Kölik qozğalısı turalı Çehiya zañdarı
kerey.kz
Keşe keşkisin qannen qapersiz svetofor aldında jasıldı kütip twrğam. Bir pragalıq artımnan kelip toq etkizdi. Apat jarığın qosıp, köligimnen tüsip qarasam, artqı bamperim mayırılıptı, artqı esigimniñ tömengi şeti mayısıptı, şamdarım bütin, parktronikterim istemeydi. Apalaqtap köliginen tüse sala bäyek bolıp keşirim swrap jatqan çeh jigit ağasınıñ aldıñğı bamperi ekige bölinip ketken, bir şamı sınğan. “Policiya şaqırsañız, öz erkiñiz, kinä – menen” dey beredi.
Çehiya zañdarı boyınşa adam jaraqat almağan, kölik qattı zaqımdanbağan jağdayda policiya şaqıru mindetti emes. Özimniñ de, älgi ayıptı jürgizuşiniñ de uaqıtın ayap, tez-tez eki maşinanı suretke tüsirip aldım da, “Jaqın jerdegi sauda ortalığınıñ jabıq kölik twrağına barayıq” dedim. Älgi adam qattı quanıp, “Maqwl, maqwl” dep ilese jöneldi. Avtotwraqqa jetkesin ayıptı jürgizuşi är kölik iesiniñ qwjattarınıñ işinde mindetti türde bolatın jol oqiğası hattamasın alıp şıqtı da, jeke bas mälimetin, saqtandıru nömirin, kölik soqtığısınıñ sipatın, uaqıtı men ornın toltıra qoydı. Men tek atı-jönimdi, adresim men köligimniñ nömirin jazdım. Qol qoydıq.
Ayıptı adam tüpnwsqa hattama men eki köşirmeni mağan berip, bir köşirmeni özi alıp, tağı da qayta-qayta ğafu ötinip, qoştasıp kete bardı. Bügin tañerteñ jergilikti avtoservisterdiñ birine barıp, hattamanı ötkizdim. Kölik jöndeytin kompaniya ökili saqtandıru wyımınıñ vebsaytına kirip, bes minut işinde arnayı forma toltırdı. Sosın mağan: “Bügin saqtandıru wyımı ökilin jiberip, köligiñizdiñ zaqımdanğan jerin körip, rastaydı. Sosın biz birden jöndeuge kirisemiz. Birneşe künde dayın boladı” dedi. Tüsirgen suretterim de kerek bolmay qaldı, hattama jetkilikti eken. Keşegi oqiğadan soñ uaqıt jay bolğandıqtan avtoserviske birden habarlasa almağanımdı, üyime asıqqanımdı aytıp em, älgi mehanik jigit jımiıp: “Eş keşikken joqsız, Çehiya zañı boyınşa köligiñizdi basqa bir kölik soğıp büldirip ketse, jasatıp aluğa üş jılğa deyin uaqıt berilgen” dedi. Sosın kete bergenimde, “Mınau – köligiñiz jöndelip jatqanda minetin uaqıtşa maşinanıñ kilti. Mwnıñ jalğa alu aqısın da älgi ayıptı adamnıñ saqtandıru kompaniyasınan öndirip alamız” dedi. Barlıq azamattıq, zañdıq qarım-qatınas äbden rettelgen, örkenietti qalıpqa tüsken. Jap-jaña uaqıtşa kölikpen jwmısqa kele jatqanımda älgi pragalıqtıñ artımnan kelip toq etkizgenine birtürli quanıp otırğanımdı sezdim:)
P.S. Aytpaqşı bwl jaqta jürgizuşi kuäligiñiz bolsa, kez-kelgen kölikti uaqıtşa minip jüre bere alasız, öytkeni saqtandıru adamğa emes, kölikke jasaladı. Policiya toqtata qalsa, “mına kölik qwjattarı boyınşa basqa adamğa tiesili ğoy” dep aytpaydı, eñ bastısı – maşina wrlanğan kölik tiziminde twrmasa boldı.
Pikir qaldıru