مەملەكەت باسشىسى ءوز سوزىندە ەلىمىز تاۋەلسىزدىك العان باستاپقى ۋاقىتتاعى مەملەكەتتىلىكتى قالىپتاستىرۋدىڭ قيىن كەزەڭى تۋرالى اڭگىمەلەپ، رەسپۋبليكامىزدا جاستاردىڭ ومىردەن ءوز ورنىن تابۋىنا بىرەگەي مۇمكىندىكتەر جاسالعانىنا، جەدەل وزگەرۋ ۇستىندەگى قازىرگى الەمنىڭ زاماناۋي تالاپتارىنا ساي كەلەتىن، سىن-قاتەرلەرىنە لايىقتى توتەپ بەرەتىن ساپالى ءبىلىم الۋدىڭ ماڭىزدىلىعىنا نازار اۋداردى.

قازاقستان پرەزيدەنتى ەلىمىزدىڭ جەتكەن تابىسىنىڭ تاريحى – ەڭ الدىمەن ونىڭ جاستارى قول جەتكىزگەن تابىستىڭ تاريحى ەكەنىن اتاپ ءوتتى.

– جاس ۇرپاققا، وتكەنىمىز بەن كەلەشەگىمىزگە قامقورلىقپەن قاراۋ ارقاشان مەنىڭ ساياساتىمنىڭ باستى ءمان-ماڭىزى بولىپ كەلەدى. ءاربىر جاس قازاقستاندىقتىڭ ءبىلىم الۋىنا، جۇمىس ىستەۋىنە، وتباسىن قۇرۋىنا، باسپانا الۋىنا مۇمكىندىگى بار، – دەدى ەلباسى.

سونداي-اق، نۇرسۇلتان نازارباەۆ «بارشاعا – كاسىبي ءبىلىم» باعدارلاماسىنىڭ ەنگىزىلىپ جاتقانىن ايتتى.

– مەملەكەت بارشانىڭ وندىرىستەن جۇمىس ورنىن تابۋىنا كەپىلدىك بەرەتىن ومىردەگى العاشقى جۇمىسشى ماماندىعىن تەگىن الۋعا مۇمكىندىك تۋعىزىپ وتىر، – دەدى قازاقستان پرەزيدەنتى.

مەملەكەت باسشىسى «بيزنەستىڭ جول كارتاسى – 2020» باعدارلاماسى اياسىندا جاس كاسىپكەرلەرگە قولداۋ كورسەتۋ ىسىنە زور ءمان بەرىلىپ وتىرعانىن ايتتى.

– تەك 2016 جىلعى ءبىرىنشى جارتىجىلدىقتا جاس بيزنەسمەندەردىڭ 55 جوباسىنا بانك نەسيەلەرىنىڭ پايىزدىق تولەمدەرىن مەملەكەت تاراپىنان سۋبسيديالاۋ تۇرىندەگى قارجىلىق قولداۋ كورسەتىلدى. ءبىزدىڭ ماقساتىمىز – ەلىمىزدىڭ شاعىن جانە ورتا بيزنەسىنىڭ قازاقستان ءونىمىنىڭ جارتىسىنان استامىن وندىرۋىنە قول جەتكىزۋ، – دەدى ەلباسى.

قازاقستان پرەزيدەنتى «جاسىل ەل» ستۋدەنت جانە جاستار جاساقتارى جۇمىسىنا قاتىسۋشىلارعا ايرىقشا ريزاشىلىعىن ءبىلدىردى.

– ەڭبەك جاساقتارىنىڭ جۇمىسىنا 250 مىڭنان استام جاس اتسالىستى. ولار 150 مىڭ گەكتار جەرگە 50 ميلليونعا جۋىق اعاش وتىرعىزدى. ەڭبەك جاساقتارىنىڭ ىزگى ماقساتى – ەلىمىزدى كوگالداندىرۋ جانە ونىڭ ەكولوگيالىق تۇرعىدان تازا بولۋىن قامتاماسىز ەتۋ، – دەدى مەملەكەت باسشىسى.

نۇرسۇلتان نازارباەۆ تاۋەلسىزدىك جىلدارىندا جاس زەرتتەۋشىلەر مەن عالىمدار سانىنىڭ ارتقانىن ايتتى.

– جاستارىمىزدىڭ الەمدىك دەڭگەيدەگى نازارباەۆ ۋنيۆەرسيتەتىندە ءبىلىم الۋىنا مۇمكىندىكتەرى بار. بۇگىن جاستار الدىندا بار الەمنىڭ ەسىگى اشىق. سىزدەر جاقسى ۋاقىتتا ءومىر ءسۇرىپ، بولاشاققا نىق قادام باسىپ بارا جاتقان ەلمەن بىرگە ءوسىپ كەلەسىزدەر. ەل ىشىندە دە، الەمدە دە، سونىڭ ىشىندە مەملەكەتتەر اراسىنداعى قارىم-قاتىناس سالاسىندا دا جۇمىس جاسايتىن ءبىر عانا قاعيدا بار، ول – باسەكەلىكتىڭ ماڭگىلىك مەحانيزمى، – دەدى ەلباسى.

قازاقستان پرەزيدەنتى عىلىمدى قامتيتىن ەكونوميكاعا كوشۋ ونىڭ ءوسىمىنىڭ يكەمدىلىگىن، قارقىندىلىعىن جانە ورنىقتىلىعىن قامتاماسىز ەتەتىنىن اتاپ ءوتتى.

– سوندىقتان قازاقستاننىڭ الەمدەگى دامىعان 30 ەلدىڭ قاتارىنا قوسىلۋى عىلىمدى قامتيتىن ەكونوميكاعا نەگىزدەلۋگە ءتيىس. الەم جاڭا تەحنولوگيالىق داۋىرگە اياق باستى. ونىڭ ۇردىستەرى تاڭعالدىرادى، ءتانتى ەتەدى جانە تامساندىرادى، سونىمەن بىرگە ول ەلدىڭ كەلەشەگىنە قاتىستى ماسەلەگە وراي قاتاڭ تالاپ قويادى. بولاشاق ءبىزدىڭ الدىمىزعا مىناداي ءۇزىلدى-كەسىلدى شارت قويىپ وتىر: بار بول، جەتىل نەمەسە جوق بول! – دەدى مەملەكەت باسشىسى.

نۇرسۇلتان نازارباەۆ جاڭا تەحنولوگيالار زامانىندا قوعام ءۇشىن سىن-قاتەر بولىپ سانالاتىن قۇبىلىستارعا ايرىقشا توقتالدى.

– بۇل يننوۆاتسيالاردىڭ ارتىندا تۇرعان نەگىزگى الەۋمەتتىك سىن-قاتەر ول – كوپتەگەن كاسىپ ءتۇرىنىڭ جويىلۋى، جۇمىس ورىندارىنىڭ جاپپاي قىسقارۋى، ياعني جاھان بويىنشا جۇمىسپەن قامتۋ اياسىنىڭ تارىلۋى. وسى ورايدا بۇعان دەيىن مەنىڭ باستاماممەن ازىرلەنگەن يننوۆاتسيالىق يندۋستريالاندىرۋ، «نۇرلى جول»، «100 ناقتى قادام» ۇلت جوسپارى باعدارلامالارىمەن تىعىز بايلانىستى جالپىعا ورتاق ەڭبەك قوعامىنىڭ وزەكتىلىگى ەرەكشە ارتىپ كەلەدى، – دەدى ەلباسى.

سونداي-اق، قازاقستان پرەزيدەنتى دامىعان ەلدەردىڭ ۋنيۆەرسيتەتتەرىندە قارقىن الىپ كەلە جاتقان جاستار يننوۆاتسياسىنا باسا نازار اۋداردى.

– قازاقستان ستۋدەنتتەرى ورتاسىندا دا ستارتاپ سانىنىڭ ارتۋى ءۇشىن وسىنداي قولايلى جاعداي جاساۋ قاجەت دەپ سانايمىن. قازىر ەلىمىزدىڭ جەتەكشى جوعارى وقۋ ورىندارىندا دا العاشقى تابىستى جوبالار پايدا بولا باستادى. وسى تاجىريبەنى ورىستەتە ءتۇسۋ كەرەك. بۇل – ءبىلىم جانە عىلىم مينيسترلىگى باسشىلىعىنىڭ، جوعارى وقۋ ورىندارى مەن ۇلتتىق كاسىپكەرلەر پالاتاسى باسشىلارىنىڭ مىندەتى، – دەدى مەملەكەت باسشىسى.

بۇدان بولەك، قازاقستان پرەزيدەنتى تۋريزم، قۇرىلىس، حالىققا قىزمەت كورسەتۋ سالالارىندا، جەڭىل ونەركاسىپ پەن اۋىل شارۋاشىلىعىندا ەڭبەكپەن قامتۋعا جانە كاسىپكەرلىكتى دامىتۋعا مول مۇمكىندىكتەر بار ەكەنىن ايتتى.

سونىمەن قاتار، نۇرسۇلتان نازارباەۆ سپورتشىلار مەن شىعارماشىل جاستارعا، بارلىق جاس ونەر قايراتكەرلەرىنە ىستىق ىقىلاسىن ءبىلدىردى.

– مادەني باعدارلاما اياسىندا جانە «بولاشاقتىڭ ەنەرگياسى» اتتى تاقىرىپپەن وتەتىن ەكسپو-2017 حالىقارالىق كورمەسىندەگى ۆولونتەرلەر جۇمىسى بارىسىندا قازاقستاندى لايىقتى دەڭگەيدە تانىتۋلارىڭا تىلەكتەسپىن، – دەدى مەملەكەت باسشىسى.

سوڭىندا قازاقستان پرەزيدەنتى بارشاعا دەنساۋلىق، باقىت جانە يگىلىك تىلەپ، مەملەكەتتىڭ بارلىق تابىسىنا ەلىمىزدەگى تۇراقتىلىقتىڭ، تىنىشتىقتىڭ جانە 100-دەن استام ەتنوس وكىلدەرى دوستىعىنىڭ ارقاسىندا قول جەتكىزىلگەنىن اتاپ ءوتتى.

فورۋم بارىسىندا استانا قالالىق ءماسليحاتىنىڭ دەپۋتاتى ا.ورالوۆ، «بولاشاق» باعدارلاماسىنىڭ ستيپەندياتى، تەاتر جانە كينو ءارتىسى ا.ءالىمجان، «زەردە» ۇلتتىق اقپاراتتىق-كوممۋنيكاتسيالىق حولدينگى» اق باسقارماسىنىڭ ءتورايىمى ءا.جيەنباەۆا، قازاقستان حالقى اسسامبلەياسىنىڭ بەلسەندىسى م.سپوتكاي، 2016 جىلعى ازيا IT كونفەرەنتسياسىنىڭ جەڭىمپازى س.ناۋكەنوۆ، «قازاقستان ءاليۋمينيى» اق ەكونوميسى ءا.دوسانوۆا، «Open Technologies Group» كومپانياسىنىڭ نەگىزىن سالۋشى ق.احمەتوۆ، «دامۋ» كاسىپكەرلىكتى دامىتۋ قورى» اق باسقارماسىنىڭ توراعاسى ق.تولەۋشين، «جاسىل ەل» جاستار ەڭبەك جاساقتارى رەسپۋبليكالىق شتابى» جەكەمەنشىك مەكەمەسى باسشىسى ر.حاميدۋللين، قاراعاندى مەملەكەتتىك ۋنيۆەرسيتەتى «روبوتتار مەن اقىلدى ماشينالار زەرتحاناسىنىڭ» مەڭگەرۋشىسى ن.ەسماعامبەتوۆ، گروسسمەيستەر، شاحماتتان حالىقارالىق تۋرنيرلەر چەمپيونى د.سادۋاقاسوۆا، كاسىپكەر، «قازاقستاندىق OTAN ساعات كومپانياسىنىڭ» باسشىسى ا.توقسانباەۆ، ميۋنحەندەگى ماكسيميليان ليۋدۆيگ ۋنيۆەرسيتەتىنىڭ دوكتورانتى ق.ابديەۆا، «TERRAPOINT» جشس ينجەنەرى د.حومەنكو ءسوز سويلەدى.