اپاي، مەن ءسىزدى جاقسى كورەم…
kerey.kz
مۇعالىمنىڭ بالاسى بولدىم. تاڭدايىم تاقىلداپ تاقپاقتى ەرتە جاتتاپ، ءارىپتى ەرتە تانىعانىم دا سوندىقتان بولار… “مۇعالىمنىڭ بالاسى” دەگەن قالىپقا سالىندىم. ول نە؟ “مۇعالىمنىڭ بالاسى ەكى الۋعا بولمايدى”، “مۇعالىمنىڭ بالاسى ءتارتىپسىز بولۋعا بولمايدى”، “الىسۋعا بولمايدى”، “جۇلىسۋعا بولمايدى”… قاپتاپ كەتكەن “بولمايدىلاردى” كىم شىعارعانىن بىلمەيمىن، ايتەۋىر، باسقاعا “بولاتىن” نارسەنىڭ ءبارى ماعان “بولمايتىن”. مۇعالىمنىڭ قىزى بولعانىم ءۇشىن!
نە عوي… بىراق سول شەكتەن تىس “بولمايدى”-عا ءوزىم اسا باعىنبادىم. كورشىنىڭ قىزىنىڭ سوزدىك قورىنداعى كەي سوزدەردى ۇيدە “پايدالاندىم”. ەسىمدە، سوندا ماعان مامام: ء“تىلىڭدى كۇيدىرەم”، – دەيتىن. ماعان سول قىزىق بولاتىن. قالاي كۇيدىرمەك؟ اۋزىمدا سىلەكەي (سۋ) بار، ءتىلىم قالاي جانادى؟ 5-6 جاسار بالانىڭ ويى سونداي بولدى. اقىرى مەن ءتىلىمنىڭ قالاي “كۇيەتىنىن” بىلمەي كەتتىم…
ەركە بولدىم. وتە ەركە. تەنتەكتىگىم دە، قۇداي سالماسىن، جەتىپ-ارتىلدى. مامامنىڭ جۇمىسقا وزىمەن ەرتىپ بارعانى ەسىمدە. مەكتەپتىڭ تاپ قاسىنداعى ينتەرناتقا – ساباققا تۇستەن كەيىن باراتىن قىزداردىڭ جانىنا قالدىرىپ، ساباعىنا كەتتى. ءبىر بولمەدە تۇرعان سونشاما كوپ اپپاق توسەكتى كورگەندە-ە-ە، باقىتتان باسىم اينالعان. ەندى شە، اجەمنىڭ ەرتەگىسىندەگى مامىق توسەگى بار حانشانىڭ بولمەسى سياقتى كورىندى عوي. توسەكتەن-توسەككە سەكىرىپ ويناعاندا-ا-ا مەكتەپتىڭ ديرەكتورى كىرىپ كەلەتىنىن قايدان بىلەيىن…(((((( مامامنىڭ سوسىن مەنى ينتەرناتتاعى قىزدارعا قايتىپ اپارعانى ەسىمدە جوق… كەرىسىنشە، وقۋشى قىزدارى كەزەكتەسىپ ۇيگە كەپ قارايتىن بولعان. ويتپەي شە؟ مەن جالعىز ەمەسپىن. باۋىرىم بار. ءوزىمنىڭ ويلاپ تاپپايتىنىم جوق تاعى…
قابىرعاعا ءىلىنىپ تۇرعان سورەنى اتكەنشەككە ۇقساتىپ، ءۇستىن بوساتىپ وتىرىپ العانىم… ول ازداي ءىنىمدى جانىما وتىرعىزىپ… ەكى جاعىنان قاعىلعان شەگە ەكى بالانى كوتەرسىن بە… بىلش ەتىپ قۇلاپ… پەرىشتەمىز قاققان بولار ەشتەڭە بولمادى. بىراق نە بولعانىن ۇقپاي تالاي ۋاقىتتان سوڭ جەرگە قونعان عارىشكەرلەردەي ۇزا-ا-اق جاتتىق. ال قىستىڭ كۇنى كىرەبەرىس اۋىزعى ءۇيدىڭ اينەگىن سىندىرىپ الدىمەن تونىمدى (قولعاپ رەزەڭكە ارقىلى جەلكەباۋعا تىگىلىپ، جەڭىمىزدەن شىعىپ جۇرەتىن), سوسىن مالاقايىمدى لاقتىرىپ، سوسىن ءوزىم ءتۇسىپ، ويناپ كەتۋدىڭ ورنىنا ەسىكتىڭ الدىنداعى قولجۋعىشتىڭ شۇمەگىنە ءتىلىمدى تيگىزىپ كورىپ… قان-جوسا بولىپ جابىسىپ تۇرعانىمنان-اق قانداي بالا بولعانىم بەلگىلى عوي. ايازدى كۇنى ءبىزدىڭ شىعىستا تەمىرگە ءتىلىن تيگىزىپ “جابىسپاعان” بالا جوق. مەنى تەمىرمەن “سۇيىستىرگەن” كورشىنىڭ قىزى بولاتىن. كەيىن جاقسىلاپ ءوشىمدى دە العام…)))))))
سونداي بۇزىقتى باققان مامانىڭ وقۋشىسىنىڭ تۋعان كۇنى ەكەن عوي بۇگىن! قۇتتى بولسىن، اپاي! ومىردە تەك قانا قۋانىش سىيلايتىن شۋاقتى كۇندەرىڭىز كوپ بولسىن!
وكىنىشكە قاراي، اۋىلعا “مۇعالىمنىڭ قىزى” اتانعانىممەن 10-اق جىل مامامنىڭ تەنتەك قىزى بولدىم… سودان كەيىن وقۋشىلارى دا، مەن دە ونى قايتىپ كورە الماي قالدىق….((((( ال مەن ءۇشىن ءسىز ءالى كۇنگە دەيىن سول باياعى كەنجە اپايدىڭ وقۋشىسىز…
پى.سىى. وقۋشى قىزدار دا قىزىق بولاتىن، ولەڭ ايتادى، بي بيلەيدى. باۋىرىم ەكەۋمىزگە كونتسەرت قويىپ بەرەدى. ال كەيبىر سىلقىم قىزدار شيفونەردەگى مامامنىڭ كيىمدەرىن كيىپ الىپ مۇعالىم بولىپ وينايتىن. اسىرەسە وكشەسى بيىك تۋفلي مەن ەتىكتەردى كيۋگە قۇمار بولاتىن. ويناپ بىتكەن سوڭ دىم بولماعانداي جيناپ قوياتىن…
ايگۇل بولاتحانقىزىڭىڭ facebook پاراقشاسىنان الىندى
پىكىر قالدىرۋ