تەرروريزممەن كۇرەستە قازاقستان كورشىلەرىنەن كومەك سۇرامايدى، — دەگەن سەنىمدە قر قورعانىس ءمينيسترى.
قازاقستان ء„وز قوتىرىن ءوزى قاسۋعا„ قاۋقارلى
2016 شىلدەدە اقتوبەدەگى جانە الماتىداعى تەرروريستىك اكتىلەردەن كەيىن ءبىر قاتار شەتەلدىك باق-تاردا ماقالالار جاريالانىپ، ءتۇرلى دەڭگەيدەگى ساراپشىلار رەسەيلىك اسكەردىڭ قازاقستانعا كىرگىزىلۋى مۇمكىن دەگەن بولجام جاساعان ەدى («رەسەيلىك ساراپشى: «قازاقستانعا ورىس اسكەرى ەنگىزىلەدى», «روسسيسكي سپەتسناز موگ بى پريتي ۆ كازاحستان — پرەدلوجەنيە ەكسپەرتا», «11 سيۋرپريزوۆ، كوتورىە موجەت پرەپودنەستي ميرۋ كرەمل»).
وسىنداي سارىنداعى كۇماندى تۇجىرىمدامالارعا العاشقى جاۋاپ بەرگەن رەسمي تۇلعا — قر قورعانىس ءمينيسترى يمانعالي تاسماعامبەتوۆ بولدى.
— قانداي دا بولسىن سىلتاۋمەن قازاقستان اۋماعىنا رەسەي اسكەرىنىڭ كىرگىزىلۋى مۇمكىن ەمەس. مەيلى، ول يسلامدىق تەرروريزم، تەرروريستىك اكتىلەر جانە تاعى باسقالارى بولسىن، — دەدى يمانعالي تاسماعامبەتوۆ 2016 جىلعى 1-تامىزدا الماتىدا جۋرناليستەرمەن بولعان كەزدەسۋ بارىسىندا.
قازاقستانعا كومەك بەرۋ جايىندا ەلىمىزدىڭ اسكەري-ساياسي باسشىلىعى تاراپىنان رەسەي فەدەراتسياسىنا دا، باسقا مەملەكەتتەرگە دە ەشقانداي وتىنىشتەر جاساۋ بولعان جوق جانە بولمايدى.
قازاقستاننىڭ ء„وز قوتىرىن ءوزى قاسۋعا„ قاۋقارى جەتەدى، تەرروريستىك قاۋىپتەردى قوسا العاندا. وزدەرىڭىز كورىپ وتىرسىزدار: اقتوبەدەگى جانە الماتىداعى شيەلەنىس وشاقتارىن وقشاۋلاۋعا ءبىزدىڭ قارۋلى كۇشتەر قاتىسقان جوق. شىن مانىندە، مۇنداي جاعدايدا ءبىز ءوز كۇشىمىزدى جاۋىنگەرلىك دايىندىق جاعدايىندا ۇستايمىز، بىراق ودان ارىعا بارمايمىز.
قاجەت بولعان جاعدايدا اسكەري-كولىك ۇشاقتارى ۇلتتىق ۇلاننىڭ اسكەرىن ەلىمىزدىڭ كەز-كەلگەن جەرىنە جەتكىزۋگە قابىلەتتى
بۇگىندە ۇلتتىق ۇلاننىڭ كاسىبي دايىندىعى جوعارى، ۇلتتىق قاۋىپسىزدىك كوميتەتىنىڭ ارنايى ماقساتتاعى بولىمشەلەرى، ىشكى ىستەر مينيسترلىگىنىڭ دە ارنايى ماقساتتاعى كۇشتەرى بار، ءبىزدىڭ ۆەدومستۆو دا قۇر الاقان ەمەس. سوندىقتان تەرروريستىك قاۋىپپەن كۇرەسۋ فورماتىندا بىزگە كورشىلەردىڭ كومەگى قاجەت دەۋ — ارتىق ايتقاندىق.
قازىرگى تەرروريستكە قارۋدىڭ دا قاجەتى جوق
ەۋروپاداعى بۇقارالىق اقپارات قۇرالدارى رەسەيدى قۇبىجىق ەتىپ كورسەتەدى.
ولاردىڭ ساياساتى سونداي — وزدەرىنىڭ كەيبىر ماقساتتارىنا قول جەتكىزۋ ءۇشىن ولار جۇرتتى رەسەيمەن قورقىتادى، بىراق مۇنىڭ قازاقستانعا ەشقانداي قاتىسى جوق.
ەلىمىزدەگى لاڭكەستىك شابۋىلدار ماسەلەسىنە كەلسەك، مۇنداي كۇرەستىڭ العى شەبىندە، ءبىرىنشى كەزەكتە، ۇلتتىق قاۋىپسىزدىك كوميتەتى تۇرادى — „انىقتاۋ جانە كوزىن جويۋ„ سولاردىڭ ماقساتىنا جاتادى. مەن ۇقك ۇلكەن جەدەل جۇمىس اتقارىپ وتىر دەپ ەسەپتەيمىن، ءبىز ولارمەن بايلانىستامىز. سونداي-اق ىشكىىسمين مەن ۇلتتىق ۇلان باسشىلىعى دا قاراپ وتىرعان جوق.
الايدا بۇگىن تەرروريستىك شابۋىلدىڭ قايدا جانە قاشان بولاتىنىن ءدوپ باسىپ ايتۋ مۇمكىن ەمەس. ءوزىمىز كورىپ وتىرعانداي قازىرگى تەرروريستكە شابۋىل دايىنداۋعا تىڭعىلىقتى دايىندالۋ قاجەت ەمەس. وعان قارۋ ىزدەپ، جارىلعىش زاتتار جاساۋدىڭ دا قاجەتى جوق.
زاماناۋي لاڭكەسكە، نيتستسادا بولعانداي، جۇك كولىگىنىڭ رۋلىنە وتىرىپ، كولىكتى ادامدار كوپ جينالعان جەرگە قاراي بەتتەتسە، جەتىپ جاتىر.
مەنىڭ ويىمشا، بۇگىن تەرروريزم پسيحوزى تۇشكىرگەننەن دە جۇعاتىن سىڭايلى. ءبىر ەلدە تەراكت ورىن السا، ول پلانەتانىڭ باسقا ءبىر جەرىندەگى لاڭكەستىك جاساعالى جۇرگەن بىرەۋگە بەرىلگەن بەلگى ىسپەتتى. سوندىقتان الەم مۇنداي سويقاننان قورعالعان دەۋگە بولمايدى. ال قازاقستان — وسى الەمنىڭ ءبىر بولىگى.
پىكىر قالدىرۋ