رەسەيدىڭ چەليابى وبلىسىندا تۇراتىن قازاقتار قۇلبابا باتىردى جىر قىلىپ ايتادى. قۇلبابا باتىرلىعىمەن تانىلعان. ورال بويىن مەكەن قىلعان قازاقتار سول كەزدە كەدەي-كەپشىكتىڭ مۇڭىن مۇڭداپ، جوعىن جوقتاپ، كوتەرىلىسكە باسشى بولعان ەمەليان پۋگاچەۆتى قابا ساقال اق پاتشا دەپ اتاعان. ونىڭ قالىڭ قولىنا قوسىلعان باشقۇرت باتىرى سالاۋات يۋلاەۆتىڭ تۋى استىندا جۇزدەگەن قازاق ساربازدارى شايقاسقان.

بىردە قازاقتىڭ ءبىر شوعىر اۋىلى قازىرگى ماگنيتوگورسك قالاسىنىڭ ماڭايىنداعى جانتاس تاۋىنا ات باسىن تىرەيدى. قاندى شايقاستان ابدەن تيتىقتاعان، حالقى قويداي قىرىلىپ، ازىپ-توزعان ەل وسى جەرگە تابان تىرەپ، ءوزارا اقىلداسىپ، ءبىر توقتامعا كەلەدى. جاۋدان قورعانۋعا وت-قارۋ كەرەك بولعاندىقتان، زەڭبىرەك قۇيۋدى ۇيرەنۋ ءۇشىن قۇتتىقادام ءبيدىڭ بالاسى قۇلبابانى باس قىلىپ بىرنەشە جىگىتتى كورشىلەس ورىس قالالارىنا اتتاندىرادى. مىنە، وسىلايشا زەڭبىرەك قۇيۋ ءىسىن مەڭگەرگەن قۇلبابا كەيىن پۋگاچەۆ جورىعىنا قوسىلادى.

قۇلبابا تۋرالى اتاقتى اقىن اقسۇلۋ ورىسبايقىزى تولعاۋ جىر شىعارعان:

اۋەلدە تەمىرتاستىڭ كەنىن اشىپ،

سول كەننەن ءبىزدىڭ ەلگە تەمىر تاسىپ.

سالدىرىپ ەل شەتىنە قارا دۇكەن،

تەمىردى سومداپ سوققان كورىك باسىپ،

بولىپتى ءبىزدىڭ ەلدە قۇلبابا اتتى

ءبىر ۇستا ەش كورمەگەن شارشاپ-جاسىپ.

قازاق ۇستاسى قۇيعان زەڭبىرەكتەردى قازاق ساربازدارى شوگىپ جاتقان ەكى تۇيەنىڭ وركەشتەرى اراسىنا سالىپ، اتاتىن بولعان. قۇلبابا باتىردىڭ اتا تەگى تۋرالى ەكى ءتۇرلى پىكىر بار. كەيبىرەۋلەر ونى قىپشاقتان شىققان دەسە، جەرگىلىكتى تۇرعىنداردىڭ ءبىرازى جاعالبايلىنىڭ باتىرى دەپ ەسەپتەيدى.

ماتەريال اۆتورى – اقىلبەك شاياحمەت

تولىقتىرۋ رەتىندە!

رەسەيدىڭ ءبىزدىڭ قوستاناي وبلىسىمەن شەكارالاس چەليابينسك وڭىرىندە 2011 جىلعى دەرەكتەر بويىنشا شامامەن 40 000 شاماسىندا قانداستارىمىز تۇراتىن بولسا، ونىڭ 4 000 استامى ماگنيتوگورسك قالاسىندا ءومىر سۇرەدى. ماگنيتوگورسكىدە «بەرەكە» اتتى قازاق ۇلتتىق-مادەني قوعامدىق ۇيىمى جۇمىس ىستەيدى، ايتقانداي، وسى ماگنيتوگورسك ماڭى كەزىندە قىز جىبەكتىڭ جۇرتى ەدى!

كەزىندە “ماگنيتوگورسك جۇمىسشىسى” اتتى قازاق تىلىندە گازەت شىعىپ تۇرعان بولاتىن.