«Mağınasız jwmıstan şarşadım»: qazirgi Konstituciyanıñ avtorı mälimdeme jasadı
kerey.kz
Qazirgi Ata zañnıñ avtorlarınıñ biri, akademik Maydan Süleymenov Konstituciya reformasın sınadı. Ol zañnıñ mätinin şağın bir top äldeqaşan jazıp qoyğanın, al komissiya jay ğana maqwldaytının aytadı. Onıñ sözinşe, ğalımdar men sarapşılardıñ wsınıstarı eskerilmeydi.
Bwl turalı akademik Facebook-te jazdı:
Keyingi kezde menen Konstituciyanı talqılap jatqanda, nege ünsiz qalğanımdı jii swrap jatır. Qısqa qayırsam: mağınasız jwmıstan şarşadım.Iä, men qazirgi Konstituciyanıñ avtorlarınıñ birimin. Talqılau kezinde eki mäsele üşin kürestim: Konstituciyalıq sottı saqtau jäne Parlamenttiñ ökilettigin şektemeu. Biraq ekeui de qabıldanbadı. Soğan qaramastan, men bwl Konstituciyadan wyalmaymın.
Men Nazarbaev pen onıñ otbasınıñ jeke biligin nığaytuğa bağıttalğan keyingi tüzetulerden wyalamın. Nazarbaevtıñ kezinde-aq osı masqara tüzetulerdiñ barlığın taldap, Konstituciyanı jetildiru boyınşa birqatar wsınıstar engizu turalı auqımdı maqala jazdım. Onıñ işinde bir palatalı Parlament te bar.
Toqaevtıñ kezinde de engizilgen birqatar tüzetuge qarsı boldım. Ärine, eşqaysı eskerilmedi.
Qazir de solay bolmaq. Tüzetuler mätini äldeqaşan dayındalıp qoyğan jäne eşkim eşteñeni özgertpeydi. Konstituciyalıq komissiya bwl fars. Onıñ qwramında jüzdegen adam bar. Al zañdardıñ mätinin şağın bir top jazadı.
Konstituciyalıq sarapşılar tobında 12 adam boldı. Sol kezde de biz Şaykenovtiñ tobı äldeqaşan dayındap qoyğan, ayaqtalğan jobanı talqılağan edik. Azamattıq kodeksti meniñ basşılığımmen 12 ğalımnan twratın top jazğan. Mwnda da solay. Şağın bir top mätinin jazdı. Al Konstituciyalıq komissiya onı birauızdan qoldadı.
Men ğalımdardıñ özderi wsınıp, tırısıp jatqan äreketterin qwptaymın. Jwmageldi Elubaev, Orazalı Erjanov, Janar Süleymenova jäne basqa da belsendiler bar. Biraq ol wsınıstardıñ eşbiri qabıldanbaytınına kämil senimdimin.
Konstituciya manifest emes, bwl — zañ. Bağdarlama da emes. Ol bolaşaqqa şaqırmaydı, qazir bardı bekitedi. Sondıqtan preambula turalı maqtaular men basqa da nasihat wrandarı orınsız.
Jobanıñ bastı kemşiligi — erkin saylaudı joyu. Oppoziciyalıq partiya qwruğa mümkindeu bermeu, Parlamentti tek partiyalıq tizim boyınşa qwru — bwl demokratiyadan bas tartu.
Eñ üzdik Konstituciya — 1993 jılğı Konstituciya bolğan edi. Odan keyingileri barğan sayın naşarlap baradı.
Ökinişke qaray, bizdiñ wsınıstarımız eskerilmeydi. Al mağan mağınasız jwmıs istegen wnamaydı. Sondıqtan ünsiz qaldım. Osı jazbadan keyin endi bir auız söz de aytpaymın.
Pikir qaldıru