ءفيلمنىڭ جەلىسى ۇلى ابايدىڭ اكەسى، اتاقتى دالا كەمەڭگەرى قۇنانباي وسكەنبايۇلىنىڭ ونەگەلى ءومىرىنىڭ ءبىر كەزەڭىن قامتيدى.

تاريحتان بەلگىلى، قۇنانبايعا ەل بيلەۋ ءىسى، ودان قالدى اعايىن اراسىنداعى شيەلىنىستەر مەن رۋارالىق داۋ-دامايلاردى شەشۋ وڭايعا تۇسكەن جوق. سونداي ساتتەردە ول قاشاندا ادىلەتكە جۇگىنگەن. قۇنانباي ءوز حالقىنىڭ جاناشىر پەرزەنتى رەتىندە قالىڭ بۇقارا الدىنداعى قارىزى مەن پارىزىن تەرەڭ تۇسىنگەن جان. فيلمدە قۇنانبايدىڭ كورەگەندىگى، دانىشپاندىعى، ادىلدىگى، ءداستۇردى قۇرمەتتەيتىندىگى انىق كورسەتىلەدى.

رەجيسسەر كينوكارتينادا قۇنانبايدىڭ تەك جەكە باسى عانا ەمەس، سونىمەن قاتار، XIXعاسىرداعى قازاق قوعامىنىڭ شىنايى كەلبەتىن كورسەتۋگە تىرىسىپتى.

«بۇل تىڭ شەشىمدەرگە تولى تۋىندىدا قازاقتىڭ وتكەن ەسكى ءومىرىن دە كورۋگە بولادى. فيلمدە جالپى قۇنانبايدىڭ وزگە دە قىرلارىن اشقىمىز كەلدى. قۇنانباي – اسا كۇردەلى تۇلعا، بيلىك تىزگىنىن ۇستاعان كەزىندەگى قايراتكەرلىگى قاراما-قايشىلىقتارعا تولى. ول بي، بولىس، اعا سۇلتان بولىپ بيلىكتىڭ ءۇش تۇتقاسىن قاتار ۇستاپ، شاريات جولىنا تۋرا كوزقاراسپەن قاراعان ۇلى ادام. قۇنەكەڭنىڭ وسىنداي ەرەكشە قىرلارىن ءبىر فيلمگە سىيدىرۋعا تىرىستىق. فيلم اباي اۋدانى، قاراۋىل اۋىلىندا ءتۇسىرىلدى. ءتۇسىرىلىم جۇمىستارى 1 اي 18 كۇندە ءبىتتى. ال، دايىندىققا تۋرا بەس جىلداي ۋاقىت جۇمسادىق. كينونى حاديشا بوكەەۆا اپامىزدان، كەشە دۇنيەدەن وزعان اشىربەك سىعاي اعامىزدان ءدارىس العان مەنىڭ ۇزەڭگىلەس دوستارىمنىڭ باسىن قوسىپ ءتۇسىردىم. ءتۇسىرىلىم بارىسىندا بەس جۇزدەي كيىز ءۇي تىكتىك. ءتىپتى، قارا داۋىل سوعىپ، 200-گە جۋىق كيىز ءۇيدى جەل كوتەرىپ كەتكەن كەزدەر دە بولدى. تاماشالاعان كورەرمەن قاۋىمنىڭ قازاقتىڭ ەسكى ومىرىنە ساياحاتتاپ قايتقانداي اسەر الاتىنىنا سەنىمىم مول» دەدى د.جولجاقسىنوۆ.

كوركەم ءفيلمنىڭ ستسەناريىن دوسحان جولجاقسىنوۆپەن بىرگە كەشە عانا دۇنيەدەن وتكەن الاش ارداقتىسى، جازۋشى تالاسبەك اسەمقۇلوۆ جازدى. ال، مۋزىكا اۆتورى – بەلگىلى كومپوزيتور تولەگەن مۇحامەدجانوۆ. فيلمگە تۇسۋگە ەلىمىزگە تانىمال اكتەرلارمەن بىرگە سەمەيدەگى اباي اتىنداعى جانە دوستوەۆسكي اتىنداعى تەاترلاردىڭ اكتەرلارى دا تارتىلعان.

ايتا كەتەيىك، فيلم جالپىۇلتتىق پروكاتقا 25-ءشى مامىردان باستاپ شىعادى.

baq.kz