ءور التايدىڭ تورىندەگى پاتشالار جازىعىندا ەلىمىزدە بالاماسى جوق اشىق اسپان استىنداعى مۇراجاي اشىلدى. ەندى بەرەل قورعاندارىنا كەلۋشى ەتنوتۋريستەر 8,5 مەتر تەرەڭدىككە ءتۇسىپ، قۇندى ارحەولوگيالىق قازبالاردى جاقىننان كورە الادى.

بۇدان بۇرىن شىعىس وڭىرىندە ارحەولوگيا سالاسىنداعى عىلىمي-زەرتتەۋ جۇمىستارىن دامىتۋدىڭ ايماقتىق جوسپارى اياسىندا بەرەل قورعاندارىنا دا قازبا جۇمىستارى جۇرگىزىلىپ جاتقانىن حابارلاعانبىز. عالىمدار جاز بويى بەرەلدە ب.ز.د IV عاسىرعا جاتاتىن ادام سۇيەگى مەن قۇرباندىققا شالىنعان جەتى جىلقىنىڭ قاڭقالارى بار №2 قورعاندى قازعان بولاتىن. تابىلعان جىلقىلاردىڭ بارلىعى دا سكيفتىك جانۋارلار ناقىشىمەن، اتاپ ايتقاندا ەجەلگى كوشپەندىلەر مادەنيەتىندە سيرەك كەزدەسەتىن قوراز بەينەسىندە بەزەندىرىلگەن. سونىمەن قاتار قورعاننان قىش قۇمىرالار شىقتى.

جۋىردا كاتونقاراعاي اۋدانىنداعى جۇمىس ساپارى اياسىندا قازبا جۇمىستارىمەن تانىسقان وبلىس اكىمى دانيال احمەتوۆتىڭ تاپسىرماسىمەن قۇندى جادىگەرلەردى كەلۋشىلەردىڭ كورۋىنە مۇمكىندىك جاساۋ ءۇشىن قورعاننىڭ ۇستىنەن ءبىر جارىم ايدىڭ ىشىندە شىنىلى شاتىر تۇرعىزىلدى. قاتتى شىنىدان جاسالعان جابىق كەشەن اۋماعى – 90 شارشى مەتر، ال بيىكتىگى جادىگەرلەر جاتقان تەرەڭدىكتەن باستاپ 8,5 مەتردى قۇرايدى.

– اشىق اسپان استىنداعى مۇراجاي – ماڭىزدى مادەني قۇبىلىس. بۇل شارانىڭ تاۋەلسىزدىك تويىنىڭ 25 جىلدىعىمەن تۇسپا-تۇس كەلۋى بارشامىزدى قۋانتادى. ياعني، ءبىز ايتۋلى مەملەكەتتىك مەرەيتويعا زور ۇلتتىق قۇندىلىقتارىمىزدى الا كەلدىك. وسى ورايدا زەينوللا ساماشەۆ باستاعان ارحەولوگتار قاۋىمىنا ۇلكەن العىس بىلدىرەمىن، – دەدى نىساننىڭ تۇساۋكەسەر سالتاناتىنا قاتىسقان وبلىس اكىمىنىڭ ورىنباسارى جاقسىلىق ومار.

ايتا كەتۋ كەرەك، بەرەلدەگى بىرەگەي كەشەنمەن شەتەلدىك عالىمدار دا تانىستى. ارنايى شاقىرىلعان مارتەبەلى مەيمانداردىڭ ءبىرى، رەسەيدىڭ سانكت-پەتەربۋرگ قالاسىنىڭ مادەنيەت ينستيتۋتىنىڭ پروفەسسورى نيكولاي بوكوۆەنكو وسى ىسپەتتى زەرتتەۋلەر تۋۆا مەن حاكاسيا جەرىندە جۇرگىزىلىپ جاتقانىن جەتكىزدى. شەتەلدىك عالىمدار قىسقا مەرزىمدە مۇنداي مۇراجايدى اشۋدىڭ مۇمكىن بولا بەرمەيتىنىن، شىعىس وڭىرىندە ارحەولوگيالىق تابىستارعا ۇلكەن كوڭىل بولىنەتىنى قۋانتاتىنىن اتاپ ءوتتى.

10 قىركۇيەك كۇنى وسكەمەن قالاسىندا شىعىس قازاقستان وبلىسى اۋماعىندا جۇرگىزىلىپ جاتقان ارحەولوگيالىق زەرتتەۋ جۇمىستارىنىڭ ناتيجەسىنە ارنالعان «التاي – تۇركى الەمىنىڭ التىن بەسىگى» اتتى حالىقارالىق عىلىمي-تاجىريبەلىك كونفەرەنتسيا ءوتتى. ونىڭ جۇمىسىنا فرانتسيا، وڭتۇستىك كورەيا، رەسەي جانە موڭعوليا مەملەكەتتەرىنىڭ ديپلوماتتىق كورپۋستارىنىڭ وكىلدەرى، قازاقستان، تۇركيا، رەسەي، ۇلىبريتانيا، ۆەنگريا، گەرمانيا، پولشا، قىتاي ەلدەرىنىڭ ۇزدىك ارحەولوگتارى مەن تۇركىتانۋشىلارى قاتىستى.

دۋمان اناش،

شىعىس قازاقستان وبلىسى.

egemen.kz