التايدىڭ ساڭىلاعى
kerey.kz
ءتۇس مەزگىلىندە زۋقا باتىر، ءۇيدىڭ قاسىندا اتىن ەرتتەپ تۇرعان ۇلىن ىزدەپ جۇرگەن بولىپ; ء“اي ءشامي، شەشەڭ شاقىرىپ جاتىر ۇيگە ءجۇر!” دەيدى.
اتاسىنىڭ كىشى-كىرىم جۇمىستارعا جىبەرەتىنىنە ۇيرەنىپ العان ءشامي ۇيگە كىرىپ وتباسىنا كەلىپ ءبىر دىزەلەپ وتىرا قالادى. اناسى قىزىكە ونىڭ الدىنا ءبىر تاباق قۋىرداقتى اكەپ قويادى. ءشامي اپتەن قارنىڭ تويعىزعان سوڭ زۋقا باتىر ۇيگە كىرەدى دە بايبىشەسى قىزىكەگە، “قۋىرداقتىڭ مايىن ماعان اكەپ بەر!” دەيدى. قىزىكە انامىز ءبىر توستاعان مايدى وتاعاسىنا اكەپ بەرەدى. زۋقا اتامىز مايلى سورپانى ءبىر ۇرتتاپ بولعان سوڭ شاميگە بەرىپ مىنانى جۇتىپ ال دەيدى.
ول كەزدە شاميمەن اعاسى شادەت، اتاسى نە ايتسا سونى ىستەي بەرەدى ەكەن. ويتكەنى وزىنەن ۇلكەن اعالارى شايماردانمەن ناسىرداي بولا الساق بىزدە اكەمىزدىڭ قاسىندا وتىرامىز دەيدى ەكەن. سونىمەن قارنىن اپتەن تويعىزعان ءشامي، شىنىداعى مايدى كوزىن جۇمىپ تۇرىپ الىپ جۇتىپ الادى.
ءسويتىپ زۋقا اتامىز ەكىنتى مەزگىلىندە ءشاميدى كوكتوعايدان قىزى راقيمانىڭ ۇيىنە تىگىم ماشينكاسىن الىپ كەلۋگە اتتاندىرادى دا ەرتەڭ وسى ۋاقىتقا شەيىن ۇيگە ورال دەيدى.
ەكى اۋداننىڭ اراسى ەكى تاۋلىك جول ەكەن. زۋقا اتامىز ءشاميدى سىناپ ءبىر تاۋلىك ۋاقىتقا شەيىن كەلەسىن دەيدى.
سونىمەن ءشامي حاجى اتامىز الگى ەرتتەگەن جيرەن قاسقا اتىنا ءمىنىپ ەكىنتى مەزگىلىندە جولعا اتتانادى. ءتۇن ورتاسىندا ءبىر جەرگە كەلگەندە قاتتى بوران سوعىپ، قارا تۇمان بولىپ كەتەدى. استىنداعى اتى دا توقىراپ جۇرە المايدى دا ىقتاسىنعا كەلىپ تىڭدانىپ وتىرادى.
اي قاراڭعى تۇندە ءشامي اتا، وسىندا توقتاپ، دەمالىپ ۇيىقتاپ قالادى. ءبىر زاماتتا قاسىنداعى جيرەن قاسقا اتى ءشامي اتامىزدى مۇرنىمەن تۇرتكىلەيدى. بۇدان ويانا كەلسە تاڭ اتىپ قالىپتى. ۇشىپ-تۇرىپ قايتا جولعا شىعىپ، ەكىنتىمەن نامازشام اراسىندا ارەڭ اپەكەسى راقيمانىڭ ۇيىنە كەلەدى. اپەكەسى ونى تاماقتاندىرىپ بولعان سوڭ ءشامي اتامىز ەرتە جاتىپ قالادى. تاڭەرتەن ەرتە تۇرىپ، تىگىم ماشينكاسىن الادى دا قايتا جولعا شىعادى. سونىمەن ەكى تاۋلىكتى اسقاندا اۋىلىنا تايايدى.
زۋقا باتىر، ۇلىنىڭ ەندى كەلەدى دەگەن ۋاقىتىندا ءبىر توبەگە شىعىپ اڭدىپ وتىرادى. قاس قارايا ءشامي اتامىز دا كورىنەدى. اۋىلدىڭ شەتىنە تاياعاندا جيرەن قاسقا اتى جەرگە شوگىپ جۇرە الماي جىعىلادى. ونىمەن بىرگە ءشامي اتامىز بىرگە قۇلايدى.
وسىنى كورىپ وتىرعان باتىر زۋقا بابامىزدىڭ ۇشىپ تۇرەگەلگەنىن كورگەن قاسىنداعى ىعاي-سىعايلار، ءشاميدىڭ قاسىنا شاۋىپ بارادى. سوندا ءشامي تالىقسىپ جاتسا دا اتىنىڭ موينىن سيپاپ تۇر ەكەن.
الگى ىعاي-سىعايلار كەيىندەپ تۇرىپ ەكەۋىنىڭ قيمىلىنا قاراسا، قىزىل جيرەن ات قايتا تۇرەگەلىپ شاميگە تاعزىم ەتكەندەي الدىنا كەلىپ جۇگىنىپ تۇر ەكەن.
جاڭاعى جەتىپ كەلگەن جولداستاردىڭ بىرەۋى اتتى جەتەكتەپ، ال بىرەۋى بولسا ءشاميدى ءوزى اتتارىنا مىڭگىزىپ ۇيگە الىپ كەلەدى.
ءشامي اتامنىڭ وسى “جيرەن قاسقا” اتى التايدان باركولگە كەلگەن جىلدارى قارتايىپ ولگەن ەكەن. وسى ات تۋرالى ءبىر اڭگىمەنى تاعى ايتا كەتەيىن:
ءبىر سوعىس كەزىندە ءشامي حاجى اتامىز جاردىڭ استىندا جاۋعا وق جاۋدىرىپ جاتقاندا جيرەن اتى دا وسىندا ونى اڭدىپ تۇرادى. مىلتىق داۋىسىنىڭ كوبەيىپ، يەسىنىڭ جاۋعا توتەپ بەرە المايتىنىن بىلگەن جيرەن قاسقا ات، ءشاميدىڭ قاسىنا كىسىنەپ كەلىپ سۇيەمەلدەپ جاتا قالادى. ءشامي اتامىز اتىنا مىنە سالا جيرەن قاسقا اتى ونى الا جونەلەدى دە ءبىر توبەشىكتىڭ ارتىنا اينالىپ كەتەدى. ءشامي اتامىز وسىندا تاعى ءبىر جاردىڭ استىنا تاسالانىپ جاتىپ جاۋعا وق جاۋدىرادى.
پىكىر قالدىرۋ