سيريا مەن يراكتاعى تەرروريستەرمەن سوعىسۋ ءۇشىن جەرورتا تەڭىزىنىڭ شىعىس بولىگىنە اسا قۋاتتى اسكەري كۇش توپتاستىرىلىپ جاتىر. ولاردىڭ ءبىرازى تەڭىزدە بولسا، ءبىرازى قۇرلىقتا ورنالاسقان. دەرەكتەرگە قاراعاندا وڭىردەگى اسكەري تەحنيكانىڭ جالپى قۇنى 30 ملرد دولاردان اسادى.

جەرورتا تەڭىىزىنىڭ شىعىس بولىگىندە قازىر اقش-تىڭ 1 ۇشاق تاسىمالداۋشى كەمەسى، 1 ەسمينەتسى، 1 فرەگاتى، 1 سۇڭگۋىر قايىعى، 1 بارلاۋ كاتەرى، 1 ەلەكتروندى شابۋىل كەمەسى، 1 AEGIS كلاسىنداعى اۋە قورعانىسى كەمەسى، 2 لوگيستيكالىق قولداۋ كەمەسى ءجۇزىپ ءجۇر. ودان بولەك تۇركيانىڭ ىنجىرلىك اۋە بازاسىندا اقش-تىڭ 6 دانا F-15C جانە 6 دانا F-15E جويعىش ۇشاعى، 12 دانا ا-10 ۇشاعى، 12 دانا كس-135 تانكەر ۇشاعى، MQ-1 پيلوتسىز ۇشاتىن اپپاراتى بار. امەريكالىقتار وسى وڭىرگە 1200 اسكەرىن اكەلگەن كورىنەدى. ال، تەرروريستەرمەن كۇرەسكە ارناپ اكەلگەن اسكەري تەحنيكاسىنىڭ جالپى قۇنى 9 ملرد 456 ملن دوللارعا تەڭ ەكەن.

ۇلىبريتانيا بولسا ايماققا 1 ەسمينەتس، 1 فرەگات، 1 سۇڭگۋىر قايىعىن جىبەرگەن. بۇلاردىڭ جالپى قۇنى 3 ملرد 111 ملن دوللار.
گەرمانيا ىنجىرلىك بازاسىندا 550 اسكەر، 6 دانا Tornado دەپ اتالاتىن بارلاۋشى ۇشاق پەن 1 تانكەر ۇشاق ۇستاپ وتىر. بۇل تەحنيكالاردىڭ قۇنى 235 ملن دوللار دەسەدى.

فرانتسيا جەرورتا تەڭىزىنىڭ شىعىس بولىگىنە 1 ۇشاق تاسىمالداۋشى كەمە، 1 ەسمينەتس، 2 فرەگات، 1 سۇڭگۋىر قايىق جىبەردى. بۇلار 5 ملرد 220 ملن دوللارعا باعالاناتىن تەحنيكا.

يتاليا تۇركيانىڭ قاھارمانماراش جانە گازيانتەپ قالالارىنىڭ توڭىرەگىنە SAMP/T ماركالى زەنيتتىك-زىمىران كەشەنىن ورنالاستىرۋعا دايىندالۋدا. ال، سيريا جاعالاۋىنا جاقىن ماڭايدا يتاليانىڭ 1 سۇڭگۋىر قايىعى مەن 1 فرەگاتى ءجۇزىپ جۇرگەن كورىنەدى. يتالياندىقتاردىڭ تەرروريستەرمەن كۇرەس ءۇشىن ايماقتا ۇستاپ وتىرعان اسكەري تەحنيكاسى مەن قۇرال-جابدىقتارىنىڭ قۇنى 947 ملن دوللاردى قۇراپتى.

ال، تۇركيا بولسا ىنجىرلىك بازاسىندا 18 دانا F-16, ديارباقىردا 18 دانا F-16 ۇشاعىن، مالاتيا ەرحاچ بازاسىندا 25 دانا F-4/2020 ۇشاعىن تەرروريستەرگە قارسى ۇرىستار ءۇشىن دايارلاپ قويعان. سونىمەن قاتار، تۇرىكتەر جەرورتا تەڭىزىنىڭ شىعىس بولىگىنە 1 فرەگات، 2 كورۆەت، 1 دەسانتتىق كەمە، 1 سۇڭگۋىر قايىق، 1 لوگيستيكالىق كەمە جىبەرگەن. تۇرىك پورتتارىندا كەز كەلگەن بۇيىرىقتى كۇتىپ 28 اسكەري كەمە تۇرعان كورىنەدى. رەسمي انكارا تەرروريستەرمەن كۇرەس ءۇشىن 55 مىڭ جاۋىنگەر، 500 بروندى تەحنيكانى ساقاداي ساي ەتىپ دايارلاپ قويعان. ەسەپ-قيساپ جاساۋشىلار تۇرىك اسكەري كۇشىنىڭ جالپى قۇنى 3 ملرد 442 ملن دوللار دەگەن بولجام ايتادى.

يسپانيا بولسا ادانا قالاسىنىڭ توڭىرەگىندە Patriot زەنيتتىك-زىمىران كەشەندەرىن ورنالاستىرىپ قويعان. سونىمەن قاتار، تەڭىزدە 1 فرەگاتى ءجۇر. سونداي-اق، دانيا دا وسى وڭىرگە 1 فرەگاتىن جىبەرگەن. ءسويتىپ، ەكى ەلدىڭ دايش-قا قارسى قولدانباق بولعان اسكەري تەحنيكاسىنىڭ جالپى قۇنى 330 ملن دوللاردى قۇراعان. بۇلاردان بولەك جەرورتا تەڭىزىنىڭ شىعىس بولىگىنە گرەكيا، بەلگيا، پورتۋگاليا جانە گوللانديا ارقايسىسى ءبىر-ءبىر اسكەري كەمە اتتاندىرعان. بۇل تەحنيكالاردىڭ جالپى قۇنى 2 ملرد 185 ملن دوللار.

ال، «سيرياداعى تەرروريستەردى قۇرتامىز» دەپ جۇرگەن رەسەي بيلىگى جەرورتا تەڭىزىنە 2 فرەگات، 2 ەسمينەتس، 2 سۇڭگۋىر قايىق، 1 بارلاۋ كەمەسىن جىبەرىپتى. ودان بولەك سيريانىڭ حمەيميم اۋەجايىندا رەسەيلىك سۋ-24, سۋ-25, سۋ-30 ماركالى 35 ۇشاعى، مي-24 تىكۇشاقتارى، س-400 زەنيتتىك-زىمىران كەشەنى ورنالاستىرىلعان كورىنەدى. بۇل تەحنيكالاردىڭ جالپى قۇنى 3 ملدر 22 ملن دوللار شاماسىندا بولسا كەرەك. ءبىر سوزبەن ايتقاندا، سيريا مەن يراكتاعى تەرروريستەرگە قارسى كۇرەس باستاعان ەلدەر ءتاۋىر شىعىندالىپ جاتىر. ارينە، بۇل ەسەپ-قيساپ وڭىرگە شوعىرلاندىرىلعان اسكەري تەحنيكانىڭ قۇنى. ودان بولەك كۇندەلىكتى قىزمەت كورسەتۋ شىعىندارى تاعى بار.

قىسقاسى، جەرورتا تەڭىزى قازىرگى كەزدە ەڭ كوپ اسكەري كەمەلەر جۇزەتىن ايماققا اينالدى. تەڭىزدەگى اسكەري كۇشتەردىڭ باسىم بولىگى ناتو-عا مۇشە ەلدەردىڭ تەحنيكالارى مەن جاۋىنگەرلەرى. ءبارىنىڭ كوزدەگەنى سيريا مەن يراكتاعى تەرروريستەرگە سوققى بەرۋ. الايدا، ايماقتاعى اسكەر كۇشتەر شىنداپ كىرىسسە دايش-تى الدەقاشان تاس تالقان ەتۋىنە بولار ەدى. بىراق، ازىرگە تەك اۋە شابۋىلدارىمەن عانا شەكتەلىپ وتىر. كەرىسىنشە، جەرورتا تەڭىزىنە جينالعان اسكەري كەمەلەر ناتو مەن رەسەيدىڭ ءبىر-بىرىنە سەس كورسەتۋىنە ۇقساپ بارا جاتىر.