ءبىزدىڭ قوعامدى بولگىسى كەلەتىندەرگە

قوعامدا بولىنۋشىلىك ماسەلەسى بەلەڭ الىپ بارادى. جۇرت جەر-جەرگە، رۋ-رۋعا، ءجۇز-جۇزگە ءبولىنىپ، ءوزى از حالىق ىدىراپ ءجۇر. وسى وزەكتى ماسەلە وزەگىن ورتەگەن ونەرلى جاستار ەلگە بىرىگەيىك دەگەن وي تاستاۋ، جىگەرىن جانۋ، رۋحىن كوتەرۋ ماقساتىندا “بىرگەمىز” اتتى ءان جازىپ، وعان بەينەبايان ءتۇسىردى.

اۆتورلاردىڭ ايتۋىنشا، “بىرگەمىز” ءانى – ەل ىشىنە ىرىتكى سالاتىندارعا نارازىلىق. “بۇل - قازاق حالقىنا تاستالعان ۇندەۋ. ءبىز بىرگەمىز،سوندىقتان دا ىرگەمىز اركەز بەرىك ەكەنىن بۇكىل الەمگە جار سالامىز!”، – دەيدى ولار. ءاننىڭ ءسوزىن جازعان جاسۇلان يساكاەۆMassaget.kz سايتىنىڭ ءتىلشىسى. “ەلىمىز ەگەمەندىك العاننان كەيىن بىردەن اياقتان تۇرىپ كەتپەگەنى بەلگىلى. قيىن-قىستاۋ كۇندەردى باسىنان وتكەردى. زامانا جەلى قانشا زاۋلاي سوققانمەن، ەل ىرگەسىن قۇلاتاالعان جوق. ەل ىرگەسى تاتۋلىق پەن بىرلىكتىڭ ارقاسىندا بەرىك بولدى. بۇل ءان - سول ءبىر كۇندەردى ەسكە سالادى. سول قيىن شاقتىڭ بارلىعىن ىنتىماق پەن بىرلىكتىڭ ارقاسىندا جەڭىپ شىقتىق. لايىم، تاتۋلىعىمىز بەرىك، تاۋەلسىزدىگىمىز ماڭگىلىك بولسىن!”، – دەيدى جاسۇلان.

ال تۋىندىنىڭ ءانىن جازعان الىبەك الماديەۆ - ەلىمىزدە “حوچۋ كمەلادزە” تەلەشوۋىنىڭ ءفيناليسى رەتىندە تانىلعان جاس دارىن. ءاندى جۇلدىز راديوسىندا “سالەم ساعان، تۋعان ەل”، ستۆ ءارناسىندا”ومىر تىنىسى” سىندى باعدارلامالاردىڭ جۇرگىزۋشىسى،”الداسپان” توبىنىڭ ءسوليسى شامشاددين وماروۆ پەن الىبەك الماديەۆ ورىندادى.

كليپ سيۋجەتى بويىنشا، اۋىل مەن قالادا وسكەن قازاق بالالارىنىڭ ءومىرى مەن تۇرمىستىق ايىرماشىلىقتارى كورسەتىلەدى. الايدا، ايتپاق وي – بىرلىكتە. ءبىر قىزىعى، شامشاددين وماروۆ – اۋىلدىڭ بالاسى دا، الىبەك الماديەۆ - قالانىڭ تۋماسى. ولاردىڭ بالالىق شاعىنداعى ساتتەردى اۋىلدىق جانە قالالىق بالالار سومدايدى.
ال كليپ رەجيسسەرى ەرنار المابەك (Massaget.kz پورتالىنىڭ ءتىلىشىسى) بەينەباياننىڭ قايدا تۇسىرىلگەنىن باياندادى. “بەينەباياندى ەكى كۇندە ءتۇسىرىپ بولدىق. ءتۇسىرىلىم جۇمىستارى الماتى قالاسىنىڭ ماڭىنداعى نۇرا اۋىلىندا ءوتتى. قالا بالاسىنىڭ وبرازىن 7 جاستاعى بەكجان ەسىمدى بالا، ال اۋىل بالاسىنىڭ ءرولىن 8 جاستاعى ابزال سومدادى”، – دەدى ەرنار المابەك.

ايتپاقشى، بۇل بەينەبايانعا قازاقستاندىق كاسىپكەر مارعۇلان سەيسەنباەۆ تا پىكىر ءبىلدىرىپ ۇلگەرىپتى. كاسىپكەردىڭ ايتۋىنشا، بۇل بەينەبايان ۇلتتى ءبولىپ-جارعىسى كەلەتىندەرگە ۇندەۋ بولىپ شىققان. ونىڭ ويى بەينەبايان اۆتورلارىمەن ءبىر جەردەن شىقتى.ء”ار زاماننىڭ ءوز قيىن كەزەڭدەرى بولادى. قيىن-قىستاۋ كۇندەر تۋعاندا ونى حالىق دەرەۋ سەزەدى، وسىنداي ۋاقىتتا جاڭا اندەر مەن جاڭا قاھارماندار پايدا بولادى. 90-جىلدارداعى كەڭەس وداعىنىڭ قۇلاعانىن بىلەتىندەر تۇسىنەدى. بۇل كۇيرەۋ زامانى ەدى، قيىن زاماندار كەلدى، دەسە دە، ءدال سول ۋاقىتتا ەلدىڭ ءۇمىتى مەن بوستاندىعى پايدا بولدى. ۆيكتور تسويدىڭ، تالكوۆتىڭ اندەرى، جاڭا ەسىمدەر – بارلىعى دا جاڭا. قازىردە دە ءبىر وزگەرىس بولاتىن سياقتى، ءبىر جاڭالىق بولاتىنداي كورىنەدى. بۇرىنعىداي ءومىر سۇرە بەرۋگە بولمايدى. ءتىپتى ۋاقىتتىڭ ءوزى بىزگە الدەنە ايتقىسى كەلگەندەي، داعدارىس تۋعىزىپ جاتىر، ءبىز باسقاشا ويلاپ، وزگەرۋىمىزدى تالاپ ەتەتىندەي”، – دەدى ول.

سونىمەن قاتار، سەيسەنباەۆتىڭ ايتۋىنشا بۇل ءان ءدال قازىر ءبىزدىڭ زامانىمىزدىڭ ءانۇرانىنا اينالۋى ءتيىس. “الەمدە زۇلىمدىقتىڭ، مەيىرىمسىزدىك پەن راحىمسىزدىقتىڭ بەلەڭ العان تۇسىندا، ۇلتتىق ەرەكشەلىكتەرىمىز بويىنشا، ناعىز قازاق پەن شالا قازاق دەپ، اۋىلدىق نەمەسە قالالىق دەپ ءبولۋ ءجۇرىپ جاتقان كەزدە ءبىز بىرگە بولۋىمىز كەرەك! بۇل ءان سول جايلى. مەنىڭشە، بۇل ءان ءبىزدىڭ زامانىمىزدىڭ ءانۇرانىنا اينالۋى ءتيىس. ءدال قازىر بىزگە وسى قاجەت دەپ سەنەمىن!”، – دەدى ول.

tengrinews.kz
copyRules