ەرجان وتەمباەۆ بۇگىنگى سوت وتىرىسىنا ءبىر توپ بەلگىسىز اداممەن بىرگە كەلدى. ول سوتقا دەيىن دە، سوتتان كەيىن دە كوممەنتاري بەرۋدەن باس تارتتى. ءوزىن سەرگەك ءارى باتىل ۇستاعان بۇرىنعى تۇتقىن سۇراق قويعان ازاتتىق تىلشىسىنە «اۋلاق جۇرىڭىزدەرشى» دەدى.

قاستاندىقپەن ولتىرىلگەن التىنبەك سارسەنبايۇلىنىڭ اعاسى رىسبەك سارسەنبايۇلى سوت وتىرىسى باستالار الدىندا ازاتتىق تىلشىسىنە «قاستاندىققا كىمنىڭ تاپسىرىس بەرىپ، كىمنىڭ ۇيىمداستىرعانى ءالى بەلگىسىز بولعاندىقتان ەرجان وتەمباەۆتى مەرزىمىنەن بۇرىن شارتتى جازامەن بوساتۋ زاڭ تۇرعىسىنان دا، مورال تۇرعىسىنان دا مۇلدە دۇرىس ەمەس» دەپ مالىمدەدى.

قاستاندىقپەن ولتىرىلگەن التىنبەك سارسەنبايۇلىنىڭ اعاسى رىسبەك سارسەنبايۇلى. استانا، 28 مامىر 2015 جىل.

2014 جىلدىڭ اقپانىندا ەرجان وتەمباەۆتىڭ ۇكىمىن قايتا قاراعان سوت جازا مەرزىمىن 20 جىلدان 13 جىلعا قىسقارتىپ، ونى «قىلمىسقا ايداپ سالۋشى» دەپ تانىعان. ەرجان وتەمباەۆ 2006 جىلى وپپوزيتسيالىق ساياساتكەر التىنبەك سارسەنبايۇلى مەن ونىڭ جۇرگىزۋشىسىن جانە كۇزەتشىسىن قاستاندىقپەن ولتىرۋگە تاپسىرىس بەرۋشى رەتىندە سوتتالعان. قازاقستان باس پروكۋراتۋراسىنىڭ «التىنبەك سارسەنبايۇلىن ولتىرۋگە شىن مانىندە قازاقستان پرەزيدەنتىنىڭ بۇرىنعى كۇيەۋ بالاسى راحات اليەۆ پەن ۇلتتىق قاۋىپسىزدىك كوميتەتىنىڭ بۇرىنعى توراعاسى ءالنۇر مۇساەۆ تاپسىرىس بەرگەن» دەگەن مالىمدەمەسىنەن كەيىن وتەمباەۆتىڭ ۇكىمى قايتا قارالعان.

رىسبەك سارسەنبايۇلى قازاقستان قۇقىق قورعاۋ ورگاندارى اليەۆ پەن مۇساەۆتىڭ قاستاندىققا قاتىسىن دالەلدەي الماۋى سەبەپتى وتەمباەۆتى تۇرمەدەن شىعارماۋ كەرەك ەدى دەپ سانايدى.

سوت القاسى وتىرىسىندا جابىرلەنۋشى تاراپ وكىلى مارجان اسپاندياروۆا ەرجان وتەمباەۆتى مەرزىمىنەن بۇرىن شارتتى جازامەن بوساتۋ فاكتىسىنەن كەيىن قوعامدا «جەكە تۇلعاعا قارسى قىلمىس جاساعاندار جازادان قۇتىلىپ كەتۋى نەمەسە جازانى جەڭىلدەتۋىنە بولادى دەگەن وي ورنىعادى» دەپ مالىمدەدى.

– وتەمباەۆتىڭ جازاسىن جەڭىلدەتۋ جان تۇرشىكتىرەتىن قىلمىسقا ەل باسشىلىعىنىڭ قاتىسى بارىن دالەلدەمەي مە؟ – دەيدى مارجان اسپاندياروۆا.

ول توعىز جىلدىڭ ىشىندە، ءتىپتى ونى مەرزىمىنەن بۇرىن شارتتى جازامەن بوساتۋ ماسەلەسى قارالىپ جاتقان كەزدە دە ەرجان وتەمباەۆقا ءبىر دە ءبىر سۇراق قويۋ مۇمكىندىگى بەرىلمەگەنىن ايتتى.

ساياساتكەر التىنبەك سارسەنباەۆ. الماتى، 2005 جىل.

استاناداعى كاسساتسيالىق القا سۋديالارىنىڭ قارسىلىعىنا قاراماستان، رىسبەك سارسەنبايۇلى ەرجان وتەمباەۆتان ءىنىسىنىڭ قازاسىنا قاتىستى ءبىراز سۇراقتارعا جاۋاپ بەرۋىن ءوتىندى. ول التىنبەك سارسەنبايۇلىن قاستاندىقپەن ولتىرۋگە ناقتى كىمنىڭ تاپسىرىس بەرگەنىن دە سۇرادى.

– قويىلعان سۇراقتارعا قاتىستى ايتارىم، بۇل – وزگە سوت قارايتىن، وزگە تەرگەۋ امالدارىنا قاتىستى ماسەلە. ادامشىلىق تۇرعىدان العاندا، جابىرلەنۋشىلەردى دە تۇسىنۋگە بولادى، ولاردىڭ سۇراقتارىنىڭ وزىندىك قيسىنى بار. مەن ولاردى بەلگىلى ءبىر دارەجەدە تۇسىنەمىن. بىراق مىنا وتىرىستا زاڭدى باسشىلىققا الىپ، وسى ىسكە قاتىسى بار ماسەلەنى عانا قاراۋدى سۇرايمىن. ءبىر ماسەلەنى قاراپ وتىرىپ، وزگە جاققا بۇرا تارتىپ جاتىرمىز. ونى قاراۋدىڭ ۋاقىت جوعالتقاننان باسقا ەشبىر ءمانى جوق، – دەدى ەرجان وتەمباەۆ.

بىلتىر قاراشا ايىندا استاناداعى مامانداندىرىلعان اۋدانارالىق قىلمىستىق ىستەر سوتى مەرزىمىنەن بۇرىن شارتتى جازامەن بوساتۋ تۋرالى ءوتىنىشىن قاراعاننان كەيىن ەرجان وتەمباەۆ بوستاندىققا شىققان. پارلامەنت سەناتى اپپاراتىنىڭ بۇرىنعى باسشىسى تۇرمەدە سەگىز جىل وتىردى.

رەسمي بولجام بويىنشا، التىنبەك سارسەنبايۇلىن بۇرىنعى پوليتسيا قىزمەتكەرى، سول وقيعادان كەيىن سوتقا تارتىلىپ، ومىرلىك تۇرمە جازاسىنا كەسىلگەن كەسىلگەن رۋستام يبراگيموۆ ولتىرگەن. تەرگەۋ بولجامىنشا، بۇل ىسكە ساياساتكەردى ۇرلاپ اكەتۋدى ۇيىمداستىرعان قازاقستان ۇلتتىق قاۋىپسىزدىك كوميتەتى «ارىستان» ارنايى بولىمشەسى وفيتسەرلەرىنىڭ دە قاتىسى بار.

2006 جىلى اقپان ايىندا جۇمباق جاعدايدا قاستاندىقپەن ولتىرىلگەن ازاماتتاردىڭ – قازاقستان وپپوزيتسياسى باسشىلارىنىڭ ءبىرى التىنبەك سارسەنبايۇلى مەن ونىڭ كومەكشىلەرى ۆاسيلي جۋراۆلەۆ جانە باۋىرجان بايبوسىن ۇشەۋىنىڭ دەنەسى الماتى ماڭىنان تابىلعان. جابىرلەنۋشى تاراپتىڭ مالىمدەۋىنشە، سودان بەرى تەرگەۋ امالدارىندا ەشقانداي ىلگەرىلەۋ بولماعان جانە قىلمىسقا تاپسىرىس بەرۋشىنىڭ ەسىمى ءالى كۇنگە دەيىن اتالماعان.

سۆەتلانا گلۋشكوۆا

azattyq.org