كوز قاراس سۋرەتتەر سويلەيدى الەۋمەت
ساردوبا، روگۋن، اەس.
kerey.kz
الاپات اپات بولىپ، قالىڭ ەل سۋعا كەتىپ جاتقاندا بيلىك ويناپ جاتقاندار وزبەكستانعا نوتا جىبەرەمىز بە، جوق پا دەگەندى دە اقىلداسپاپتى. نوتامىزدى دايىنداپ قويدىق دەگەن ۆيتسە-ءمينيستردىڭ سوزىنە قاراعاندا، شەكارادا سالىنىپ جاتقان سۋ قويماسى جونىندە قازاقستان “بىرنەشە رەت” سۇراسا دا وزبەكستان جوندەم جاۋاپ بەرمەپتى. ءبىرى كەلىپ، ءبىرى كەتىپ جاتقان شەنەۋنىكتەر ءسىرا، ء“بىز سۇرادىق، مىندەتىمىزدەن قۇتىلدىق” دەپ جىلى جاۋىپ قويسا كەرەك. تابانداپ تۇرماعان، جەرىنە جەتكىزبەگەن. ايتپەسە، حالىقارالىق زاڭ نورماسىن بۇزدى دەپ بىرىككەن ۇلتتار ۇيىمىنا ارىزدانار ەدى، الەمنەن بەيتاراپ ساراپشى شاقىرار ەدى. ىزدەدىم، ونداي جوق. ساردوبا سالىنسا، تىم بولماعاندا سىرداريا سۋالماي ما، كىشى ارالعا زار بولمايمىز با دەگەن دە ەسەپ-قيساپ جوق. 
ساردوبانىڭ ماسەلەسى ەكى جەمقور جۇيەنىڭ اراسىندا جالعان اعايىنگەرشىلىكپەن، بالكىم، سەن ءىش، مەن ءىش سالتاناتتى داستارحان باسىندا ءوزارا دوستىق پەن تاتۋلىق ءۇشىن نەتىپ تۇرعاندا شەشىلىپ كەتسە، تاڭعالمايمىن.
يسلام كاريموۆ تاجىكستانعا روگۋن گەس-ءىن سالدىرمايمىن، كەرەك بولسا سوعىسامىز دەپ ءومىر بويى كونبەپ ەدى. روگۋن سالىنسا، بىرىنشىدەن وزبەكستانعا ءامۋداريانىڭ سۋى جەتپەيدى، ەكىنشىدەن 335 مەتر بيىككە، سەيسميكاسى وتە قاۋىپتى تاۋعا سالىناتىن، “ورتالىق ازيادا تەڭدەسى جوق” روگۋن گەس-ءى جارىلسا ورتالىق ازيانى جوق قىلادى. بيىكتىگى ون مەتر توپان سۋ كوزدى اشىپ جۇمعانشا وزبەك، قازاق جەرىن قالا-مولاسىمەن قوسا تۇگەل شايىپ كەتەدى. بۇل تۇرعىدا وزبەك ديكتاتورىنىڭ ۇستانىمى بىزگە دە ءتيىمدى بولعان. ەلباسى دا، تۇرىكمەنباشى دا، تاجىكباسى دا، قىرعىز پرەزيدەنتتەرى دە كاريموۆپەن قىرباي بوپ كەتتى. كاريموۆ ءولىپ، ءبارىنىڭ قۇدايى بەردى. ميرزياەۆ نازارباەۆتىڭ ليدەر ەكەنىن مويىنداي سالدى. ەسەسىنە 2017 جىلدارى جەتىسايدان جەر الىپ، باسقا جەردەن جەر بەرە قويدى. ساردوبانىڭ اشىلعانى دا سول كەز. ءبىزدىڭ جۇرت پالەندەي نارازى بوپ، وتىرىك بولسا دا بۇلدانباپتى. 
ميرزياەۆ راحمونعا دا روگۋنىڭدى سالساڭ سالا بەر دەدى. ءسويتىپ ەندى بىرەر جىلدا ورتالىق ازيانىڭ ءدال توبەسىنە الاپات سۋ جينالاتىن بولدى. اۋعان سودىرلارى ەرىككەندە تاجىكستانعا كىرىپ شىعا سالاتىنىن جانە جەمقور تاجىك ديكتاتۋراسىن ەسكەرسەك، تاۋ باسىنداعى گەس-ءتىڭ قاۋىپسىزدىگىنە ەش كەپىل جوق.
ميرزياەۆتىڭ ءوزى دە قاراپ وتىرماي، قازاقستان شەكاراسىنان 40 كم جەرگە اتوم ەلەكتر ستانساسىن سالاتىن بولدى. 2018 جىلى رەسەيمەن قول الىستى. 2028 جىلى اتوم سۆەتىن جاعىپ وتىرادى.
بالقاشقا اەس سالدىرمايمىز دەپ شۋلادىق قوي؟ شاردارا سۋ قويماسىنىڭ ءدال تۇبىنە سالعالى جاتقانىن بايقاماعان سياقتىمىز. ءسىرا، سوناۋ الىستا، بىزگە قاتىسى شامالى دەپ ۇقساق كەرەك. وكىمەتىمىز ء“اۋ، بۇلارىڭ قالاي، حالىقارالىق زاڭ، پاكت، اكت دەگەن بار ەمەس پە دەگەن ەكەن، وزبەكستان “وعان قول قويمادىق” دەپتى. “ساعان قول قويدىق” دەگەنى. سونىمەن اڭگىمە ءتامام بولعان. قاتتى ايتۋعا باتپايمىز، ليدەر ەكەنىمىزدى مويىنداپ قويعانى بار، ارعى جاعىندا پۋتين تۇر ءبىر قاپ كومپروماتىمەن دەگەندەي.
ال، ەندى توپىراق توگىپ، تاس ءۇيىپ، بەتون قۇيىپ، قاراپايىم بوگەت سالا الماعان، تسەمەنتىن ساتىپ، ارماتۋراسىن شارباققا پايدالانعان وزبەكستاننىڭ جەمقور جۇيەسى جوعارى تەحنولوگيالى اەس-ءتى ۇستاپ تۇرا الا ما؟
بۇل اەس سالىنا قالسا، سوسىن جارىلا قالسا، بيلىك ويناپ، ويىنى وسىلعاننىڭ كوكەسى سوندا بولادى.
پىكىر قالدىرۋ