Auıldastarı onı Qasqır Erjan atap ketken. Atasa atağanday-aq. Tört tüligin örgizip, atakäsipti jalğastırıp kele jatqan Erekeñ tüz tağısınıñ tisi malğa batsa boldı, almay qoymaydı. Añşı jigit qasqırdı tehnikamen quıp jürip, snaypermen atıp almaydı, kädimgi dästürli ädispen soğıp aladı nemese it salıp aulaydı.

Tarbağatay audanı, Üştöbe auılınıñ twrğını Erjan Qasımbekov bala jastan äkesine erip Ökpeti, Dolanqara, Jeldiqara, Qızıltas tauların kezip ösedi. Äkesi Jwmağazı aqsaqaldıñ añğa şığıp, it jügirtkenin körip erjetken Erjan segizinşi sınıp ta oqıp jürgende birinşi ret qasqır aladı. Sodan beri büginge deyin aulağan tağılarında esep joq.
Juıqta äleumettik jelilerde Erjannıñ qarusız jaralı qasqırmen arpalısıp jatqan videosı köpşilikti tañğaldırğanı ras. Mwnı körip pikir bildirgenderdiñ birazı senimsizdik tanıtıp, jaralı qasqırdıñ älsizdigin alğa tartsa, endi biri qasqırdıñ qanşalıqtı qauipti ekenin tüsindirip baqqan. Qasekeñdi qañq etkizbey basıp wstau üşin bilektiñ küştiligi ğana emes, jürektiñ tüktiligi de kerek. Şındığında, jalañ qol jaralı qasqırdıñ qos qwlağınan basıp twqırtqandı qoyıp, qos auızben atıp tüsirudiñ özi erlik. Swr jendettiñ swstılığın körmey-aq, wlığan dauısı mısıñdı basıp, üreyiñdi qaşıradı. Qasqır Erjannıñ emes biraq…

Ol ata-babasınıñ izi qalğan Qarajal qıstağında bağıp otırğan malın qasqırğa tartqızbaudıñ amalın oylap qıstı ötkizedi. Jılda – osı. Jaz jaylauğa tüskenşe, eki közi tört bolıp ormannıñ swr jendetterin añdidı. Ölmestiñ qamı üşin tirşilik etip jürgen qasekeñniñ de qantalağan közderi mal qorada. Tağınıñ bir jaman qasieti, qoregin alıp qana ketpeydi, basqasın da jaralap, jarıp oyranın şığaradı. Al malmen jan saqtap otırğan Erekeñ şığınnıñ aldın alu üşin äkeden üyrengen ayla-täsilderin qoldanıp, qora mañın toruıldap jürgen it-qwstardı soğıp aladı. Tipti, auıldan wzap ketken qasqırdıñ soñına tüsip, kün jürip, tün jürip, almay tınbaydı. Közine tüsken qasqırdı jibermey, nağız dästürli añşılarğa say täsildi qoldanatındıqtan bolsa kerek, auıldastarı Qasqır Erjan dep tanidı. Üş wlı «qasqırdıñ böltirikterimiz» deytin körinedi. «Äke körgen oq jonar» demekşi, twñğışı Ersayın da añşılıq dese delebesi qozıp twradı. Al egiz wldarı Rüstem men Dastan – asqar tau äkeleriniñ qolqanatı. Ädildikti tu etetin Erjan balalarına tekti tärbie berip, bireudiñ ala jibin attamay, eñbek etuge baulıp keledi.

Erjannıñ inisi Merey Qartovtıñ aytuınşa, ağasınıñ añşılıq pen malşılıq käsibi bir kitapqa jük bolarlıqtay. Birde Erekeñ apanınıñ auzında aqırğan ayumen betpe-bet kelip qaladı. Abıroy bolğanda, jalma-jan iığındağı mıltıqtı oqtap jiberip, şürippeni basıp ülgiredi. Qorğasın oq tarpa bas salğalı twrğan ayudıñ keude twsına tiip, tayınşaday añ Erekeñniñ üstine qwlağan eken.

Merey Qaynarwlı

Tarbağatay audanı.