مەملەكەت باسشىسى استاناعا الەمنىڭ 39 ەلىنەن كەلگەن دۇنيەجۇزىلىك قۇرىلتايدىڭ بارلىق قاتىسۋشىلارىنا ارناپ ءسوز سويلەدى.

ەلباسى العاشقى قۇرىلتاي وتكەننەن بەرگى 25 جىل ىشىندە قازاقستاننىڭ جەتكەن جەتىستىكتەرىن جانە ەلىمىزدە جۇرگىزىلگەن رەفورمالاردى اتاپ ءوتتى.

نۇرسۇلتان نازارباەۆ رۋحاني جاڭعىرۋ اياسىندا ىسكە اسىرىلىپ جاتقان 6 جوباعا، سونىڭ ىشىندە قازاق قارپىنىڭ لاتىن الىپبيىنە كوشۋى، گۋمانيتارلىق باعىتتاعى ۇزدىك 100 وقۋلىقتى قازاق تىلىنە اۋدارۋ، «تۋعان جەر»، «قازاقستاننىڭ كيەلى جەرلەرىنىڭ گەوگرافياسى»، «جاھانداعى زاماناۋي قازاقستاندىق مادەنيەت»، «قازاقستانداعى 100 جاڭا ەسىم» سياقتى جوبالارعا ەرەكشە توقتالدى.

قازاقستان پرەزيدەنتى مەملەكەتىمىز بەن قوعام تاراپىنان قانداستارىمىزدى قولداۋدىڭ ماڭىزدىلىعىن ايتىپ، «وتانداستار» قورىن قۇرۋدى تاپسىردى.

– قور دۇنيەجۇزى قازاقتارىنىڭ قاۋىمداستىعىمەن بىرلەسىپ، قانداستارىمىزعا قولداۋ كورسەتۋدىڭ تەتىكتەرىن انىقتاپ، ءتيىستى كەشەندى باعدارلاما ازىرلەۋى قاجەت، – دەدى ەلباسى.

سونداي-اق، مەملەكەت باسشىسى ەلشىلىكتەرگە قازاقستانعا ورالۋشىلاردىڭ قۇجاتتارىن دايىنداۋ جانە ولارعا كەڭەس بەرۋ جونىندەگى جۇمىستاردى كۇشەيتۋدى تاپسىردى.

– سونىمەن قاتار، جاستارعا قولداۋ كورسەتۋ قاجەت. ۇكىمەتكە وتانداستارىمىزدىڭ جوعارى ءبىلىم الۋىن قولجەتىمدى ەتۋ ءۇشىن ولارعا بولىنگەن كۆوتانى 2 ەسە كوبەيتۋدى تاپسىرامىن. ۇكىمەت شەتەلدەگى قانداستارىمىزدىڭ انا تىلىندە ءبىلىم الۋ مۇمكىندىكتەرىن قاراستىرۋى كەرەك، – دەدى نۇرسۇلتان نازارباەۆ.

بۇدان بولەك، قازاقستان پرەزيدەنتى ىرگەلەس ەلدەردە مەملەكەتتىك تەلەارنالاردىڭ كورسەتىلۋى مەن مەرزىمدى ءباسپاسوزدىڭ تارالۋ ماسەلەلەرىن پىسىقتاۋ، قانداستارىمىز اراسىنداعى دارىندى جانە كاسىبي مامانداردى ەلگە تارتىپ، ولاردى بەيىمدەۋ تەتىكتەرىن قاراستىرۋ، ەلىمىزدىڭ وڭتۇستىگىنەن سولتۇستىك وبلىستارىنا قونىس اۋدارۋ باعدارلاماسىنا قاتىسقان ازاماتتارىمىزدىڭ ورنالاسۋىنا جاعداي جاساپ، ولاردى جۇمىسپەن قامتۋ جونىندە تاپسىرمالار بەردى.

ەلباسى ءسوزىنىڭ سوڭىندا قۇرىلتايعا قاتىسۋشىلارعا استانانى ارالاپ كورىپ، «ەكسپو-2017» مامانداندىرىلعان كورمەسىن تاماشالاۋ جونىندە ۇسىنىس ايتتى.

قۇرىلتاي سوڭىندا مەملەكەت باسشىسى شەتەلدەگى اعايىننىڭ اتامەكەندى ۇمىتپاي، ونى ءاردايىم قۇرمەت تۇتۋعا شاقىردى.

– شەتەلدەگى قازاقتاردىڭ ەلگە ءجيى كەلىپ، تۋعان جەرىمەن بايلانىستارىن نىعايتىپ وتىرعانى دۇرىس. قاي ەلدە تۇرساڭىزدار دا، ءاردايىم قازاقستاندى جۇرەكتەرىڭىزدىڭ تورىندە ۇستاڭىزدار. قازاقتىڭ تاريحي وتانى بىرەۋ-اق. ول – قازاقستان، – دەپ تۇيىندەدى نۇرسۇلتان نازارباەۆ.