KRIMINAL MEN TERRORIZMDİ ŞATASTIRMAYIQ
kerey.kz
Keyingi kezde kädimgi kriminal men terrorizmdi şatastıru etek ala bastağan siyaqtı. Almatıda bügin, 18-şilde küni orın alğan oqiğağa baylanıstı äleumettik jelilerde onı dini fundamentalizmnen köruşilik te, asıl dinimiz Islamğa jala jabuşılıq ta bayqalıp jattı. İs jüzinde bwl terroristik aktiden göri kädimgi kriminalğa wqsaydı.
Resmi derekter boyınşa qarastırğanda küdikti Almatı audandıq işki ister basqarmasına kirmek bolğanda posttağı policiya qızmetkeri onı toqtatqan. Sözge kelip qaldı ma kim bilsin? Küdikti jigit oq atıp jaraqattap, policiya qızmetkeriniñ avtomattı qaruın tartıp äketken. Anıqtalğan derekterge qarağanda onıñ ötken jeksenbide bir äyeldiñ ölimine qatısı bolğan körinedi. AİİB sol is boyınşa kelse kerek. Küdikti sol bette köşe boyında bireudiñ jeñil köligin tartıp almaq bolıp iesine oq atqan. QR İİM baspasöz qızmetiniñ habarlauına qarağanda küdikti artınan quğan «Boran» ekipajın avtomatpen atqılağan. Keybir derekterde küdikti ekeu delinedi. Abay men Bayzaqov köşeleri qiılısında olar mingen qara «Kamri» avtoköligi toqtatılğan. Küdiktilerdiñ biri qızılordalıq 27 jastağı jigit Abılayhan men Qazbek bi köşeleriniñ qiılısında «Qazaqkoncert» ğimaratınıñ janında oq tiip, qolğa tüsken. Sol jerdegi atısta eki policey jaralanğan. Küdiktiniñ izdestirilip jatqan ekinşi sıbaylası da bügin 16.30-da wstaldı.
Söytip Almatıdağı bügingi atısta 4 adam (üşeui policiya qızmetkeri) qaza bolıp, jeteui auruhanağa tüsken (jeteudiñ beseuine oq tigen). Bwl wyımdasqan älde bir lañkestik äreket emes, nağız kriminaldıq oqiğa. Qala boyınşa «terrorlıq qauiptiñ qızıl deñgeyi» engizilui tek saqtıq, qauipsizdik maqsatta bolar. Äytpese, tönip twrğan wyımdasqan lañkestik äreket bayqalmaydı. Jalpı Qazaqstanda terroristik äreketterge eşqanday negiz joq.
Almatı üşin auır sınaq bolğan bügingi künde qaraqşılardıñ qolınan opat bolğan kapitan Bauırjan Nwrmahanbetov, starşina Ayan Ğaniev, serjan Maqsat Sälimbaev bauırlarımızdıñ otbasına qayğılarına ortaqtasıp köñil aytamız! Jaralanıp auruhanağa tüsken qwqıq qorğau qızmetkerlerine Alla şipasın bersin. Tezirek sauığıp qatarğa qosıluına tilektespiz!
Bügin kün üşin bilik tarapınan halıqqa jetispegeni aqparat qana boldı. Sol aqparattıñ jetimsizdiginen türli qaueset, bwrmalanğan boljam, örekpigen ösek jeldey esti. Aqorda, qala äkimşiligi, TJ mwndayda halıqqa aqparat berudiñ jelisi men tärtibin aldın ala oylastırıp qoyğanı tiimdi. Orınsız dürbeleñge jol berilmeui kerek.
Al meni oylandırğanı – qılmıstıq ärekettiñ motivaciyası. Ol turalı keyinirek jazarmın.
QARALI KÜN JARIYALANSA?!
Kriminal men lañkestikti şatastırmau turalı keşe jazğanmın. Almatıda ötken brifing barısında QR İşki ister miinistri Qalmwhanbet Qasımov policiya qızmetkerlerine qarsı şabuıl jasağan qılmıskerdiñ maqsatı olardan «kek alu bolğanın» tayğa tañba basqanday aytıp berdi. Söytip qandı oqiğa terrorizmnen göri qwqıq qorğau organdarımen «razborkağa» jaqın bolıp şıqtı.
Resmi derek boyınşa bwrın eki ret sottalğan Ruslan Külikbaev «türmede otırğanı üşin» qwqıq qorğau organdarı qızmetkerlerinen kek aludı wyğarğan. Almatı audandıq İİB, odan keyin QR WQK Almatı qalası boyınşa departamentine şabuıl jasap jürgeni sodan eken. Qılmısı üşin ädiletti jaza alğan adamda kek bolmaydı. Ol moyınswınıp jazasın öteydi. Al ädiletsiz jazağa wşırağan adamda özin sonday jağdayğa wşıratqandarğa qarsı öştik oyanadı. Aşınu oqıs äreketterge wrındıradı. Qılmısker basınan kezinde osınday bir keleñsizdikter ötken siyaqtı.
Qwqıq qorğau organdarınıñ qızmetkerleri ärbir adamğa «qılmısker» dep emes, «Adam» dep qaraudı jandarına serik etkenderi jön be deymin. Terrorizm ädette ürey tuğızu üşin halıqtı köbirek qırudı maqsat etedi. Al küdiktiniñ ärekettik motivaciyası bükil qoğamğa emes, tek qwqıq qorğau organdarına qarsı bağıttalğan. Sondıqtan küdiktiniñ bwl qılmıstıq äreketteri onıñ qanday dindi wstanğanına qaramastan kriminaldıq sipatta boğanın däleldeydi.
Kuägerler onıñ sıbaylası dep oylağan jigit qılmıskerdiñ tırnağına ilinip qalğan avtokölik jürgizuşisi bolıp şıqtı.
Qandı oqiğa 25 minutqa sozılğan. 10 sağat 54 minutta ol Almalı audandıq İşki ister basqarmasına kirgen, al 11 sağat 19 minutta qolğa tüsken. Soñğı derekterde şekara äskeriniñ tağı bir sardarı qaza tapqanı aytıladı. Söytip bir bandittiñ qolınan 5 adam qaza bolıp, 8 adam jaralanğan. Marqwmdardıñ otbasına qayğılarına ortaqtasıp tağı da köñil aytamız. Jaralanğandar tezirek jazılsın!
Däl osınday qandı oqiğa aldıñğı küni, 17-şildede AQŞ-tıñ Luiziana ştatınıñ Baton-Ruj qalasında orın aldı. Irakta bwrın teñiz jayau äskeri qızmetin atqarğan Gevin Long degen bireu afroamerikalıqtarğa qatıgezdik tanıtqanı, sotsız, tergeusiz qara näsildi jasöspirimdi öltirip tastağanı üşin tärtip saqşılarınan kek alıp, üş policeydi atıp tastağan. Osınıñ aldında Minnesota ştatında tağı bir afroamerikalıq policeylerdiñ qolınan qaza tapqan bolatın. Osıdan soñ qarsılıq şaraları bastalıp, policeylerge jekelegen twlğalardıñ oq atu oqiğası jiilep ketken.
Keşe AQŞ Prezidenti Barak Obamanıñ ökimimen Baton-Ruj qalasında policeylerge şabuıl jasau oqiğasına baylanıstı 22 şilde (aldağı jwma) Qaralı kün dep jariyalandı. Bizdiñ elimizde de bes adamnıñ jazıqsız qwrban boluına baylanıstı olar jer qoynına tapsırılatın kün Qaralı kün bolıp jariyalanğanı dwrıs bolar edi.
Pikir qaldıru