Türkiyanıñ Adana qalasındağı ortalıq dañğıldardıñ birine Nazarbaev esimi berildi.

Türiktiñ «Adana habarları» aqparattıq agenttiginiñ habarlauınşa, gubernator Mwstafa Buyuk dañğıldıñ aşılu saltanatında «Nazarbaev -halıqaralıq deñgeyde tanılğan twlğa. Onıñ elin damıtu strategiyasın Türkiyanıñ irgesin qalağan Mwstafa Kemal Atatüriktiñ josparımen salıstıruğa boladı. Nwrswltan Nazarbaevtıñ basşılığımen Qazaqstan älemniñ köptegen halıqtarı üşin örkendeudiñ, beybitşilik pen twraqtılıqtıñ simvolına aynalğanın atap ötkim keledi» dep mälimdegen.

Bwl – ortalıq köşeleriniñ birine Nazarbaevtıñ atı berilgen Türkiyanıñ törtinşi qalası. 2011 jıldıñ säuirinde Nazarbaevtıñ qwrmetine Nevşehir qalası köşeleriniñ birin atağan. 2012 jıldıñ qazanında Nazarbaev esimi Qırşehir qalasındağı, al 2013 jılı Gebze qalasındağı köşege berilgen.

ŞEŞENSTANDA BASTALĞAN 

2010 jıldıñ mausımında Türkiya astanasında Nazarbaevqa eskertkiş ornatıldı. Onı aşu saltanatında sol kezdegi Türkiya prezidenti Abdulla Gül «bwl – onıñ külli türki älemi üşin jasap jatqan igi isterine rizaşılıq belgisi» dedi.

Qazaqstan parlamenti deputatı Aygül Solov'eva türik qalası köşesine prezident esimin beru turalı şeşimdi zañ şığaruşı organ qabıldağandıqtan, onıñ zañdılığı men jariyalılığına kümän joq dep sanaydı.

Türkiyadağı «Adana haberleri» agenttiginiñ Nwrswltan Nazarbaev atında köşe aşılğanı jaylı jañalığınan alınğan fotokopiya.

- Elimiz täuelsizdik alğan alğaşqı künnen bastap Qazaqstan-Türkiya qatınastarın damıtuğa Nazarbaevtıñ qosqan ülesi ölşeusiz äri ol kisiniñ qoldauımen qazaq-türik dostığı nığaya beretinine senimdimin, – deydi ol.

Türkiya biligi şeşimin täuelsiz jurnalist Sergey Duvanov ta orındı sanaydı. Ol Azattıqqa «Qazaqstan-Türkiya qarım-qatınasın damıtuğa Nwrswltan Nazarbaev şınımen zor üles qostı» deydi.

Qazaqstannan tısqarı jerlerde prezident Nazarbaevtıñ qwrmetine atalğan twñğış köşe 2007 jılı Şeşen Respublikasınıñ Groznıy qalasında payda bolğan. Keyin Nazarbaev esimi qaladağı bir mektepke de berildi.

2010 jıldan beri Iordaniya astanası Amman qalasında da Nazarbaev atındağı köşe bar. Al Qırğızstandağı Şolpan Ata qalasında Nwrswltan Nazarbaevqa qola müsin ornatılğan. Qazir Oş qalasında Nazarbaev atındağı sayabaq pen mektep salınıp jatır. BAQ-tıñ habarlauınşa, mektep qwrılısın Qazaqstan qarjılandıradı.

QAZAQSTANDA NAZARBAEV KÖŞESİ JOQ

Nazarbaevqa alğaşqı eskertkiş Ukrainanıñ Dneprodzerjinsk qalasında ornatılğan. 1958-1960 jıldarı Qazaqstannıñ bolaşaq prezidenti osı elde jergilikti käsiptik uçilişede oqığan.

Al Qazaqstannıñ özinde Nazarbaevtıñ esimimen atalatın köşe joq. Soñğı jıldarı şeneunikter men parlament deputattarı Astana äuejayı men el astanasın Nwrswltan dep ataudı talay wsınğan, biraq prezident bwl wsınıstardı qabıldamadı.

Astanadağı jaña universitet Nazarbaevtıñ esimimen ataladı. Qazaqstandağı «Nazarbaev ziyatkerlik mektebi» atalatın memlekettik elitalıq mektepter jelisi ğılım, ekonomika jäne sayasi saladağı darındı balalardı oqıtuğa arnalğan.

2010 jıldıñ şildesi – Nwrswltan Nazarbaevtıñ tuğan küni qarsañında Almatıda dendropark aşılıp, prezident qwrmetine ataldı. Onıñ esimimen atalatın sayabaqtar Astana, Aqtöbe qalalarında da bar.

2001 jılı prezident Nwrswltan Nazarbaevtıñ qwrmetine «Qazaqstan Respublikasınıñ Twñğış Prezidenti – Elbası Nwrswltan Nazarbaev» ordeni tağayındalğan. Nagradalar jüyesindegi därejesi – üşinşi orında.

İle Alatauınıñ Tyan-Şan' jotasınıñ soltüstik betkeyindegi Komsomol şıñı atauı 1998 jılı «Nwrswltan şıñı» dep özgertilgen.

2015 jılı Niderland Nazarbaevtıñ beynesi salınğan poşta markası men «prezident Nazarbaev» qızğaldağınıñ jaña sortın tanıstırdı.