Reseydiñ Çelyabi oblısında twratın qazaqtar Qwlbaba batırdı jır qılıp aytadı. Qwlbaba batırlığımen tanılğan. Oral boyın meken qılğan qazaqtar sol kezde kedey-kepşiktiñ mwñın mwñdap, joğın joqtap, köteriliske basşı bolğan Emel'yan Pugaçevtı qaba saqal aq patşa dep atağan. Onıñ qalıñ qolına qosılğan başqwrt batırı Salauat YUlaevtıñ tuı astında jüzdegen qazaq sarbazdarı şayqasqan.

Birde qazaqtıñ bir şoğır auılı qazirgi Magnitogorsk qalasınıñ mañayındağı Jantas tauına at basın tireydi. Qandı şayqastan äbden titıqtağan, halqı qoyday qırılıp, azıp-tozğan el osı jerge taban tirep, özara aqıldasıp, bir toqtamğa keledi. Jaudan qorğanuğa ot-qaru kerek bolğandıqtan, zeñbirek qwyudı üyrenu üşin Qwttıqadam bidiñ balası Qwlbabanı bas qılıp birneşe jigitti körşiles orıs qalalarına attandıradı. Mine, osılayşa zeñbirek qwyu isin meñgergen Qwlbaba keyin Pugaçev jorığına qosıladı.

Qwlbaba turalı ataqtı aqın Aqswlu Orısbayqızı tolğau jır şığarğan:

Äuelde Temirtastıñ kenin aşıp,

Sol kennen bizdiñ elge temir tasıp.

Saldırıp el şetine qara düken,

Temirdi somdap soqqan körik basıp,

Bolıptı bizdiñ elde Qwlbaba attı

Bir wsta eş körmegen şarşap-jasıp.

Qazaq wstası qwyğan zeñbirekterdi qazaq sarbazdarı şögip jatqan eki tüyeniñ örkeşteri arasına salıp, atatın bolğan. Qwlbaba batırdıñ ata tegi turalı eki türli pikir bar. Keybireuler onı qıpşaqtan şıqqan dese, jergilikti twrğındardıñ birazı Jağalbaylınıñ batırı dep esepteydi.

Material avtorı – Aqılbek Şayahmet

Tolıqtıru retinde!

Reseydiñ bizdiñ Qostanay oblısımen şekaralas Çelyabinsk öñirinde 2011 jılğı derekter boyınşa şamamen 40 000 şamasında qandastarımız twratın bolsa, onıñ 4 000 astamı Magnitogorsk qalasında ömir süredi. Magnitogorskide «Bereke» attı qazaq wlttıq-mädeni qoğamdıq wyımı jwmıs isteydi, aytqanday, osı Magnitogorsk mañı kezinde Qız Jibektiñ jwrtı edi!

Kezinde “Magnitogorsk jwmısşısı” attı qazaq tilinde gazet şığıp twrğan bolatın.