Qwrmetti oqırman, säuirdiñ soñına qaray astanalıq biznesmen Qayrat JAMALIEV pen osı qala twrğını Älibi JWMAĞWLOVtıñ arasında bolğan dau-damayğa baylanıstı tağı da kezekti aqparattar ağını payda boldı. Tura bügin. Ötkende ğana Wlt.kz internet-basılımı atalmış biznesmenniñ jwbayı ALENA hanımmen bolğan swhbat barısın jariyalağan bolsa, ALENA hanımnıñ küyeuinen auır dene jaraqatın alğan Älibi JWMAĞWLOV mırza da aqparat ökilderine swhbat bere bastadı. Biz bügin Älibi mırzanıñ Radiotoçka.kz portalına bergen jedel swhbatın öz oqırmandarımızdıñ nazarına ıqşamdap wsınğandı jön kördik.

Sonımen, ÄLİBI ne deydi, nazar audarayıq:

- Älibi, sizdiñ qazirgi köñil-küyiñiz qalay?

— Rahmet, meniñ qazirgi jağdayımdı jaqsı dep aytuğa boladı.

- Onda aytıñızşı, sol küni keşkisin siz Aynwr Isina hanımnıñ üyine nege bardıñız, älde sizderdiñ aralarıñızda qanday da bir qarım-qatınas bar ma? Sonımen birge sizge telefon şalğan kim? Älde Qayrat Jamalievke telefon şalğan sizdiñ öziñiz be ediñiz?

— Men Qayratqa birinşi bolıp telefon soqqan joqpın, mwnıñ anıq-qanığın teksere salu eşqanday qiındıq tudırmaydı. Al sol küni mağan Qayrat Jamalievtiñ özi telefon soqtı. Telefon soqtı da, meniñ kelip ketuimdi ötindi. Biz bwğan deyin de birneşe märte kezdesken bolatınbız, sondıqtan men onıñ belgilegen jerine keşikpey – kelisken uaqıtta bardım. Men älbette onıñ tarapınan qanday da bir qauip-qater bola qoyadı-au dep oylağan joqpın, öytkeni men bala kezimnen ülken adamdardı sıylau kerektigin boyıma äbden siñirip ösken janmın: eger öziñnen ülken adam kezdesuge şaqırıp twrsa, onda ärine baru kerek, onıñ üstine onıñ jası meniñ äkemniñ jasımen şamalas. Barğan kezde ol mağan eşqanday qoqan-loqqı jasağan joq, kerisinşe öte mädenietti türde işke kiruimdi ötindi.

- Osıdan birer apta bwrın aqparat qwraldarına bergen swhbatında Aynwr Isina öziniñ sizdi onşa jaqsı bilmeytinin, ekeuleriñizdiñ aralarıñızda eşqanday da qarım-qatınastardıñ bolmağanın mälimdedi. Ol sizdi «qır soñımnan qalmaydı» degendey äñgime ayttı. Osı şındıq pa?

— Aynwr ekeumiz kafede tanısqanbız. Birneşe ayday jap-jaqsı qarım-qatınasta da boldıq. Şınımdı aytsam, men onıñ azamattıq nekedegi küyeuiniñ, tipti balasınıñ da barın bilgen joqpın. Al säl keyinirek Aynwr mağan öziniñ küyeui bar ekenin aytqan soñ men älbette, onımen qarım-qatınasımdı birden üzdim. Biraq ol mağan ärdayım telefon soğıp… tipti keyde meni özi izdep keletin. Sodan keyin biz, yağni Aynwr, Jamaliev jäne men – üşeumiz kezdestik. Kedesu barısında Aynwr Qayratpen sözge kelip qaldı da, men birden ketip qaldım. Ketip qaldım da – osımen bäri de bitti dep oyladım.

- Siz soqqığa jığılğan küni Aynwr päterde boldı ma?

— Joq.

- Siz Aynwrdı süydiñiz be?

— Men ärine Aynwrdı öte jaqsı kördim. Süydim, bılayşa aytqanda. Ol da meni süydi. Biraq öziniñ azamattıq nekede küyeui, balası bar bolğanın menen jasırğanın men keşire almadım. Ol mağan tipti jasırın türde kezdesip twrayıq dep te qolqa saldı. Men, sonday-aq, oğan eşqaşanda «jetimmin» dep te aytqan emespin, men onıñ osınday mälimdemesin estigen kezde qattı tañ qaldım. Onıñ aytuınşa, «Qayrat milliondardıñ üstimen» jüredi eken, al men bolsam «Aynwrdıñ özin emes, onıñ aqşasın ğana jaqsı köredi» ekenmin… tağısın tağılar. Men abdırap qaldım. Mwndaydı estigende men qattı abdıradım, şınımdı aytayın.

- Sizdiñ äkeñiz jariya etken beynematerialda siz «adam öltirgeniñizdi» moyındapsız. Nege?

— Meni jäy ğana wrıp-soqqan joq, meni qattı qinadı. Oyladım – bitti, ölgen jerim osı şığar dedim. Al endi meni beynekamerağa jazıp, qaydağı bir adamdardıñ ölimi turalı ayta bastağanda men esime özimniñ tanıstarımnıñ atı-jönderin tüsirdim. Ol tanıstarımnıñ köpşiligi Almatıda birge oqığan kurstastarım bolatın. Olardıñ eşqaysısı da ölgen joq älbette, barlığı da aman-esen. Biraq olar meni nege beynekamerağa jazdı – men osını tüsinbedim, äytse de bir närseni anıq tüsindim – olar özderi jazğan beynematerialdı bir jaqqa jibermekşi boldı.

- Qayrattıñ zañdı jwbayı Alena Jamalievanıñ aytuına qarağanda, jaqında oğan belgisiz bir boyjetken telefon soğıp, sizdi qızqwmar, aqşası-baylığı köp äyel adamdardıñ soñınan jügiredi, solardı «obslujivat'» etedi degen mağınada äñgimeler aytıptı. Bwğan siz ne degen bolar ediñiz?

— Alena Jamalievanı men mülde bilmeymin, ol da meni bilmeytin bolsa kerek dep oylaymın. Al Almatıda men ras, 2013-şi jılı jeke şarualarımmen eki ayday bolğanmın. Sol kezde älbette bir otbasınıñ päterinen bölme jaldağanmın, alayda bir de bir auqattı äyelmen qarım-qatınasta bolğan emespin. Bos sözdiñ keregi ne, eger ol däl osılay dep oylaytın bolsa, tapsın sol özine telefon soqqan boyjetkendi, aytıp bersin sol boyjetkenniñ aytqandarın jolma-jol qaytalap.
- Sizderdiñ oqiğalarıñızdan keyin internetti paydalanuşılar ekige bölinip ketti: olardıñ biri sizdi jaqtaydı da, ekinşileri Jamalievti jaqtaydı. Siz bwğan qalay qaraysız?

— Men keyingi kezderi internetke öte sirek kiretin bolğanmın, sondıqtan bwl turasında eşteñe ayta almaymın.

- Siz Qayrattı keşire alar ma ediñiz?

— Joq. Söz joq, men onı keşire almaymın.

- Osı oqiğanıñ barlıq ıstıq-suığı, ırıñ-jırıñı bitken soñ siz öziñizdiñ aldağı ömiriñizdi köz aldıñızğa qalay elestetesiz?

— Qalay boluşı edi, jwmısımdı istep, ömir süruimdi ärmen qaray jalğastıra beretin bolamın da.

Mine, Jwmağwlov-Jamaliev-Isina hikayasınıñ äzirge wzın-ırğası osınday bolıp twr. Jwmağwlov jazılıp kele jatır. Jamaliev qamauda jatır. Isin hanım äzirge tıp-tınış. Älbette, osı jerde oqırmandarımızdıñ kökeyin kerneytin tağı bir mäsele bar, ol – Älibidiñ äkesi Nwrlan mırzanıñ «wlımnıñ emdeluine qajet bolıp qaluı mümkin-au» degen oymen köpşilikten kömek swrap, öziniñ banktegi esep-şotın körsetkeni jönindegi mäsele.

Bwl mäselede äzirge bizdiñ biletinimiz – Älibidiñ äkesi Nwrlan Jwmağwlov qazaqstandıqtardan tüsken qarjınıñ bir tiınına da tiispegen. Banktegi esep-şotınan «ARUJAN» qoğamdıq qorına 54 500 teñgeni audarıp jiberigen. Al endi Giwi-koşelek degenmen äzirge jağday qiındau bolıp twrğanğa wqsaydı, Nwrlan Jwmağwlovtıñ aytuına qarağanda. Biraq qalay bolğan künde de qwjattarğa baylanıstı tuındaytın birqatar formal'dilikter jolğa qoyılğannan keyin kelesi aptanıñ bas kezinde esep-şotına tüsken 2049931 teñgeni de NWRLAN mırza atalmış qoğamdıq qordıñ esebine audarmaq.

Älibidiñ äkesiniñ «ötken ömir jolına» baylanıstı aqparat qwraldarında jariyalanğan keybir naqtı emes mälimetterge keletin bolsaq, Nwrlan Jwmağwlov mırza bwl mäseleniñ eşqanday qwpiya emes ekenin mälimdedi. «Iä, meniñ ömirimde qwpiya eşteñe je joq, üstimnen birneşe märte qılmıstıq isterdiñ qozğalğanı ras, alayda olardıñ barlığı da zañğa säykes toqtatılğan. Men eşqaşan sottalğan emespin. Al jwmısım jağına keletin bolsaq, men Astana boyınşa qwrılıs departamentinde qızmet isteymin…» dedi ol.

Esimizge tüsire ketetin bolsaq, Astana qalasınıñ twrğını Älibi Jwmağwlovtı wrıp-soğıp, oğan auır dene jaraqatın saldı degen küdikpen Jamaliev jäne Pribıtkov degen azamattar qamauğa alınğan bolsa, üşinşi küdikti Arman Äbiltaevqa tiisti organdar tarapınan izdeu jariyalanğan.

Marat MADALIMOV.

ult.kz