AQ ÜYDEGİ KEZDESU

Prezidentterdiñ kezdesui Aq üyde ötti. Djo Bayden Vladimir Zelenskiydi prezident rezidenciyasına kireberiste jılı qarsı alıp, kezdesu basında Amerika halqı Ukrainanı “maqtanışpen” qoldaydı jäne onıñ “ädiletti älemge” wmtılısın quattaydı dedi. AQŞ prezidenti Reseydiñ Ukrainadağı infraqwrılımdardı atqılauın ayıptap, Mäskeu qaqağan ayazdı “qaru retinde paydalanuğa tırısıp jatır” dem mälimdedi. Ukrain halqı älemdi “ruhtandırıp jatır” degen pikirin de jetkizdi.

Zelenskiy AQŞ prezidenti, Kongress jäne amerikalıqtarğa Ukrainağa kömegi üşin alğıs bildirdi.

Kelissöz eki sağatqa wlasıp, artınan eki el basşısı baspasöz jiının ötkizdi. Bayden Ukrainağa qosımşa kömek retinde 1,85 mlrd dollar böletinin mälimdedi. Bwl kömektiñ işinde Patriot äueden qorğanu jüyesi de bar.

Sonday-aq Aq üy iesi ukrain halqı Resey basqınşılığına tötep berip keledi jäne AQŞ ukrain halqınıñ bostandıq üşin küresin qolday beredi dep mälimdedi. Bayden osı twsta AQŞ-tıñ Reseyge salğan sankciyaları men Ukrainağa äskeri tehnika men qaru-jaraq jetkizgenin jäne qarjılay qoldağanın da atap ötti. Ukrainanı qoldau arqılı AQŞ pen odaqtastarı azattıq, demokratiya jäne halıqaralıq qwqıqtıñ negizgi principterine dem beredi dedi.

Zelenskiy baspasöz jiını kezinde kezdesudi “tarihi sät” dep atap, bastalğanına 300 kün bolğan soğısta AQŞ Ukrainanıñ nağız äriptesi äri odaqtası ekenin däleldedi dedi. Ol sonday-aq Ukrainanıñ territoriyalıq twtastıq jäne soğıs şığının öteu mäselesine kelgende eşqanday şartqa könbeytinin mälimdedi.

“Putinge ne aytqıñız keledi?” degen swraqqa Zelenskiy “qazir älemge ne aytqısı keletinin Putinniñ özi oylanuı tiis, ol özin örkenietti adamdar qatarınan şığarıp tastadı” dedi.

Bayden bolsa, Patriot jüyesiniñ tek qorğanu üşin berilip jatqanın, jağdaydı uşıqtırudı közdemeytinin mälimdedi.

“Olardı müldem paydalanbağan da dwrıs bolar edi, tek şabuıldı toqtatu üşin ğana” dedi ol.

Zelenskiy Patriot jüyelerin jaña kömek toptamasınıñ işindegi eñ eleulisi dep atap ötip, Kievke “jaqsı jañalıqpen” baratın boldım dedi. Onıñ sözinşe, bwl jüyeler Ukraina äue keñistigin qorğauda ülken qadam bolmaq.

Däl qazir Resey küşteri Ukraina qalalarınıñ, onı işinde infraqwrılım nısandarın zımıran jäne dron kömegimen atqılap jatır. Ukraina AQŞ-tıñ bwl qaruın osı infraqwrılım nısandarın qorğau üşin qajet etip otır.

Alayda Patriot jüyeleri birden jiberilmeydi. AQŞ äskeri aldımen Ukraina küşterine bwl jüyeni qoldanudı üyretui tiis.

Zelenskiy kezdesuge ädettegidey äskeri ülgide jasıl kiimmen keldi.

KONGRESSTE SÖYLEGEN SÖZİ

Kongresstiñ jalpı otırısında söz söylegen Zelenskiy AQŞ zañ şığaruşıların jäne amerikalıqtardı Ukrainanı Reseydiñ basqınşılıq soğısına qarsı küresinde qoldaudı jalğastıra beruge şaqırdı. Bwl soğısta Ukrainanıñ jeñisinen basqasınıñ bäri erkin älemge zalal keltiredi dedi.

“Küres tek ukrainalıqtardıñ qauipsizdigi, erkindigi jäne ömiri üşin ğana emes” dedi ol ağılşın tilinde ökilder palatasınıñ törinen söyley otırıp. “[Bwl küres] ukraindar men amerikalıqtarda demokratiya bolar-bolmasın şeşedi”.

Kongress pen AQŞ halqına arnalğan bwl ündeuinde Zelenskiy Ukraina jetik zamanaui qaru kömegimen jeñiske jete alatının aytıp, Ukrainanıñ äskeri quatı mıqtı degen Reseyge 10 ay tötep bere alğanın eske saldı.

“Sizderdiñ aqşalarıñız qayırımdılıq emes. Bwl ğalamdıq qauipsizdik pen demokratiyağa salınğan investiciya” dedi ol.

25 minutqa wlasqan sözinde Zelenskiy Ukrainanıñ Reseyge qarsı soğısı men AQŞ äskeriniñ Ekinşi düniejüzilik soğısımen jäne Wlıbritaniyağa qarsı täuelsizdik üşin küresimen salıstırdı.

Kongress osı aptada Ukrainağa 45 mlrd dollar köleminde kömek körsetudi qamtitın qwjatqa dauıs bermek.