Halıqtan salığın jasırğan Mädeniet ministri otstavka ketsin…
kerey.kz
Mädeniet pen ruhaniyat, sport salaları – elimizdi älem aldında tanıtatın birden bir altın köpir sanaladı. Törtkül dünieni dür silkindirer öner, sport dodalarında atalğan qos salanıñ asığı alşısınan tüsse elimizdiñ bayrağın jelbiretip, namısın asqaqtatatını sözsiz. Ökinişke oray, soñğı uaqıtta mädeniet pen sport salalarınıñ salı suğa kete bastadı. Mädenietti damıtudıñ bağıtı mardımsız, isi qarqınsız, al öner men önerpazdar qorğausız küyge tüsti.
Qazaq öneri men mädenietiniñ soğıstan qalğan japan daladay hälge enui Mädeniet jäne sport ministri Aqtotı Rayımqwlovanıñ janın auırtpaytın sekildi. Sausaqpen sanarlıqtay az ğana uaqıttıñ işinde qalıñ eldiñ köz aldında ötip jatqan qanşama oqiğalar halıq pen mädeniet salası arasın jaqındatudıñ ornına alıstata tüskenin moyındamasqa amal joq. Teatrdı tärbie közi, mädeniet maytalmandarın tälim alatın twlğa retinde bağamdaytın halıq teatrğa külip, öner adamdarın qağıtıp otıratın jağdayğa tüse bastadı. Bwl olqılıqtarğa kinäli kim? Mädeniet jäne sport ministriniñ täjiribesizdigi me, älde komandasınıñ nietiniñ bwrıstığı ma? Juırda ğana teledidar men türli aqparat közderinde Äkemteatr jaylı jaysız habar taradı. Qızmetkerlerdiñ janayqayı Prezident Qasım-Jomart Kemelwlına deyin jetti. Prezidentke Ündeu joldap, araşa kütu qanday jağday bolsa da eñ soñğı şarasız hälde ğana jasalatın äreket. Demek, ministrlik tarapınan bwl iske tosqauıl qoyıp, qızmetkerlerdiñ aşuına qozğau bolğan öz äreketteriniñ maqsatın tüsindiruge eşqanday qadam jasalmağanı añğarıladı. Halıq ekige bölingen ärtisterdi körip, janı jabırqadı. Oğan deyin kino, teatr arqılı süysine qarap, ülgi etken ärtisterinen teris aynaldı. Bwl körinis ayranday wyığan qazaq önerinde alauızdıq tudıruşı indet taralğanın bayqattı. Qoğamnıñ indeti – kadr sayasatı, komanda jasaqtau, qudalau men türli amal-äreketter. Teatrdıñ tınıştığına qol swğıp, öz maqsatın ğana közdegen ministrliktiñ is-äreketi saldarınan ärtister zardap şegip, abıroyına ülken nwqsandar keldi. Qorğap, qoldap, bağıt berudiñ ornına ayğay-şudı eseley tüsuge äreket etken basşılıqtıñ işki oyı teatr wjımımen kezdesude türli saualdardan qaşqan ministrdiñ äreketinen anıq añğarıladı. Bir qızığı, ädildik kütip ministrge telmirgen teatr qızmetkerlerine mekeme direktorınıñ otbasılıq mäselesin qozğap, kekesindi keyippen wjımğa qwttı bolsın aytuı Ükimet müşesiniñ qızmettik etikasına layıq pa? Teatr qızmetkerlerin önerdiñ abıroyın asqaqtatıp, ıntımaq pen birliktiñ ülgisi boluğa şaqırudıñ ornına alauızdıq uın öz qolımen şaşıp ketui mädenietti damıtuğa bas auırtıp jürgen ministrdi bayqatpadı?
Teatr ğana emes kino salasında da şım-şıtırıq dau-damay kün sanap örşip baradı. Osı künge deyin 30-ğa juıq kino tüsirgen tanımal rejisser Aqan Sataev pen «Qazaqfil'm» kinostudiyası sotta jüzdesip jür. Tize qosıp eñbek etip, bilek biriktirip wlttıq kinonıñ deñgeyin köterer şaqta qazaqtıñ qos rejisseri zañ aldında tüyisui de der kezinde kürmeui şeşilmegen istiñ äseri ekeni dausız. Jer älemge «Tomiris» fil'mimen jar salğan Mädeniet jäne sport ministri kinostudiyalardıñ bwqaralıq aqparat qwraldarı arqılı tanımal bolıp jatqan daularına nükte qoyuğa äreket etudi qaperine alar emes.
“Er twğırıl” kinosınıñ rejisseri Metin Gyunay Elbasınıñ şaqıruımen Qazaqstanğa kelip ülken jobanı qolğa alğanı belgili. «Qazaq handığı» fil'miniñ jalğası ispetti köp seriyalı «Qasım han» fil'mi 2019 jıldıñ küzinde bastaluı tiis bolatın. Rejisser köktem ayında Türkistan oblısındağı tarihi orındardı aralap, tüsirilim alañdarımen tanısqanı jaylı aqparat közderi habarladı. Alayda ministrlik qoldau körsetui tiis tarihi fil'm söz küyinde ayaqsız qaldı. Fil'mniñ tüsirilimine qarsılıq bildirip, hat jazğan jazuşı Smağwl Elubaevtıñ aytqan uäji men ministrlik qoldağan scenariyge qatıstı pikir bildire almağan Aqtotı Rahmetollaqızı tarihi twlğanı jañğırtıp, wrpaq balasına nasihattauğa qwlıq tanıtqısı kelmedi. Eki söziniñ birinde jazuşınıñ qızımın dep közine jas aludan äri asa almaytın ministrdiñ bwl äreketi adamdar men kamera aldındağı şarasız röli sekildi. Sebebi, ruhaniyat patşalığınan när alğan qızdan qazaq ruhaniyatı men mädenietine jañaşa lep, erekşe qarqın alıp keler degen ümitimiz aqtalatın türi joq.
MÄDENIET TABIS KÖZİ ME?
Olay deytinimiz, mädeniet ministriöz lauazımın paydalanıp zañsız bılıqqa qorıqpay kirisken sıñaylı. Adam Kapanov librettosınıñ «Aspan köşi» jelisi boyınşa qoyılğan Kseniya Zverevanıñ «Zaman tınısı» bir bölimdi baletiniñ muzıkasın jazğan Aqtotı Rayımqwlova 3 million 430 mıñ teñge gonarar alğan. Alayda atalğan qarjı salıq komitetinen jasırılıp Ermek Şınarbaev basqaratın “Töltuma” kompaniyasınıñ şotına audarılğan. Memleket qazınasınan bölingen qarjığa osınday amal-aylamen qol jetkizgen lauazım iesiniñ basqa salalar boyınşa da tağı qanday ayla-şarğılarğa barıp jatqanı belgisiz.
Juırda ğana Mädeniet jäne sport ministrliginiñ alqa mäjilisinde Almatı qalasınan arnayı kelgen ata-ana öz şağımdarın jetkizbek bolğan. Ökinişke oray ministr saualdı jüre tıñdap, ministrlik ökilderi anağa böget jasap, üntayaqtıñ dauısın öşirip sarsañğa tüsti. Ministr bala tağdırına nemqwraylı qarağanına qaramay oquınan qol üzgen jas spportşı halıqaralıq bayqauda top jarıp, altın jüldeni enşilep qayttı. Prezident Qasım-Jomart Toqaev aytqanday halıq pen bilik arasındağı aşıq dialogtı ornata almağan Aqtotı Rayımqwlova men onıñ komandası äli de biz bilmeytin qanday bılıqtarğa batıp jatqanı belgisiz.
Jüsipbek Qorlanbek;
Mädeniet qayratkeri,
Nwrğali Twrlıbek
Mädeniet salasınıñ üzdigi“,
Halıqaralıq konkurstardıñ laureatı .
Pikir qaldıru