تۇركيانىڭ ادانا قالاسىنداعى ورتالىق داڭعىلداردىڭ بىرىنە نازارباەۆ ەسىمى بەرىلدى.

تۇرىكتىڭ «ادانا حابارلارى» اقپاراتتىق اگەنتتىگىنىڭ حابارلاۋىنشا، گۋبەرناتور مۇستافا بۋيۋك داڭعىلدىڭ اشىلۋ سالتاناتىندا «نازارباەۆ -حالىقارالىق دەڭگەيدە تانىلعان تۇلعا. ونىڭ ەلىن دامىتۋ ستراتەگياسىن تۇركيانىڭ ىرگەسىن قالاعان مۇستافا كەمال اتاتۇرىكتىڭ جوسپارىمەن سالىستىرۋعا بولادى. نۇرسۇلتان نازارباەۆتىڭ باسشىلىعىمەن قازاقستان الەمنىڭ كوپتەگەن حالىقتارى ءۇشىن وركەندەۋدىڭ، بەيبىتشىلىك پەن تۇراقتىلىقتىڭ سيمۆولىنا اينالعانىن اتاپ وتكىم كەلەدى» دەپ مالىمدەگەن.

بۇل – ورتالىق كوشەلەرىنىڭ بىرىنە نازارباەۆتىڭ اتى بەرىلگەن تۇركيانىڭ ءتورتىنشى قالاسى. 2011 جىلدىڭ ساۋىرىندە نازارباەۆتىڭ قۇرمەتىنە نەۆشەحير قالاسى كوشەلەرىنىڭ ءبىرىن اتاعان. 2012 جىلدىڭ قازانىندا نازارباەۆ ەسىمى قىرشەحير قالاسىنداعى، ال 2013 جىلى گەبزە قالاسىنداعى كوشەگە بەرىلگەن.

شەشەنستاندا باستالعان 

2010 جىلدىڭ ماۋسىمىندا تۇركيا استاناسىندا نازارباەۆقا ەسكەرتكىش ورناتىلدى. ونى اشۋ سالتاناتىندا سول كەزدەگى تۇركيا پرەزيدەنتى ابدۋللا گۇل «بۇل – ونىڭ كۇللى تۇركى الەمى ءۇشىن جاساپ جاتقان يگى ىستەرىنە ريزاشىلىق بەلگىسى» دەدى.

قازاقستان پارلامەنتى دەپۋتاتى ايگۇل سولوۆەۆا تۇرىك قالاسى كوشەسىنە پرەزيدەنت ەسىمىن بەرۋ تۋرالى شەشىمدى زاڭ شىعارۋشى ورگان قابىلداعاندىقتان، ونىڭ زاڭدىلىعى مەن جاريالىلىعىنا كۇمان جوق دەپ سانايدى.

تۇركياداعى «ادانا حابەرلەري» اگەنتتىگىنىڭ نۇرسۇلتان نازارباەۆ اتىندا كوشە اشىلعانى جايلى جاڭالىعىنان الىنعان فوتوكوپيا.

- ەلىمىز تاۋەلسىزدىك العان العاشقى كۇننەن باستاپ قازاقستان-تۇركيا قاتىناستارىن دامىتۋعا نازارباەۆتىڭ قوسقان ۇلەسى ولشەۋسىز ءارى ول كىسىنىڭ قولداۋىمەن قازاق-تۇرىك دوستىعى نىعايا بەرەتىنىنە سەنىمدىمىن، – دەيدى ول.

تۇركيا بيلىگى شەشىمىن تاۋەلسىز جۋرناليست سەرگەي دۋۆانوۆ تا ورىندى سانايدى. ول ازاتتىققا «قازاقستان-تۇركيا قارىم-قاتىناسىن دامىتۋعا نۇرسۇلتان نازارباەۆ شىنىمەن زور ۇلەس قوستى» دەيدى.

قازاقستاننان تىسقارى جەرلەردە پرەزيدەنت نازارباەۆتىڭ قۇرمەتىنە اتالعان تۇڭعىش كوشە 2007 جىلى شەشەن رەسپۋبليكاسىنىڭ گروزنىي قالاسىندا پايدا بولعان. كەيىن نازارباەۆ ەسىمى قالاداعى ءبىر مەكتەپكە دە بەرىلدى.

2010 جىلدان بەرى يوردانيا استاناسى اممان قالاسىندا دا نازارباەۆ اتىنداعى كوشە بار. ال قىرعىزستانداعى شولپان اتا قالاسىندا نۇرسۇلتان نازارباەۆقا قولا ءمۇسىن ورناتىلعان. قازىر وش قالاسىندا نازارباەۆ اتىنداعى ساياباق پەن مەكتەپ سالىنىپ جاتىر. باق-تىڭ حابارلاۋىنشا، مەكتەپ قۇرىلىسىن قازاقستان قارجىلاندىرادى.

قازاقستاندا نازارباەۆ كوشەسى جوق

نازارباەۆقا العاشقى ەسكەرتكىش ۋكراينانىڭ دنەپرودزەرجينسك قالاسىندا ورناتىلعان. 1958-1960 جىلدارى قازاقستاننىڭ بولاشاق پرەزيدەنتى وسى ەلدە جەرگىلىكتى كاسىپتىك ۋچيليششەدە وقىعان.

ال قازاقستاننىڭ وزىندە نازارباەۆتىڭ ەسىمىمەن اتالاتىن كوشە جوق. سوڭعى جىلدارى شەنەۋنىكتەر مەن پارلامەنت دەپۋتاتتارى استانا اۋەجايى مەن ەل استاناسىن نۇرسۇلتان دەپ اتاۋدى تالاي ۇسىنعان، بىراق پرەزيدەنت بۇل ۇسىنىستاردى قابىلدامادى.

استاناداعى جاڭا ۋنيۆەرسيتەت نازارباەۆتىڭ ەسىمىمەن اتالادى. قازاقستانداعى «نازارباەۆ زياتكەرلىك مەكتەبى» اتالاتىن مەملەكەتتىك ەليتالىق مەكتەپتەر جەلىسى عىلىم، ەكونوميكا جانە ساياسي سالاداعى دارىندى بالالاردى وقىتۋعا ارنالعان.

2010 جىلدىڭ شىلدەسى – نۇرسۇلتان نازارباەۆتىڭ تۋعان كۇنى قارساڭىندا الماتىدا دەندروپارك اشىلىپ، پرەزيدەنت قۇرمەتىنە اتالدى. ونىڭ ەسىمىمەن اتالاتىن ساياباقتار استانا، اقتوبە قالالارىندا دا بار.

2001 جىلى پرەزيدەنت نۇرسۇلتان نازارباەۆتىڭ قۇرمەتىنە «قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازارباەۆ» وردەنى تاعايىندالعان. ناگرادالار جۇيەسىندەگى دارەجەسى – ءۇشىنشى ورىندا.

ىلە الاتاۋىنىڭ تيان-شان جوتاسىنىڭ سولتۇستىك بەتكەيىندەگى كومسومول شىڭى اتاۋى 1998 جىلى «نۇرسۇلتان شىڭى» دەپ وزگەرتىلگەن.

2015 جىلى نيدەرلاند نازارباەۆتىڭ بەينەسى سالىنعان پوشتا ماركاسى مەن «پرەزيدەنت نازارباەۆ» قىزعالداعىنىڭ جاڭا سورتىن تانىستىردى.