قازاقستان پرەزيدەنتىنىڭ جۇبايى سارا الپىسقىزى نازارباەۆا بۇگىن 75 جاسقا تولدى، – دەپ حابارلايدى Tengrinews.kz تىلشىسى.

نۇرسۇلتان نازارباەۆ پەن سارا نازارباەۆانىڭ جاستىق شاعى. © رersonal.akorda.kz

نۇرسۇلتان نازارباەۆتىڭ دەربەس پاراقشاسىنان مەملەكەت باسشىسىنىڭ ءوزىنىڭ بولاشاق جارىمەن كەزدەسۋى جايلى جازعان قىزىقتى وقيعاسىن وقۋعا بولادى.

“سول جىلداردىڭ ءومىر بويى ەستە قالاتىن ەڭ ءبىر ەلەۋلى وقيعاسى – بولاشاق كەلىنشەگىم سارامەن العاشقى كەزدەسۋىم. ال بۇل كەزدەسۋ… ءبىر اپاتتان كەيىن دومنا پەشىنىڭ جانىندا بولعان ەدى. ادەتتە اپات بولىپ، مەتالل جەرگە توگىلىپ جاتقاندا تۇگەل اۋىسىم بار قالدىقتى جيناپ، تەمىرجول قوزعالىسىن قالپىنا كەلتىرگەنشە ەشكىم ەشقايدا كەتپەيدى. بۇل ءبىر بۇلجىماس ءتارتىپ ەدى. كۇنى بويى بولاسىڭ با، تاۋلىك بويى بولاسىڭ با، ءوزىڭ بۇلدىرگەندى ءوزىڭ رەتكە كەلتىرۋىڭ ءتيىس. وسىنداي قولايسىز ءبىر ءسات ەدى – تاۋلىك بويى دەرلىك تابانىمىزدان تىك تۇرعان كەزىمىز، تۇلا بويىمىز قازاننىڭ ءتۇپ كۇيەسىندەي قاپ-قارا، تەك كوزىمىز جىلتىراپ، اپپاق ءتىسىمىز اقسيادى. سول كۇنى قوسالقى ەلەكتر ستانتسياسىندا كەزەكشى بولىپ، ءبىزدىڭ پەشىمىزدىڭ تۇبىندە نە بولىپ جاتقانىن كورۋگە كەلگەن قىزعا كەز بولا كەتتىم. كوپ ۇزاماي تويىمىز بولدى. ءوزىم ەكپىندىلەر مەن بەلسەندىلەر قاتارىندا جۇرگەندىكتەن كوللەكتيۆىمىز ونى كومسومول-جاستار ۇيلەنۋ تويى ەتىپ وتكىزىپ بەردى”.

باقىتتى جاس وتباسى تەز جەتىلىپ، ءوسىپ-ءونىپ كەلە جاتتى، شاڭىراقتارىندا ءۇش قىز – داريعا، دينارا جانە ءاليا دۇنيەگە كەلدى.

© رersonal.akorda.kz

سارا الپىسقىزى نازارباەۆا 1992 جىلعى اقپاننان – حالىقارالىق “بوبەك” بالالار قايىرىمدىلىق قورىنىڭ نەگىزىن سالۋشى جانە پرەزيدەنتى. قور جۇزدەگەن جانە مىڭداعان قايىرىمدىلىق شارالارىن وتكىزىپ، جەتىم بالالار مەن مۇگەدەكتەرگە كومەك، انالارعا قولداۋ كورسەتىپ كەلەدى.

© رersonal.akorda.kz

1994 جىلعى شىلدەدەن باستاپ نازارباەۆا “SOS” – قازاقستاننىڭ بالالار قالاشىقتارى” قورىنىڭ پرەزيدەنتى. 1999 جىلعى ناۋرىزدان باستاپ “دەموگرافيا” قايىرىمدىلىق قورى قامقورشىلار كەڭەسىنىڭ ءتورايىمى.

قايىرىمدىلىق جانە قامقورلىق سالاسىنداعى ەرەن ەڭبەگى ءۇشىن سارا نازارباەۆا حالىقارالىق ۇيىمداردىڭ كوپتەگەن ماراپاتتارىنا يە بولدى. ولاردىڭ اراسىندا بۇكىلالەمدىك دەنساۋلىق ساقتاۋ ۇيىمىنىڭ يحسان دوگراماچي اتىنداعى حالىقارالىق جۇلدەسى، Unity حالىقارالىق جۇلدەسى، “قۇرمانجان داتقا” جۇلدەسى سياقتى ەلەۋلى ماراپاتتار بار. ول شىڭعىس ايتماتوۆ اتىنداعى ء“وزىن-ءوزى تانۋ فيلوسوفياسىنا قوسقان ۇلى ۇلەسى ءۇشىن” التىن مەدالىنىڭ يەگەرى. سارا الپىسقىزى سوفي لورەننىڭ قولىنان رەسەي قىزىل كرەست قوعامى تاعايىنداعان جانە وسكەلەڭ ۇرپاقتى قولداۋعا باعىتتالعان كوپجىلدىق قىزمەتى ءۇشىن بەرىلەتىن “التىن جۇرەك” حالىقارالىق جۇلدەسىن الدى.

© رersonal.akorda.kz

ول 2010 جىلى ءوز ءومىرىن SOS Kinderdorf بالالار قالاشىعىنىڭ بالالارىنا ارناعان ايەلدەرگە بەرىلەتىن SOS Kinderdorf International حالىقارالىق قورىنىڭ ماراپاتى –  “التىن جۇزىككە” يە بولدى.

2014 جىلى قازاقستاندا سارا نازارباەۆانىڭ باستاماسىمەن جاڭا الەۋمەتتىك جوبا جۇزەگە اسا باستادى. جوبا جەتىم بالالاردىڭ مەكتەپتەن كەيىن كوللەدجدەر مەن ۋنيۆەرسيتەتتە تەگىن ءبىلىم الۋىنا نەگىزدەلگەن. بۇل ءۇشىن ولار مەملەكەتتىك ءبىلىم بەرۋ جيناقتىق جۇيەسىن پايدالانۋى كەرەك.

اقوردانىڭ ءباسپاسوز قىزمەتى

مىنا سۋرەت 2013 جىلدىڭ 22 ناۋرىزىندا تۇسىرىلگەن. بۇل كەزدە ەلباسى مەن سارا نازارباەۆا قازاقستاندىقتاردى ناۋرىز مەيرامىمەن قۇتتىقتادى.

ال مىنا سۋرەت 2011 جىلى ءتۇسىرىلدى. نۇرسۇلتان نازارباەۆ پەن سارا نازارباەۆا قازاقستان پرەزيدەنتى سايلاۋىندا داۋىس بەردى.

بەس جىل بۇرىن ەلدىڭ ءبىرىنشى حانىمىنىڭ تۋعان كۇنىندە ەلباسى ونىڭ جاقسى كورەتىن اندەرىن قازاق جانە ورىس تىلدەرىندە ورىنداپ بەرگەن ەدى. تىلشىلەردىڭ ايتۋىنشا، سارا الپىسقىزىنا نۇرسۇلتان نازارباەۆتىڭ، قىزدارى داريعا، دينارا مەن ءاليانىڭ، سونىمەن قاتار، نەمەرەلەرىنىڭ ورىنداۋىنداعى اندەر قاتتى ۇناعان.

© رersonal.akorda.kz

ايتا كەتەيىك، قازىرگى ۋاقىتتا مەملەكەت باسشىسى الماتىدا ءجۇر.

tengrinews.kz