- ساباعىمىز اۋىر، ونىڭ ۇستىنە تۇستەن كەيىن ساعاتىنا 500 تەڭگە تولەپ، اقىلى ساباقتارعا بارامىز. تاڭەرتەڭ كوڭىلىم الاڭ بولىپ ويانامىن. كەيدە وتىرىپ «تومەن ۇپاي الىپ قالسام قايتەمىن، اكە-شەشەمنىڭ جايى نە بولادى، تۋىستارىم نە ويلايدى» دەپ ۋايىمدايمىن. وسى ويلار جەگىدەي جەپ ءجۇر، – دەيدى ارايلىم قاراتاي.

سوڭعى قوڭىراۋدان كەيىن تۇلەكتەر كۇن سايىن مەكتەپتەگى قوسىمشا ساباقتارعا بارىپ ءجۇر. تاڭعى ساعات توعىزدان كەشكى التىعا دەيىن «قازاق ءتىلى»، «ورىس ءتىلى»، «قازاقستان تاريحى»، «ماتەماتيكا» جانە تاڭداعان ءپانى بويىنشا تەستكە دايىندالادى.

ارايلىم قاراتاي مەن اناسى مارينا سارسەنباەۆا. الماتى، 26 مامىر 2015 جىل.

ارايلىمنىڭ اناسى مارينا سارسەنباەۆا قىزى وقيتىن مەكتەپتە ورىس ءتىلى پانىنەن ساباق بەرەدى. ول «مىنا قوسىمشا ساباقتار بالالاردى مۇلدە دىڭكەلەتىپ جىبەردى. بيىل قىزىمنىڭ جۇيكەسى جۇقارىپ ءبىتتى، سەلقوس بولىپ بارادى» دەيدى.

- قازىر بالالار تاڭنان كەشكە دەيىن مەكتەپتە بولادى. مەنىڭشە، ودان دا ۇيدە، تىنىشتىقتا وتىرىپ دايىندالعانى دۇرىس سياقتى. مەكتەپتە ءبارىبىر بالانىڭ كوڭىلى بولىنەدى، دۇرىس تاماقتانبايدى عوي، – دەيدى مارينا سارسەنباەۆا ازاتتىق تىلشىسىنە.

ارايلىمنىڭ اناسى ۇبت سىناعىن الىپ تاستايتىن شىعار دەپ ۇمىتتەنەدى.

- ودان دا ەمتيحان تاپسىرىپ، مۇعالىممەن كوزبە كوز تىلدەسىپ، ويىن تىلمەن جەتكىزگەنى ءجون بولار ەدى. قىزىم تەست سۇراقتارى جاۋابىن قۇر جاتتاۋمەن ءجۇر. اينالدىرعان ەكى ساعات بالانىڭ تاعدىرىن شەشە سالادى. ۇبت-نى الىپ تاستاپ، ورنىنا بالاما بىردەڭە ويلاپ تاپسا ەكەن، – دەيدى ول ازاتتىق تىلشىسىنە.

ارايلىم كورگەنىن ەستە ساقتاۋ قابىلەتى مىقتى ەكەنىن ايتادى. ەستە جاقسى ساقتاۋ ءۇشىن ول جاۋاپتاردى ءتۇرلى تۇسپەن بەلگىلەيدى. جىل بويى ول 45 سىناق تەستتەرىن ساتىپ العان. بىراق ول «ماتەماتيكادان ناشارمىن» دەپ ۋايىمدايدى.

«سۇيىكتى ءپانى گەوگرافيا» ەكەنىن ايتقان ارايلىم «بۇكىل الەمدى ارالاپ شىققىم كەلەدى ءارى اعىلشىن تىلىنەن قينالمايمىن» دەيدى.

- جىل بويى اپتاسىنا ەكى رەت 400 تەڭگەدەن اقىلى تەست تاپسىرىپ جۇردىك.اقىلى تەستكە ءار وتباسى قىرۋار اقشا جۇمسادى. تەستكە تولەيتىن اقشا تاپپاي قينالعان وتباسىلار دا بار، – دەيدى ارايلىم قاراتاي.

ارايلىمنىڭ اناسى ايىنا 90 مىڭ تەڭگە (480 دوللارعا جۋىق) جالاقى الادى. اكەسى قۇرىلىس كومپانياسىندا ماۋسىمدىق جۇمىستار ىستەيدى.

ارايلىم قاراتايدىڭ ۇبت-عا دايىندالىپ جاتقان تەست جيناقتارى.

«مەنىڭ وقۋىمنىڭ اقشاسىن تولەۋگە اكە-شەشەمنىڭ شاماسى كەلمەيدى» دەگەن ارايلىم گرانتقا ءتۇسۋدى ارماندايدى. بىراق ول بىلىمىنە سەنەدى جانە ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ «الەۋمەتتىك-مادەني سەرۆيس» فاكۋلتەتىندە وقىعىسى كەلەدى. بۇل ۋنيۆەرسيتەتكە اۋىلدىق كۆوتامەن 86 بالمەن تۇسۋگە بولادى.

ارايلىم قاراتاي بوس ۋاقىتىندا تابيعات اياسىندا سەرۋەندەگەندى، ۆەلوسيپەد تەپكەندى جاقسى كورەدى، ادەبي كىتاپتى كوپ وقيدى. ول بۇرىن ءدامدى تاعامدار ازىرلەۋدى، ءبالىش ءپىسىرۋدى ۇناتاتىنىن، ال قازىر وعان ۋاقىتى جوق ەكەنىن ايتادى.

- ءبىزدىڭ مەكتەپ تەستتى ءبىرىنشى اعىممەن تاپسىراتىن بولدى. تەكسەرۋدەن وتەتىنىمىزدى ويلاپ ۋايىمدايدى ەكەنسىڭ. ەگەر اياقاستى بىردەڭە شىعىپ قالسا، ءبارىن ۇمىتىپ قالۋىڭ مۇمكىن. ءبىز تەست تاپسىراتىن اۋديتوريانىڭ بالكونىندا پوليتسەيلەر، ال ءار قاتاردى مۇعالىمدەر باقىلاپ تۇراتىنىن ايتتى. بىلتىر تاپسىرعان تۇلەكتەر «مۇعالىمدەر ارالاپ، شپارگالكاڭدى شىعار دەپ تالاپ ەتەدى. ءتىپتى شپارگالكاڭ جوق بولسا دا ايعايلاپ، ەسىڭدى شىعارىپ جىبەرەدى دە، ءبارىن ۇمىتىپ قالاسىڭ» دەيدى. مۇنى ويلاسام، تاماعىم قۇرعاپ كەتەدى، – دەيدى ارايلىم قاراتاي.

ول ءتيىستى پاندەردەن دايىن شپارگالكالاردىڭ باعاسى 500-1000 تەڭگە (شامامەن 2,6-5,2 دوللار) تۇراتىنىن دا بىلەدى. «مۇمكىن، ماتەماتيكادان شپارگالكاعا سۇيەنەتىن شىعارمىن» دەيدى ول.

- ءبارىن ۋاقىت كورسەتەدى، بىراق ۇبت-نى ءوز كۇشىممەن تاپسىرۋعا تىرىسامىن، – دەيدى ارايلىم قاراتاي.

ارايلىمنىڭ سىنىبى ۇبت تاپسىرعاننان كەيىن الماتى تۇبىندەگى ەسىك كولىنە بارىپ دەمالماق.

الما كەنجەبەكوۆا

azattyq.org