مادەنيەت جانە سپورت ءمينيسترى ارىستانبەك مۇحامەديۇلى BNews.kzپورتالىنىڭ ستۋدياسىندا وتكىزگەن ونلاين كونفەرەنتسيا بارىسىندا قازاق حاندىعى تۋرالى سەريال ءتۇسىرۋ جۇمىستارى اينالاسىندا تۋىنداعان ماسەلەلەرگە توقتالدى.

«بىلتىر بولجامدىق جوسپار قۇرىپ، الدىمىزعا ون سەريالى تەلەحيكايا ءتۇسىرۋ ماقساتىن قويعان ەدىك. «قازاقفيلم» كينوستۋدياسىنىڭ باسشىلىعى 1 ملرد 120 ملن تەڭگەنىڭ سمەتاسىن قۇرىپ، رەجيسسەر رۇستەم ابدىراشەۆ، پروديۋسەر ارمان اسەنوۆ، ستسەناريست سماعۇل ەلۋباەۆ باستاعان ءتۇسىرىلىم توبى وسى جۇمىسقا كىرىسىپ كەتتى. مەن، ارينە، بۇل شىعارماشىلىق توپتى جاقسى سىيلايمىن. ولار ءتۇسىرىلىم جۇمىستارى ءبىر پاۆيلوننىڭ اينالاسىندا، بەلگىلى ءبىر عيماراتتاردا جۇزەگە اساتىن، تاريحي وقيعالارمەن، مونولوگتارمەن سۇيەمەلدەنەتىن جاي عانا تەلەسەريال ەمەس، اۋقىمى الدەقايدا كەڭ ساپالى كوركەم فيلم تۇسىرگىلەرى كەلەدى. ماسەلەن، ءتۇسىرىلىم اياسىندا 500 جىلقى پايدالانىپ، سىعاناق، سارايشىق سىندى تاريحي قالالاردا بولعان وقيعالاردى تابيعات اياسىندا تۇسىرمەكشى. بۇل دەگەنىڭىز ۇلكەن دەكاروتسيانى قاجەت ەتەتىن اۋقىمدى جۇمىستار. سونداي-اق ولار مۇنداي تاريحي وقيعا (قازاق حاندىعىنىڭ 550 جىلدىعى – اگەنت ەسكەرتپ.) جىلدا بولا بەرمەيدى دەپ، سونىڭ ارقاسىندا كەز كەلگەن شىعارماشىلىق تۇلعا ءتارىزدى، ءوز ەسىمدەرىن، «قولتاڭبالارىن» تاريحتا قالدىرعىلارى كەلەدى. ارينە، مەن ولاردىڭ نيەتىن تولىق قولدايمىن»، – دەدى ارىستانبەك مۇحامەديۇلى.

ءمينيستردىڭ ايتۋىنشا، باستاپقىدا جوبانى تالقىلاۋ اياسىندا «قازاق حاندىعى قاشان قۇرىلدى؟»، «كەرەي مەن جانىبەكتەن كەيىن بولعان حاندار كىم؟» دەگەن سياقتى سۇراقتارعا جاۋاپ ۇسىناتىن تانىمدىق وقۋ قۇرالى بولاتىنداي دەرەكتى ماتەريال ءتۇسىرۋ جوسپارلانعان. الايدا شىعارماشىلىق ۇجىم بۇل فورماتتان شىعىپ، ۇلكەن كوركەم فيلم ءتۇسىرۋدى قالاپ وتىرعان كورىنەدى. بىراق وعان جۇمسالاتىن شىعىنداردى جوباعا بولىنگەن قارجى قامتي الار ەمەس.

«تالقىلاۋ كەزىندە، دوللارعا شاققانداعى جوبانىڭ 5 ملن بيۋدجەتى ولاردىڭ كوزدەگەن دەكوراتسيالارىن قۇرۋعا، جارقىن كوستيۋمدەر تىگۋگە، «ماسسوۆكاداعى» اسكەردىڭ ساۋىت-سايماندارىن ازىرلەۋگە جەتپەيتىنى ايتىلعان بولاتىن. سوندىقان ولار قوعامنىڭ كومەگىنە جۇگىنىپ، دەمەۋشىلەر تارتۋعا بولا ما دەگەن ۇسىنىس ايتتى. مەن، ارينە، كەلىسىم بەردىم. سوندىقتان، «قازاق حاندىعى تۋرالى فيلم تۇسىرۋگە قارجى جەتكىلىكسىز» دەگەن مالىمدەمەلەرى وعان دەمەۋشى تارتۋ ماقساتىندا جاسالعان بولۋى كەرەك دەپ ويلايمىن. جانە وسى ءساتتى پايدالانۋ ارقىلى بۇل ماسەلەگە قوعامنىڭ نازارىن اۋدارتىپ، قاۋقارى جەتەتىن قالتالى ازاماتتاردى كومەككە شاقىرامىن. بىراق كەز كەلگەن جاعدايدا «تىرناق استىنان كىر ىزدەيتىندەر» تابىلادى. وسى جاعدايدى باسقا باعىتقا بۇرىپ، ىرىتكى سالۋدى كوزەيتىندەردىڭ ارەكەتى وكىنىشتى، ارينە»، – دەپ ءتۇسىندىردى ۆەدومستۆو باسشىسى تاريحي سەريال اينالاسىندا تۋىنداعان ماسەلەنىڭ ءمان-جايىن.

ءمينيستردىڭ ايۋىنشا، «ماسقارا، ءتۇسىرىلىم جۇمىستارى توقتاپ قالىپتى» دەپ بايبالام سالۋعا نەگىز جوق. ءتۇسىرىلىم توبى ون سەريانىڭ بەسەۋىن بيىل تۇسىرۋگە ءازىر.

ءتىپتى، «قازاقفيلم» ىرگەسىندەگى بار دەكوراتسيانى پايدالانىپ، ون سەريانى دا ءتۇسىرىپ تاستاۋعا دايىن. بىراق بۇل جەردە كوزدەپ وتىرعان ماقسات الدەقايدا جوعارى. جانە سول ماقساتقا قول جەتكىزۋ ءۇشىن ىشكى رەزەرۆتەردەن قارجى قاراستىرىپ، دەمەۋشى ىزدەۋ جۇمىسىنا ءمينيستردىڭ ءوزى دە ارالاسىپ كەتكەن ەكەن.

«قازىر ولاردىڭ ۇسىنعان جاڭا سمەتاسى بويىنشا قوسىمشا 1 ملرد 125 ملن تەڭگە قاجەت. ياعني، سوما بولىنگەن قارجىدان ەكى ەسە ارتىق. بىلاي الىپ قاراسا، «ماسقارا!» دەيتىندەي ۇلكەن قارجى دا ەمەس. قازىر ماسەلە جوبانىڭ جانرىنا قاتىستى تۋىنداپ وتىر: جاي تەلەسەريال ءتۇسىرۋ نەمەسە اۋقىمدى بىرنەشە ءبولىمدى كوركەم فيلم ءتۇسىرۋ. جوباعا بارشا قازاقستان قوعامى اتسالىسسا دەيمىز. بۇل جوبا حالىقتىق جوباعا اينالۋى ءتيىس. مەن ءوز باسىم تۇسىرىلىمگە دايىندىق جۇمىستارىنا قاتىستىم. بۇيىرسا، ءتۇسىرىلىم قىركۇيەك ايىندا باستالادى دەپ وتىرمىز. شىعارماشىلىق توپ 15 جەلتوقسانعا دەيىن جوعارى ساپالى كوركەم فيلم جانرىندا 5 سەريا نەمەسە تەلەۆيزيالىق نۇسقاداعى 10 سەرياسىن تولىق اياقتاۋعا دايىن. بۇل ەندى قوسىمشا تابىلعان قارجى كولەمىنە بايلانىستى بولادى»، – دەدى مۇحامەديۇلى.

ۆەدومتسۆو باسشىسىنىڭ ايتۋىنشا، اينالاسىندا شۋ تۋعان 10 سەريالى كينوونىم قازاق حاندىعى تۋرالى باياندايتىن اۋقىمدى جوبانىڭ العاشقى قادامى عانا.

ەگەر تۋىندى كورەرمەننىڭ اراسىندا سۇرانىس تۋدىرسا، قازاق حاندىعى تۋرادى تاريحي جەلى الداعى جىلدارى دا جالعاسىن تابۋى مۇمكىن.

bnews.kz