Säuirdiñ 29-ı küni Azattıqqa telefon soğıp, özin Zaynidin Narmetov dep tanıstırğan adam biıl aqpanda Sarıağaş audanında bolğan täripsizdikterden soñ Intımaq aulınınan köşirilgen täjik otbasınıñ biri ekenin ayttı. Ol aqpandağı tärtipsizdikterge sebep bolğan kisi ölimine küdikti Navmidin Narmetovtiñ tuğan ağası ekenin jetkizdi.

«Kisi öltirgen bauırımnıñ policiyağa beriluine özim kömektestim, sol üşin qwqıq qorğau organdarı basşıları raqmetin aytqan» deydi Zaynitdin Narmetov. Ol auıldağı tärtipsizdikterden keyingi eki jarım ay Şımkent qalasında otbasımen birge policiyanıñ qadağalauında üyqamaqta otırğanday kün keşip jatqanın aytadı.

Aqpannıñ 3-i küni Intımaq auılınıñ twrğını Baqıtjan Artıqovtıñ kisi qolınan mert boluı Bostandıq jäne Intımaq auıldarında aqpannıñ 5-i men 6-sında tärtipsizdikterge wlasıp, saldarınan jergilikti täjik twrğındarınıñ menşigindegi birneşe twrğın üy men avtokölikter örtengeni habarlanğan edi. Ölgen jigittiñ tuıstarı osı oqiğa kezinde atalğan auıldardağı etnikalıq täjikterdi köşirudi talap etkeni turalı sol kezde söz bolğan.

Zaynidin Narmetovtıñ aytuınşa, Sarıağaştağı oqiğadan soñ aqpannıñ 11-inde audan äkimdigi ağayındı Narmetovter otbasın Şardara kentindegi belgisiz üyge aparğan. Onda jağday joqtığına baylanıstı Zayniddin Narmetov äyeli jäne 19 jastağı wlımen birge Şımkent qalasında päter jaldap twratın qızınıñ qolına swranıp, sonda kelgen. Onıñ sözinşe, kisi ölimine küdikti inisi Navmidin Narmetovtiñ äyeli men balaları jäne äke-şeşesi de qazir Şımkent qalasında policiyanıñ baqılauında otır eken.

– Tuğan ağası bolğanımmen, ol üyden bölek twrğanıma 30 jıl boldı. Soğan qaramastan meniñ otbasımdı da üyqamaqta wstağanday etip otırğanın wğa almaymın. Äueli audan äkimi Bwqarbay Parmanov «2-3 kün ğana otırasıñdar» degen, keyin «Qazaqstan prezidenti saylauı ötken soñ qaytasıñdar» degen söz şıqtı, – deydi ol.

Intımaq auılındağı örtengen üyge qarap twrğan adam. 11 aqpan 2015 jıl.

Zaynitdin Narmetov bwrınnan susamır (qant diabetimen) dertimen auıratının, bir ayağı men bir közden ayırılıp, ekinşi közine birneşe ret operaciya jasatqan ekinşi toptağı mügedek ekenin aytadı.

Öz sözinşe, auıldağı orta mektepte 30 jılğa juıq mwğalim bolıp istep kele jatqan onıñ jinağan qarjısı da joq, moynında ötelmegen krediti bar. Şımkentke kelgeli azıq-tülik, däri-därmek alatın aqşaları tausılğan. Zaynitdin Narmetov özine künine tört ret insulin egetinin, qazir közi de naşarlap, ekpeni balası salıp jürgenin aytadı.

– Azıq-tülik alatın aqşamız da joq. Bizdi qarauıldap jürgen qwqıq qorğau organdarınıñ qızmetkerleri janı aşıp, keyde öz qaltalarınan aqşa şığarıp, azıq-tülik äkep jür, – deydi ol.

Zaynitdin Narmetov özin zañsız wstap otırğanın aytıp bas prokuraturağa, prezident äkimşiligine hat jazıptı. Biraq olar hattı Sarıağaş audanı prokuraturasına joldağan, ol jerdegiler Sarıağaş audanı äkimdigine jiberip, mäseleni qaraudı swrağan. Zaynitdin Narmetov Azattıqqa jibergen hattardıñ arasında Sarıağaş audanı äkiminiñ orınbasarı Qwzıret Qıstaubaevtıñ Jartıtöbe auıldıq okrugine «mäseleni qarau jöninde» säuirdiñ 7-sinde jazğan hatı da bar.

«RAYINAN QAYTQAN JOQ»

Azattıq tilşisi Jartıtöbe auıldıq okrugine jañadan tağayındalğan äkim Abay Äşirov «Zaynitdin Narmetovtiñ otbasın auıldan uaqıtşa ketiru – auıl tınıştığın saqtau üşin jasalğan şara» dep tüsindirdi. Onıñ sözine qarağanda, aqpandağı oqiğadan keyin auıl tınıştalğan. Biraq, kisi öltirgen azamattıñ jaqın tuısı auılğa qayta oraluğa äli erte dep sanaydı äkim.

– Auıldağı täjik diasporası balası qaza bolğan üyge barıp köñil aytıp, birneşe ret keşirim swradı. Biraq, kisi ölimine küdikti Navmidin Narmetovtiñ jaqın tuıstarı endi ğana keşirim swrap jatır. Birden swrauğa bata almadı. Zaynitdin Narmetov säl şıdasa auıldağı ahualğa da jaqsı bolar edi, bwl mäsele şeşiletin uaqıtta däl ayta almaymın, – deydi ol.

Äkim auılda wltaralıq tatulıq mäselesi jayında birneşe ret jiılıs ötkenin ayttı.

– Qaza bolğan Baqıtjannıñ ata-anası men tuıstarınıñ aldınan ötip jatırmız. Bügin, säuirdiñ 30-ı – Baqıtjannıñ tuğan küni, Qwran oqıtıp, as beredi, soğan barğalı twrmın, – dedi ol Azattıq tilşisine.

Auıl äkiminiñ sözin Sarıağaş audanı täjik diasporasınıñ jetekşisi Nwräli Şaoliev te rastadı.

– Täjik aqsaqaldarı birneşe ret keşirim swrap bardıq. Biraq, Narmetov äuletiniñ özi barsa keşirim berer dep kütip otırmız. Kisisi qaza bolğan azamattıñ tuıstarı «auıldan köşsin» degen talabınan qaytsa Zaynidin Narmetovtiñ otbası da qayta oraladı, – deydi ol.

Intımaq auılındağı jılıjaylardıñ biri. Oñtüstik Qazaqstan oblısı Sarıağaş audanı, 11 aqpan 2015 jıl.

Özi de Intımaq auılında twratın Nwräli Şoaliev Zaynitdin Narmetovtiñ «auıldan köşiriletin otbasılardıñ tizimine asığıstıqpen» ilinip ketkenin aytadı.

– Olar bölek üyde twratın otbası. Zaynitdinniñ densaulığı naşar ekenin de bilemiz. Kreditterin tölep, järdemdesip jatırmız. Özine de birneşe ret barıp, şıday twrudı ötindik. Ol qaytıp kelse auıldan tınıştıq ketui mümkin. Qaytıs bolğan üydiñ tuıstarı äli rayınan qaytqan joq. Zaynitdin Narmetovtiñ üyinde qazir tuıstarı twradı, esik aldındağı baqşasın egip jür, – deydi ol.

Nwräli Şaolievtiñ aytuınşa, qazir Jartıtöbe auıldıq okruginde tünge qaray onnan asa policiya köligi kezekşilik etedi. Auılda qwramında 71 adam bar köşe komiteti saylanıp, jastar men bedeldi adamdar tünimen kezektesip köşe aralaydı.

Oñtüstik Qazaqstan oblısı Sarıağaş audanı Jartıtöbe auıldıq okrugine qarastı Intımaq pen Bostandıq auıldarında aqpannıñ 5-i küni qazaq jastarı jappay köşege şığıp, sol auıldağı jergilikti etnikalıq täjikterge tiesili ondağan üy men kölikter örtengen.

Intımaq auıldıq äkimdigi aldında twrğan policiya qızmetkerleri. 11 aqpan 2015 jıl.

Qwqıq qorğau organdarı taratqan aqparatqa qarağanda, qazaq jastarınıñ narazılığına aqpannıñ 3-i küni kisi qolınan qaza bolğan Intımaq auılı twrğını Baqıtjan Artıqovtıñ ölimi sebep bolğan. Azattıq tilşisimen söylesken jergilikti twrğındardıñ sözine qarağanda, qaza tapqan azamat özine tiesili jılıjaydı Bostandıq auılınıñ twrğınına jalğa bergen. Keyin ekeuiniñ arasında dau tuıp, onıñ soñı kisi ölimine soqtırğan.

Qılmısqa küdikti Bostandıq auılınıñ twrğını Navmidin Narmetov arada birneşe kün ötkende Özbekstan aumağında wstalıp, Qazaqstanğa jetkizilgen. Onıñ üstinen «adam öltiru» babı boyınşa qozğalğan qılmıstıq is oblıstıq qılmıstıq ister jönindegi mamandandırılğan audanaralıq sotqa aqpannıñ 24-i küni tüsken.

Naurızdıñ bas kezinde Oñtüstik Qazaqstan oblıstıq qılmıstıq ister jönindegi mamandandırılğan audanaralıq sottıñ sud'yası Abinur Qarabaev «Sarıağaş oqiğasına» qatıstı qozğalğan qılmıstıq is qosımşa ayğaqtar tabıluına baylanıstı qayta tergeuge jibergenin habarlağan.

azattyq.org