Aqpannıñ 2-i küni Azattıq tilşisimen telefon arqılı qısqa ğana söylesken Marğwlan Seysembaev qazir Qazaqstanda ekenin rastadı. Bwğan deyin Qazaqstanda özi men otbasınıñ qauipsizdigine “eñ joğarı därejede kepildik berilgeni” turalı habarlağan biznesmen elge qanday şarttarmen oralğanı turalı jurnalisterge kommentariy bermeytinin ayttı. Azattıq tilşisiniñ “Qauipsizdigiñiz turalı kepildikke senimdisiz be?” degen saualına Marğwlan Seysembaev:

- Senimdi bolmasam kelmes edim, – dep qısqa jauap berdi. Ol elge qaytıp oralğanına baylanıstı keyin äleumettik jelide aqparat jariyalaytının ayttı.

Birşama uaqıttan beri şetelde jürgen Marğwlan Seysembaev aqpannıñ 1-i küni Facebook äleumettik jelisindegi parağında öziniñ Mäskeu äuejayında ekenin, özine “joğarı deñgeyde kepildik” berilgen soñ Qazaqstanğa qaytıp oralatını turalı jariyalağan.

“Dostar, men Qazaqstanğa oralıp jatırmın! Men qazir Mäskeudemin. Meniñ jäne meniñ otbasımnıñ qauıpsizdigine eñ joğarı därejede kepil berildi! Ömir jalğasuda, biz birge äli talay-talay jaqsı jwmıstardı jasaymız! Meniñ jağdayımdı tüsinip, aqıl kemengerlikti körsetken “joğarıdağı” kisilerge (attarın atamayaq qoyayın) raqmet aytqım keledi!” dep jazdı ol (jazu punktuaciyası saqtaldı – red.)

​51 jastağı tanımal käsipker, “Al'yans-Banktiñ” bwrınğı menşik iesi Marğwlan Seysembaev tergeu organdarı onı “BTA bankten qarjı jımqırğan” degen ayıp tağılıp, twtqındalğan bwrınğı biznes-äriptesi Eskendir Erimbetovtiñ isine baylanıstı jauap aluğa şaqırğannan keyin Qazaqstannan ketip qalğanı turalı qañtardıñ 10-ı küni Facebook-tegi paraqşasında jariyalağan. Ol jolı Seysembaev Qazaqstannıñ bilik orındarı Eskendir Erimbetovti şetelde quğında jürgen “Mwhtar Äblyazovtiñ zañgeri bolıp istegen qarındası Bota Järdemälige qısım jasau maqsatımen twtqındağan boluı mümkin” degen boljamımen bölisken.

Oqi otırıñız: Marğwlan Seysembaevtıñ ekinşi emigraciyası

Biznesmenniñ şetelge ketkeni turalı jazbasına pikir qaldırğan jüzdegen jeli qoldanuşıları oğan qoldau bildirgen. Birneşe künnen keyin Seysembaev AQŞ-tıñ Viskonsin ştatında ekenin, amerikalıq biznes-seriktesterimen birqatar jobalar boyınşa kelissözder jürgizip jatqanı turalı da Facebook arqılı habarlağan.

Biznesmen Marğwlan Seysembaevtıñ şetelge ketkeni turalı mälimdemesinen keyin üş aptadan soñ Qazaqstanğa oraluına baylanıstı jeli qoldanuşılarınıñ pikiri ärtürli.

Onıñ Qazaqstanğa qaytatını turalı habardı Facebook-tegi postına pikir qaldırğandardıñ keybiri “tamaşa jañalıq” dep qabıldasa, endi bireuler “kepildikke senbeuge” şaqırğan.

Sonımen birge Seysembaev qazir qılmıstıq is boyınşa ayıp tağılıp, Almatınıñ tergeu abaqtısında qamauda otırğan “Eskendir Erimbetovke qarsı kuälik etu” üşin bilikpen ımırağa bardı dep küdiktenetinder de bar.

Bwğan baylanıstı Marğwlan Seysembaevtıñ özi: “Eskendirge qarsı eşqanday kuälik bermeymin. Aramdıqtı oydan şığarudı qoyıñdar” dep jazğan.

46 jastağı Eskendir Erimbetov pen tağı üş adam ötken jılğı qaraşadan beri abaqtıda qamauda otır. Tuıstarı men jaqtastarı türmede Erimbetovti wrıp-soğıp, azaptağanı turalı mälimdegen. Bilik orındarı azaptau turalı ayıptaulardı joqqa şığarıp, “Erimbetovtiñ jaqtastarı qılmıstıq iske sayasi reñk bergisi keledi” dep sanaydı.

Oqi otırıñız: Azaptau şağımı “Erimbetov isiniñ” sipatın özgertti

Marğwlan Seysembaev Qazaqstanğa şetelden “biliktiñ kepildigi” boyınşa osımen ekinşi ret oralıp otır. Bwdan segiz jıl bwrın Marğwlan Seysembaev biraz uaqıt bolğan şetelden Qazaqstanğa qaytıp kelip, “prezident Nwrswltan Nazarbaevqa adaldığın” mälimdegen. Sol kezde Seysembaev “bank biznesimen aynalıspaudı” wyğarğanın da jariya etken edi. Sonımen birge ol şetelde quğında jürgen qazaqstandıq emigrattardı özinen ülgi alıp, elge oraluğa şaqırğan. Oğan deyin Seysembaev şetelde bolğan kezde onıñ menşigindegi “Al'yans bank” memlekettiñ ieligine ötken.

2011 jılı Almatı sotı Marğwlan Seysembaevtı “bank qarajatın zañsız paydalanğanı” üşin ayıptı dep tanıp, oğan eki jıl şarttı jazatağayındağan.

Sodan bergi ötken uaqıt işinde Seysembaev Qazaqstanda birqatar qoğamdıq bastamalardı jüzege asıruğa talpınıstar jasap kördi. 2016 jılı ol äleumettik jelilerde “Baytaq dala” qoğamdıq tabiği qorığın qwrunauqanın bastadı, oğan deyin otandıq öndiruşilerdiñ önimi sapalı boluı üşin küresetin “Jauap beremin” attı jaña qoğamdıq qozğalıs qwru turalı bastama kötergen. Biraq ol jobalar iske aspağan küyi qaldı.

Azattıq radiosı

Keybir sarapşılar Qazaqstandağı sayasi elita elde beysayasi azamattıq qozğalıs qwrudıñ özin bilikke töngen qater dep qabıldaytındıqtan, top-menedjerdiñ “Jauap beremin” bastaması jaylı “äu bastan iske aspaytını belgili” degen boljam jasağan edi.