قازاقستان پرەزيدەنتى سالتاناتتى ءىس-شارا بارىسىندا «تاۋەلسىزدىكتىڭ 25 جىلدىعى» مونۋمەنتىنىڭ بۇكىل حالىق بولىپ تاۋەلسىزدىك مەرەيتويىن مەرەكەلەپ جاتقان العاشقى كۇنى اشىلىپ وتىرعانىن اتاپ ءوتتى.

– بيىككە ۇمسىنعان بۇل اۋقىمدى ەسكەرتكىش ەلىمىزدىڭ شيرەك عاسىرداعى بۇرىن-سوڭدى بولماعان شارىقتاۋ كەزەڭىن جانە الەمنىڭ ەڭ وزىق وتىز ەلىنىڭ قاتارىنا قوسىلۋعا ۇمتىلىسىن ايشىقتايدى. ونىڭ 25 قىرى – تاۋەلسىز قازاقستاننىڭ زاماناۋي تاريحىنىڭ ءاربىر جىلىنىڭ سيمۆولدىق بەينەسى، – دەدى نۇرسۇلتان نازارباەۆ.

مەملەكەت باسشىسى مونۋمەنتتىڭ رەسپۋبليكامىزداعى باستى ساۋلەت رامىزدەرىنىڭ قاتارىنان ايرىقشا ورىن الاتىنىنا سەنىم ءبىلدىردى.

– بۇل مونۋمەنت قازاقستان رەسپۋبليكاسىنىڭ بەس جىلدىعى قارساڭىندا الماتى قالاسىندا اشىلعان العاشقى تاۋەلسىزدىك مونۋمەنتىنىڭ، ەلوردامىزدىڭ سيمۆولى بولعان بايتەرەكتىڭ، تاۋەلسىزدىكتىڭ 20 جىلدىعىندا بوي كوتەرگەن «قازاق ەلى» مەموريالدىق كەشەنى مەن «ماڭگىلىك ەل» سالتانات قاقپاسىنىڭ ورتاق تاريحي جەلىسىن جالعاستىراتىن بولادى، – دەدى ەلباسى.

قازاقستان پرەزيدەنتى استانانىڭ وسىناۋ جاڭا كورنەكتى تۇسى ەلوردا تۇرعىندارى مەن قوناقتارى ءجيى كەلەتىن تاعى ءبىر كوپشىلىك ورىنعا اينالاتىنىن ايتتى.

– بۇل مونۋمەنت ميلليونداعان مەيماندار كەلەتىن «ەكسپو-2017» حالىقارالىق مامانداندىرىلعان كورمەسى اۋماعىندا ورنالاسۋىمەن دە ەرەكشەلەنەدى، – دەدى نۇرسۇلتان نازارباەۆ.

سونداي-اق، مەملەكەت باسشىسى تاۋەلسىز قازاقستاننىڭ قارقىندى دامۋى بارىسىندا ەلوردا ءرولىنىڭ ارتىپ كەلە جاتقانىن اتاپ ءوتتى.

– كەلەشەكتە استانا تەك بىزدەردى عانا ەمەس، سونىمەن قاتار بۇكىل ەۋرازيا كونتينەنتىن تاڭعالدىرىپ، عىلىم مەن مادەنيەتتىڭ ورداسىنا اينالادى. حالىق قولايلى ءارى جايلى قالادا تۇراتىن بولادى، – دەدى ەلباسى.

قازاقستان پرەزيدەنتى «تاۋەلسىزدىكتىڭ 25 جىلدىعى» مونۋمەنتى ەلىمىز بەن ونىڭ ەلورداسىنا تارتىلعان سىي بولعانىن ايتىپ، جوبا يدەياسى اۆتورلارىنا، ساۋلەتشىلەر مەن قۇرىلىسشىلارعا نىساندى تابىستى اياقتاعانى ءۇشىن العىس ءبىلدىردى.

سوڭىندا نۇرسۇلتان نازارباەۆ بارشا وتانداستارىمىزدى تاۋەلسىزدىك مەرەيتويىمەن قۇتتىقتاپ، باق-بەرەكە جانە بەيبىتشىلىك پەن تاتۋلىق تىلەدى.