Körnekti ädebietşi-ğalım, sınşı, filologiya ğılımdarınıñ doktorı, professor, qadirmendi wstaz Twrsınbek Käkişev ötti dünieden. 89 jasqa qarağan şağında.

“Biz – eñ aldımen Käkişevke qarızdarmız!”. 1970 jıldan keyin QazWU-dıñ filologiya fakul'tetin bitirgen ädebietşi-ğalımdardıñ basım köpşiligi osılay deydi. Nege? 1968 jıldan bastap ömiriniñ soñına deyin QazWU-dıñ filologiya fakul'tetinde wstazdıq etken Twrsınbek Käkişev universitet bitirgen öziniñ talant­tı şäkirtterin är jıl sayın Almatığa alıp qaluğa tırısatın. “Auılda jürip sen ğılımmen qalay aynalısasıñ? Ädebietşi bolu üşin ädebi ortada jüru kerek!” dep jäne erinbey-jalıqpay zır jügirip, bedelin salıp, bir şäkirtin – Ädebiet institutına, ekinşi şäkirtin – Til bilimi institutına, üşinşisin – ädebi jurnalğa, törtinşisin ädebi muzeyge ornalastıratın. “Filologiya fakul'tetinde qızdar köp oqıdı ğoy, qaybir jılı edi, osı fakul'­tetti 9 jigit bitirdi, sonıñ 8-in Almatığa alıp qalıp, bärin de ädebietşi qılıp şığardım ğoy…” deuşi edi Twrsınbek ağamızdıñ özi de ağınan jarılıp. T.Käkişevtiñ Almatığa alıp qalğan jigitteriniñ deni – qazirgi küni iri ädebiet­şi­ler. Qazaq ädebiettanuınıñ köşin ögizdey örge süyrep kele jatqan da– osılar.

Aynalasına wdayı şuaq şaşıp, jaqsılıq jasap, izgilik seuip jüretin T.Käki­şev­tiñ artında ülken mwra qaldı. Ol tek bir ğana Säken Seyfullin turalı 12 kitap jazıptı. Sonıñ işinde “Säken süygen swlular”, “Mağjan – Säken”, “Tar jol, tayğaq keşudiñ” tağdırı” –bertinde jazılğan dünieler. Bwdan özge eñbekteri (“Qazaq ädebieti sınınıñ tarihı”, “Säbeñ älemi”, “Sanadağı jaralar”, “Ker zamannıñ kereğar oyları” jäne t.b.) qanşama?! Mwnıñ bäri de – qwndı dünieler. Äsirese, dere­gimen. Naqtı derekke jüginuimen äri jüyeleuimen.

Twrsınbek Käkişev – qazaq sınşıl oyı­nıñ iri ökilderiniñ biri. Körnekti ğalımnıñ esimi men eñbeginiñ de qazaqtıñ sınşıl oyı­men birge mäñgi jasay beretinine senimimiz kämil.