاش اۋدانىنان نارىمبەت ادىباەۆتىڭ «شايكۇرەڭى» ءتورتىنشى ، قاراساي اۋدانىنان ءالنۇر نازارباەتىڭ «بوسمويىنى» بەسىنشى ورىننان كورىندى. كەزەك 25 شاقىرىمدىق الامان بايگەگە دە كەلىپ، ۇمىتتەرىن ۇكىلەگەن 39 تۇلپادىڭ اراسىنان 9 اينالىمعا شىداس بەرگەن جەلتۇياقتاردىڭ ايى وڭىنان تۋدى دەسە دە بولادى. سونىمەن قاراساي اۋدانىنان ءالنۇر نازارباەۆتىڭ «ميلليونەرى» ءبىرىنشى، جامبىل وبلىسىنان كەلگەن سەرىك سۇلتانباەۆتىڭ «اتيلاسى» ەكىنشى، قاراساي اۋدانىنان ءالنۇر نازارباەۆتىڭ «قوزىكۇرەڭى» ءۇشىنشى، جامبىل وبلىسىنان ەسبول شىڭتاسوۆتىڭ «سامالى» ءتورتىنشى، ماڭعىستاۋلىق ابدىعالي تاڭاتاروۆتىڭ «دجەكپوتى» بەسىنشى بولىپ مارە سىزىعىن باستى.
جەڭىمپازدار مەن جۇلدەگەرلەردى ماراپاتتاۋ راسىمىندە، 25 شاقىرىمدىق الامان بايگەدە مارەگە قارا ءۇزىپ جەتكەن «ميلليونەر» دەگەن اتتىڭ يەسى، ءالنۇر نازارباەۆقا، كسرو-نىڭ ەڭبەك سىڭىرگەن سپورت شەبەرى، ماسكەۋ وليمپياداسىندا قازاقستاننان شىققان تۇڭعىش وليمپيادا چەمپيونى جاقسىلىق ۇشكەمپىروۆ پرەزيدەنت كۋبوگى مەن جول تالعامايتىن اۆتوكولىكتىڭ كىلىتىن تابىستادى. بايگەنىڭ باسقا دا تۇرلەرىنە تىگىلگەن جەڭىل اۆتوكولىكتەر مەن اقشالاي سىيلىقتاردى الماتى وبلىسى ءماسليحاتىنىڭ حاتشىسى سەرىك مۇقانوۆپەن الماتى وبلىسى ارداگەرلەر كەڭەسىنىڭ توراعاسى ەرمەك كەلەمسەيتوۆ تابىستادى. ءدۇبىرلى جارىس وتكەن، كوكباستاۋ سپپودرومىن جۇرتشىلىق قيماي تارقاستى.
كوگەداي شامەرحان
kerey.kz
پىكىر قالدىرۋ